Том 9 (Конец XIV - первая половина XVI века, подъем общественного значения литературы)

И начя Динара царица посылати велможа свою противу перскаго воиньства. Они же рекоша к ней: «Како можем стати съпротивне многаго воиньства и таковаго перскаго ополчениа?» Динара же царица отвеща к ним: «Въспомяните Девору и Гедеона, како победиша множество вои мадиамляны![118] Не Богъ ли дарова им победу? И ныне той же Богъ нашь и наша заступница Пречистая Богородица! Не отягчяйтеся! Аще ли ныне не въоружимся противъ иноверных и за свою веру не умрем? Умрем же всяко! И предамы себе в работъство? И кою славу воздадим своему благочестию, посрамлени и беспамятни погибнем! Въсприимите себе мужество, и отверзите от себе женочревство! Егда убо наполнивьшимся долинам от дождевныя туча воды и преизлишнюю мокроту имущим, и во днех от великаго жжениа солнечьнаго иссушит мокроту, и много время пребудет земля суха, но и бесплодна, и нужно собрание плодовъ еа. Такоже и в державе земля нашеа: умножившимся народом и распространшимся; егда же ли возмут ны персы и распленят, како можемъ собрани быти и коей чести достоини будемъ, аще не въсприимем храбрости и дадимъ себе въ страхование, поверзем свое благочестие! Отженем от себе женочревъство, и въсприимем попечение о своих сокровищех. Егда убо жена зача въ чреве, и нача готова ей быти; такоже и вамъ, богатство и честь въсприимшим, и гордости наполньшимся; поверзаете народ единоверных своих,[119] и оставляете любы къ единородным своим! Последи же и сами възрыдаете и повержени будете, яко худый рубъ, на землю, и потаптаем ногами, никимже не брегом. Отложите гордость, и отверзете от себе страхование, и облецетеся въ храбръство, еда же не пленят вы перси, и расточат васъ, и расхитят богатство ваше! Но что ради тако закосняем? Ускоримъ противъ варваръ, якоже и азъ иду, девица; и восприиму мужескую храбрость, и отложю женьскую немощь, и облекуся в мужеумную крепость, и препояшу чресла своя оружиемъ, и возложю броня и шлемъ на женьскую главу, и восприиму копие в девичю длань,[120] и въступлю въ стремя воиньскаго ополчениа, но не хощу слышати враговъ своих, пленующых жребий Богоматери и данныя от нея нам державы! Та бо Царица подастъ намъ храбрость и помощь о своем събытии. Они же убо, персы, борзящеся и без сна пребывающе, и конемъ ихъ томящеся день и нощь, и в великомъ труде пребывающим. Яко болящиа жене приближается родити, и пребываетъ в великом разстоянии тела своего, такоже и персом в великомъ истомлении. Но ускорим противу ихъ и не дадимъ внити имъ во свою страну, и идемъ на них Богоматере помощию; аще въсхощет Владычица подати нам победу над врагы своими, вся убо ей возможна. Но не отягчайтеся! Своего ради благочестиа идемъ и начнем, да Богомати совершит ны. Аз же преди васъ начну съ врагы братися!»

Велможи же слышаше таковая от устъ ея, и охрабришеся, и собрашеся вси, и рекошя: «Дерзай, госпоже, дерзай!»

И повеле Динара собрати вся воя своя, и поиде самодержателница к Тевризи в Шарбеньский монастырь,[121] к Пречистей Богоматери, помолитися о дарованней помощи, пеша и необувеныма ногама по острому камению[122] и жестскому пути. И пришед въ Пречистой Богородицы храм, и паде пред образомъ ея и рече: «Владычице-дево, Госпоже Богородице! Въ твоем жребии державствую по твоему преданию, еже ми еси предала своем милосердиемъ, отца моего приала еси, мне же, немощной чяди, власть вручила еси над своим достояниемъ державствовати. Но виждь, Госпоже, гордаго сего и свирепаго персина, надеющася на ся и уповающаго на множество воиньства своего! Аз же, Царице, надеюся на тя, и уповаю на милосердие твое, и помощи от тебе прошу. Не дай, Госпоже, своего достояниа в попрание врагом своимъ, но стани в помощь нашу, и не возвыси надеющихся на ся, и не уничижи уповающих на тя! Но, о Владычице, потщися на враги, и ускори на помощь нашу, и даруй храбръство немощьной чади, и сокруши врагы своя, и покори под ногы верующим в тя. Аще, Госпоже, твоимъ посещениемъ и непобедимым воеводством Богоматере побежду враги твоя, и вся нам преданая тобою от перских сокровищь да не восприиму на расхищение, но дамъ, Госпоже, в домы твоя,[123] на украшение церквам твоим, и на воспоминание твоеа помощи и заступлениа, еже покажеши милость во своемъ жребии!»

И изыде из церкве, и седе на конь свой, и рече к всем воеводам своимъ: «Друзи и братиа! Азъ главу свою положити наперед васъ хощу за достояние Богоматере, и за наше благочестие, и за все православие нашея дръжавы. Аще ли и вы також сътворите, Богъ да поспешит намъ и Пречистая Богомати его да подастъ нам помощь. Аще ли не сотворите, Богъ да съкрушит васъ и Пречистая Богомати его, да предасть васъ в работу и в расхищение, якоже израильтеских иереовъ!»[124]

И поиде из своея державы въ сретение персина.

И приближися къ перским полком, и вземъ копие в руку, и ударися скоро на персьскиа полкы, возопи гласомъ велиемъ въ услышашие обоим полком: «Господа нашего Исуса Христа силою и Пречистыа его Матере помощью да побежать перси!» И удари персина копием, и пронзе.