ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паи

Послушай пророка, еже како виде: (л. 842 об.) [3425] И [3426] обратихся, и возведох очи мои, и видех же серп летящ. И рече ко мне: Что ты видиши? И рех: Аз вижу серп летящ в долготу лакот двоюдесять и в широту десять лактей. И рече ко мне: Си клятва, исходящая на лице всея земли, яко всяк тать от сего до смерти мстится. И вынесу и, глаголет Господь Вседержитель, и внидет в дом татиный и в дом кленущагося именем Моим во лжю, и обитает посреде дому его, и скончает и древо его и камение его. Се суть видение и глаголи пророческия. Да где есть пророком виденое и глаголано, еже ты пишешь, лжесписателю? Что пророк Захариа (л. 843) [3427] видел сходящ серп огнян с небесе на землю и вопроси: Что есть, Господи, серп сей? Кто и кого вопроси, скажи нам подробну? И кто отвеща и рече: Гнев Божий посылается на тех, иже ходят на криве к роте, да поженет пламень их и душа их предаст огню негасимому? И какой к роте на криве? Се ли, еже по твоему Уложению ротившиися, ко кресту повелел еси ходить? Да где был Захариа пророк, еже кому видеть серп огнян сходящ на целующих крест на роте на криве?

Прежде бо Христова воплощения пророку скончавшуся за 460 лет. Аще ли глаголешь, яко Бог отвеща (л. 843 об.) [3428] пророку и рече: Гнев Божий посылается на тех, иже ходят на криве к роте, да поженет пламень их и душа их предаст огню негасимому. Солгал, треокаянный, и на Бога. Бог несть сего пророку отвещал. И кого имаши пощадети, яко ни самаго Бога пощаде, но яко вторый сатана, иже от исперва Бога человеку оболга, рече: Что [3429] яко рече Бог: Да не ясте от всякаго древа, иже в раи. И рече жена: От плода древа сущаго в раи, да ямы и. От плода же древа, иже есть посреде рая, рече Бог, да не ясте от него, ниже прикоснетеся ему, да не умрете. И рече змий жене: Не смертию у(л. 844)мрете [3430]. Ведяше бо Бог, яко в онь же день, аще снесте от него, отверзутся очи ваши и будете яко бози, ведяще добро и зло. И вземше, снедоша, и отверзоста очи обема и разумеша, яко наги. Уразумеша, яко добро заповеди Божия соблюдати, а зло еже преступати. Тако и ты, отступниче Божественых заповедей, глаголешь: Бог пророку отвеща. Бог несть так отвещал, еже на криве к роте ходящих, ты то обвещал, и не пророку, но всем людем. Бог же рече пророку: Си клятва, исходящая на лице всея земли, яко всяк тать от сего до смерти мстится. Иже (л. 844 об.) [3431] аще кто крадет словеса Божия от закона и пророк и святых апостол и святых отец, якоже ты, и вынесу и, глаголет Господь Вседержитель, и внидет в дом татиный и в дом кленущагося именем Моим во лжу, и обитает посреде дому его, и скончает и древо его и камение его. Зри зде, к кому внити рече Господь? И внидет в татиный дом и в дом кленущагося именем Моим во лжу, а не в роте и на криве целующим святый крест. Но иже кленется кто именем Божиим о завете коем и не сотворит, якоже слово явно творит, воздаси же Господеви, рече, клятвы твоя, якоже (л. 845) [3432] в левитех речено есть [3433]: И от всякаго обета, иже обещает человек, не отдаст или не искупится, смертию да умрет.

Послушайте же Господа, иже устав кленущимся положи и умолкни.

Евангелие: Буди [3434] же слово ваше ей, ей, ни, ни. К сим же и Иякова, брата Божия, приложим, глаголюща [3435]: Прежде всех, братие моя, не кленитеся ни небом, ни землею, ниже иною клятвою коею. Буди же вам еже ей, ей и еже ни, ни, да не в лицемерие впадете.

Толкование.

Понеже да не имаши рещи, да како уверован буду, глаголет, аще присно истину глаголеши и николи же кленешися. Никто же бо (л. 845 об.) [3436] тако не верует, якоже кленыйся наскоре. Якоже и премудрый Сирах рече [3437]: Муж кленыйся многа исполнится беззакония и не отъимется от дому его рана. Аще согрешит, грех его на нем, и аще презрит, сугубо согрешит, и аще во тще кляся, не оправдится, исполнится дом его на несении.

Евангелие. Лишше [3438] же сею от неприязни есть.

Толкование.

Иже бо рече паче ей и ни, лишше же сих глаголати и клятися, от диавола есть. Обаче же имаши рещи прочее, яко закон Моисеов, иже клятися повелеваше, лукав бяше, разумей убо, яко не лукав бяше, тогда (л. 846) [3439] клятися. По Христовых же заповедех лукавно есть клятися, якоже и обрезатися и вся жидовская обычая держати, всесожжения и жертвы и приношения и прочая.

Хощеши ли навыкнути, да покажу ти, откуду привниде клятва и не собою, но от златаго языка услышим. Той возвестит нам и не обинется лица силных, аще и пострада от тех даже до смерти. Рцы, всезлатый уста, рцы, и не обиняйся, якоже тогда не убояся от убивающих тело Твое всесвятое, души же Твоей погубити не могоша, но паче своя души погубиша злии тии мучителие. (л. 846 об.) [3440] Рцы и ныне противником Христова Евангелия и святых ученик Его и апостол и свесвятаго вашего учения, откуду клятва привниде. Отвеща златые уста: Реку и не обинуюся, откуду клятва привниде.