Том 9 (Конец XIV - первая половина XVI века, подъем общественного значения литературы)

Согласно последнему исследованию «Повести» М. М. Беляковой (Древнерусская «Повесть о Петре, царевиче Ордынском». Л., 1990. Автореф. канд. дис.) публикуемый текст относится ко 2-му виду Основной редакции, который значительно отличается от 1-го вида, более близкого оригиналу.

ПОВЕСТЬ О ЦАРИЦЕ ДИНАРЕ

Подготовка текста, перевод и комментарии Н. С. Демковой

ОРИГИНАЛ

ДИВНА ПОВЕСТЬ МУЖЕСТВЕНА О

ХРАБРОСТИ И МУДРОСТИ ЦЕЛОМУДРЕНЫЯ ДЕВИЦА, ДИНАРЫ ЦАРИЦЫ, ДЩЕРИ ИВЕРСКАГО ЦАРЯ АЛЕКСАНДРА

Умершу Иверьскому властодержавцу Александру Мелеку[115] и не имеющу детища мужеска полу, но едина дщерь остася 15 лет, зело разумна и мужествена, и не посягну присовокупитися мужеви, и предаде ей отець ея властодержавство свое. Она же бе мудра и разумна, и нача владети по преданью отца своего, въ дни перскаго царя.

Царство царици Динары.[116] Первее — показа любовь ко властодержавцем своимъ, и милость к народомъ, и праведный суд. И паче всего имеаше прилежание к Божественому Писанию и о преднихъ царех и властодержавцех, како бе пребывание в нихъ и временное прехождение, и от того навыче воиньской храбрости. Якоже пчела събираетъ от цветов медъ, тако и сиа Динара от памятных книгъ. И со многою кротостию правяще державу свою, и попечение велие имяше о своем властодержавъстве. Яко добрый кормъчий преплавати корабль чрез морскую пучину, и госпожа же сия печашеся, како бы ей быти в тихости.

И доиде слух перьскому царю, яко умре Александръ и приа власть Иверьскую дщи его, царевна Динара. И умысли персинъ приати Иверию и попрати веру их, еже въ Христа, и посла к ней, сице рек: «Аще хощеши от мене милости и державъствовати, да сугубыя дары подаси нашему величеству, аще ли не тако — не повелеваю ти власти держати, но отъиди! Аще ли невъскоре послушаеши — и величество мое възяриши на ся, и милости не имам дати ти!»

Динара же царица, видевъ посланникы перскиа с таковыми глаголы пришедшая, и посла к персину свои послы и дары свыше отца своего, и глаголя: «Еже ми повелеваеши не дрьжати власти, но не от тебя бо прияхъ ю́, но от Бога ми дано свыше. И ты како имаши часть въ жребии Богоматере?[117] Но не того ради да послахъ сиа дары к тебе. Вы убо бесерменскый законъ, мы же истинный законъ имамы. И како глаголеши и величаешися, яко тлененъ еси, не дано ти будет свыше!»

И виде перьсинъ посланники ея, с таковыми глаголы пришедша, и не въсприа даров ея, но съ зверозлобиемъ своим отпусти посланникы ея безделны, глаголя имъ: «Милость даю вам: аще хощете царствовати, но въ единых срачицах повелеваю вам остатися; аще же не тако — иду на васъ с величеством воиньства моего и въсприиму тя и вся велможа твоя с тобою!»

Динара же царица, слышавъ таковыя глаголы от персьскаго царя посланниковъ, отосла посланникы его и рече: «С таковым ополчениемъ вооружаешися на мя, противу немощной чади, девици! Аще и победиши мя— не получиши чести, яко немощную чадь побъдилъ еси. Аще ли въсприму от Христа, Бога моего, победу на тя и от Богоматере его помощь, и женскою възступлю ногою на царское тело, и отъиму главу твою, тогда каковой чести сподоблюся, яко царя перскаго победивъ женскою храбростию; иверьским женам нанесу похвалу, а перским царемъ наведу срамъ!»

И слышав персинъ, и възъярися люте, и поиде со многым ополчениемъ на страну еа.