ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паи

Аще ли хощеши навыкнути о Божии (л. 869) [3543] наследии, еже к нужнейшии потребе умышлено от боголюбцов Господу Богу во Святей Троице и Пресвятей Богородицы, и святым ангелом, и святому пророку и Предтечи Иоанну, и святым славным и всехвалным апостолом, и святым пророком, и мучеником, и святителем, и преподобным отцем, и всем святым давали великие государи цари и великие князи и прочие боголюбцы ко святым Божиим церквам по Божественей заповеди в вечный поминок, а не патриарху и митрополитом и владыкам и монастырем, якоже свидетельствуют тех боголюбцов даныя грамоты и уставы. А по правде устав (л. 869 об.) [3544] той от самаго Господа Бога предадеся тако, якоже глаголет писано древле: И рече Господь к Моисею, глаголя [3545]: Поими племя Левиино и постави я пред Аароном жерцем и да служат ему и да стерегут стражбы его и стражбы сынов Израилевых пред храмом свидения, служити службу храмную, и да снабдят вся сосуды храма свидения и стражбы сынов Израилевых по всем делом храма. И да даси левиты Аарону, брату твоему, и сыном его, жрецем, дани, дани бо суть ему, сии от сынов Израилев. Аарона же и сыны его пристави в храме свидения и да снабдят жречество их и все, еже у олтаря и внутреняя (л. 870) [3546] завесы, иноплеменник же прикасайся, да умрет. И рече Господь к Моисею, глаголя: Се Аз взях левиты от среды сынов Израилевых вместо всего первенца отверзающаго утробу от сынов Израилевых, да будет Мне левиты. Мне бо всяк первенец, в онь же день побих всяк первенец в земли Египетстей и освятих себе всяк первенец во Израили от человека до скота Мне да будут, Аз Господь.

И [3547] да приведеши пред храм свидения, и да собереши весь сонм сынов Израилевых, и приведеши левиты пред Господь, и да отлучит Аарон левиты отдание пред Господь от сынов Израилевых, и да служат службу Господеви. Левиты же да возложат (л. 870 об.) [3548] руки на главы телцем и да сотвориши един греха ради, а вторый во всесозжение Господу очистити от них. Поставиши же левиты пред Аароном и пред сынми его, и да отда сия отдание Господу.

И да отлучиши левиты от среды сынов Израилевых и да будут Мне. По сем же да внидут левиты служити службу в храме свидения, и да очистиши их, и да отдаси я отдание пред Господем, яко отдания отданы сии Мне суть, от среды сынов Израилевых, отверзающих место. Всяка ложесна первенец всех от сынов Израилевых приях я Себе, яко Мне есть весь первенец [3549] от сынов Израилевых, от человека до скота (л. 871) [3550] в день, в онь же побих весь первенец в земли Египетстей, освятих я Себе. И поях левиты вместо всякаго первенца сынов Израилевых, отдах же левиты отданием Аарону и сыном его от среды сынов Израилевых в храме свидения, и да молятся о сынех Израилевых, яко да не будет гнев на сынех Израилевых, егда приступити им ко святым.

И сотвори Моисей и Аарон и весь сонм сынов Израилевых левитом, якоже заповеда Господь Моисею о левитех, тако сотвориша им сынове Израилевы. И очистишася левиты и исправиша ризы своя и отдаст я Аарон отдание пред Господем и помолися о них (л. 871 об.) [3551] Аарон очищения ради их. По сем внидоша левиты служити службы их в храме свидения пред Аароном и пред сынми его, якоже повеле Господь Моисею о левитех, тако сотвориша.

И рече Господь к Моисею, глаголя: Се есть о левитех, от 25 лет и выше да внидут служити служение в храме свидения, от 50 же лет да останут служения и да не служат по сем и да служат братия его, в храме свидения стрещи стражбу, а дела да не делают. Тако сотвори левитом в стражбе их.

И рече Господь к Аарону, глаголя [3552]: Ты и сынове твои и дом отца твоего с тобою (л. 872) [3553] да возмете первенства грех святых, ты же и сынове твои да приимете грехи жречества вашего, и братию твою, племя Левиино, сонма отца твоего и приведи к себе, и да предстанут тебе, и да послужат тебе, и тебе и сыном твоим пред храмом свидения, и да блюдут стражбы твоя и стражбы храма. Разве к сосудом святым и ко олтарю да не приступают, да не измрут и сии и вы. И приложится к тебе и да блюдут стражбы храма свидения и вся службы храма, а иноплеменник да не приступает к вам. И да соблюдет стражбы святых и стражбы олтаря и не будет (л. 872 об.) [3554] к тому гнева на сынех Израилевых.