Том 9 (Конец XIV - первая половина XVI века, подъем общественного значения литературы)

Не подобаше было тебе, о философе, преже суда осудити и преже слышаниа из наших устъ корити нас, поминаа Спаса нашего евангельскаа сказаниа: «Еже слышу, — рече, — сужу, и суд мой праведенъ есть».[639] Не преже сужу, — рече, — донде же слышу, или аще ле тъ есть кому на неповинных суд износити судиты? Мене же преже, даже не глаголати ми, «престаните, — глаголешь, — укаряа нас» писал еси. Аз же скажу не обинуася, не мнению последуа, но истинне повинуася — яков же есмь, таковъ и явитися восхощу, не притворю к себе лицемернаго образа. Преже малых дней, стоащу ми въ церкви святого Никола на месте стоаниа моего, внезапу приде священникъ тоа церкви ко мне и глагола ми: «Веси ли, какова послание послал Максим к Николаю?» Азъ же рех: «Ни». И подаде ми бумажку, в ней же написано: «Веруй просто и неиспытно въ единого Бога, въ трех ипостасех или лицех познаваема, сиречь Отца нерожена и безначална, ниже от себе, ниже от инаго бытие имущаго». Азъ же вопросих его: «Что суть сиа, и о чем блазнишися?» Он же отвеща: «Како пишет: “Ниже от себе, ниже от инаго бытие имущаго”?» Аз же рех ему: «Престани, Стефане, — сие бо имя ему, — не можеши ты одолети словом ему. Вем азъ Максима: не пишет без сведетельства, от святого Писаниа заимствуа, раздавает нам». И таким словом утолих того надмение. Последи бумажку ону в руку имеа, идох на великого князя дворъ и там по случаю обретох Власиа-толмача и бумажку ону ему явих. Он же рече ми: «Иди, посоветуй с ним самъ, да и бумажку, ю же в руку имееши, ему яви. Мнит ми ся, — рече, — о конечном непостиженьстве то онъ писал». Аз же рех: «Что ради его же тружаю аз давшаго ради бумажку попа. Яко по игре, — при им глаголю, — с тобою рех, иже хощет Максимом о богословии стязатися». Боле на глаголах ничто же. И ныне Бога поставляю на свою душу, яко ниже преже сего, в мимошедших, ниже ныне, в настоящих, глаголах о тебе зло или кое неверствие бы о тебе имел. Аще будет тебе имоверно или ни — сам веси. Но филосовское писание нас учитъ, боле нас сам веси: «Не вся, — глаголютъ, — творим елико можем, ниже всему верим, елико слышим, ниже вся глаголемъ, елико познаем», прочее же сам не невеси.

Здравъ буди въ спасении, аще и нам поздравлениа не писал еси.[640]

ПОСЛАНИЕ МАКСИМА ГРЕКА К ФЕДОРУ КАРПОВУ

Господину Феодору Ивановичу Карпову Максим инокъ радоватися о Христе.

О любви убо твоей яже к нам и благом устроени, яже изначала показал еси и еще являеши, яко же честными твоими грамотами утвержаеши, иже любви источникъ, Отець щедротам и всякого утешениа да въздаритъ обилне светлость твою и в настоящем и в будущем и да соблюдаетъ ю вседомно въ всяком здравии душа же и тела и во мнимом житиа сего благоденьствии. А о еже к нам писменми дерзовении, яко непостыдно ответъ сотворяеши, азъ и хвалю, и дивлюся тому, и приемлю еже со истинною благосмельство, яко и Писателное оно слово, глаголющее: «Праведен якоже левъ дерзает».[641] Самеми вещьми истиньствующе е показалъ еси. Азъ же не токмо не ухапляюся предносимыми въ образе ответа твоего премудраго разума обличенми, но и благодать наипаче вемъ тебе благаго ради совета. Его же ни сам не неведах преже, обаче достоверию възвестившаго ми повинувся, побежахся и сам аки человекъ забвению, и невежеством съживя, побежением общим и не необычным человеком. И что дивно, аще и мне, человеку общему, инако сущу и безчислеными страстьми порабощену, случися сицевое, иде же слышим и во всякой святыни пожившим от единого слуха случшееся, Иоану, глаголю, Златому языком и дивному Епифанию,[642] ихъ же къ другъ другу писаниа и ты веси. Прости убо дружебне человеческое что пострадавша мене и въ прочее съ дерзновениемъ и писуй ко мне и повелевай, о них же требуеши. Имети бо будеши мене послушающа во всех.

Здравьствуй о Господе и нас поминай бестрастне и без сумнениа всякого. А священника того исправити не ленися, чтобы, отложивъ всяко прение, последовал просте, неиспытне глаголемым от святых отецъ, еже бо како и когда о божестве не вместится, его же ради и безначаленъ, и непостижим, и неизречененъ глаголется, иже въ Троици прославляемый Богь, тому слава въ веки, аминь.

А философом Бога ради не зови мене. Азъ инокъ есмь, паче всех невежа.

ПЕРЕВОД

ПОСЛАНИЕ МАКСИМА ГРЕКА К ФЕДОРУ КАРПОВУ

ТОГО ЖЕ ФЕДОРУ ИВАНОВИЧУ КАРПОВУ