ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паи

Тебя ли единаго не спасет Христос Бог или несть с тобою Бог? Паки инде пишет: Приидет [3504] от Сиона избавляяй и отвратит нечестие от Иякова. И Отец свыше свидетельствова: Сей есть Сын Мой возлюбленый, о Нем же благоволих. Ты почто паки вводиши? Или не слышал еси, якоже пишет [3505]: Кончина закону Христос. И паки инде пишет: Тем [3506] же закон пестун нам есть во Христа. Хощеши ли, да покажем ти и о апостолех пророческое свидетельство, яко не точию Христа (л. 862) [3507] подобает прияти, но и святых ученик Его и апостол. Исаия глаголет [3508]: Коль красны ноги благовествующих мир, благовествующих благая, но не вси послушаша благовествования их. Паки Исаия глаголет [3509]: Господи, кто верова слуху нашему? И паки Давид глаголет [3510]: Во всю землю взыде вещание их и в концы вселенныя глаголы их. И посла Своя рабы с высоким проповеданием. И Господь глаголет: Се Аз посылаю вы. Шедше в мир весь, проповедите Евангелие всей твари. И инде рече: Се Аз посылаю вы, яко овцы посреде волков. И апостол глаголет: Како же услышат бес проповедающаго. Како же проповедят, аще не послани будут? [3511] (л. 862 об.) [3512] А яже тем, не ин кто посла и повеле засвидетельствовати, но сам Господь Бог, глаголя: Но [3513] приимите, рече, силу, нашедшу Святому Духу на вы и будете Ми свидетели во Иерусалиме же и во всей Июдеи и Самарии, даже и до последних земли. Рече [3514] же им: Сии суть словеса, яже глаголах вам, еще сый с вами, яко подобает скончатися всем писаным в законе Моисеове и псалмех о Мне. Тогда [3515] отверзе им ум разумети Писания. И рече им: Яко тако писано есть и тако подобаше пострадати Христу и воскреснути от мертвых в третий день и проповедатися во имя Его покаянию (л. 863) [3516] и отпущению грехов во всех языцех, наченше от Иерусалима. Вы же есте свидетелие сим. И се Аз послю обетование Отца Моего на вы. Вы же сядите во граде Иерусалимсте, дондеже облечетеся силою свыше. И егда скончашася дние пятьдесятницы, беша вси апостоли единодушно вкупе. И [3517] бысть внезапу с небесе шум, яко носиму дыханию бурну, и исполни весь дом [3518], идеже бяху седяще, и явишася им разделени языцы яко огнени. Седе же на единем коегождо их и исполнишася вси Духа Свята, и начаша глаголати инеми языки, якоже Дух даяше им.

Видел ли еси, откуду прииде к нам Евангелие, (л. 863 об.) [3519] яко с небесе и како апостоли Христовы умудришася? Не о себе, но якоже Дух даяше им. Но ни по толицей благодати и приятии Святаго Духа престаша апостоли от закона и пророк свидетельствовати.

Став [3520] же Петр со единем на десяте, воздвиже глас свой и рече им: Мужие июдейстии, живущии во Иерусалиме вси. Се вам разумно да будет и внушите глаголы моя, не бо якоже вы мните, сии пиани суть, есть бо час третий дне, но се есть реченое пророком Иоилем: И [3521] будет в последняя дни, глаголет Господь, излию от Духа Моего на всяку плоть, и прорекут сынове ваши, и дщеря ваша и юноша (л. 864) [3522] видения видят, и старцы ваши сония видят, ибо на рабы Моя и на рабыня Моя во дни оны излию от Духа Моего, и прорекут. И прочее. Свидетельствова от закона и пророк о Христе Иисусе.

Таже и о себе приводит, глаголя [3523]: Сего Иисуса воскреси Бог, Ему же мы есмы свидетели. Десницею убо Божиею вознесеся, обетование же Святаго Духа прием. От [3524] Отца излия се, еже вы ныне видите и слышите. И по мале. Слышавша де, умилишася сердцем, реша к Петру и прочим апостолом: Что сотворим, мужие братие? Петр же рече: Покайтеся, вам бо есть обетование и чадом вашим и всем далним, (л. 864 об.) [3525] елико аще призовет Господь Бог наш. Иными же словесы, множайшими свидетельствоваше и умоляшеся, глаголя: Спаситеся от рода сопротивнаго сего. Они же убо любезно прияша слово Его.

Ты же почто не приемлешь Божественых заповедей и святых Его ученик и апостол? Зриши ли, яко не своею силою или благочестием и апостоли вся содеяша, но свыше благодатию Святаго Духа.

Послушай и ты святых верховных ученик, иже глаголаша: Покайтеся [3526] убо и обратитеся, да очиститеся от ваших грех, яко да приидут времена прохладна от лица Господня и послет прежде нарече(л. 865)наго [3527] вам Иисуса Христа, Его ж подобает небеси убо прияти, даже до лет устроения. Их же глагола Бог усты всех святых Своих пророк от века. Моисей убо ко отцем рече: Яко пророка вам воздвигнет Господь Бог от братия вашея, якоже мене Того послушайте о всем, елика аще речет вам. Будет же всяка душа, яже аще не послушает пророка Того, потребится от людей. И вси иже пророцы от Самуила и прочих елицы глаголаша и возвестиша дни сия. И [3528] мы есмы свидетелие всем и повеле нам проповедати людем и засвидетельствовати, яко Той есть нареченый от Бога Судия живым и мертвым.