ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паи

Глаголеши ли, ответотворче, яко бысть везде на всяком месте дано токмо Богу, который ни в котором месте не ограждается и не описуется, для чего на всяком месте есть Его вседержительство. Но человеку дано есть на некотором месте быти огражденному и описанному и на том именном месте, а не инем месте престол Цареградской описуется (л. 145 об.) [548] толко в одном Цареграде, а не инде где, такожде и Иерусалимской в самом Иерусалиме толко.

Писано есть, ответотворче: Яко [549] подобает всякому глаголу или вещи верна приводити свидетельства от Богодухновенных писаний, во извещение убо благому в постыждение же лукавому, а не человеческим преданиом последовати.

Писано [550] есть: И пришед к Нему искуситель, рече: Аще Сын еси Божий, рцы камению сему, да хлеби будут. Он же отвещав, рече: Писано есть: не о хлебе едином жив будет человек, но о всяком глаголе изходящем изо уст Божиих.

По [551] сих же вопросиша Его фарисее и книжницы: Почто ученицы Твои не ходят по преданию (л. 146) [552] старец, но неумовенныма рукама снедают хлеб. Он же отвещав, рече им: Яко добре пророчествова Исаия о вас, лицемере, якоже есть писано. Сии людие устнами чтут Мя, сердце же их далече отстоит от Мене. Сии же чтут Мя, учаще учения заповедей человеческих, оставльше бо заповедь Божию.

Мужие [553] июдейстии, живущии во Иерусалиме, вся се вам разумно да будет и внушите словеса моя, не бо, якоже вы мните, сии пияни суть, есть бо час третий дне, но се есть реченое пророком Иоилем: И будет в последняя дни, глаголет, излию от духа Моего на всяку плоть и прорекут. И прочая.

Доволно ли ти есть, (л. 146 об.) [554] лжесловче, во указание, яко не подобает кроме писания учити или проповедати, якоже апостолския каноны 65-й и 85-й и шестаго Вселенскаго собора утвержают. Да почто бесишися, отвещаеши кроме писания и заповедей, глаголеши, яко Цареградской престол точию во Цареграде описуется и Иерусалимский во Иерусалиме. Хощеши ли, аз ти в мале покажу. Да почто вселенстии патриарси исходят от своих престол по странам и достизают даже и до зде, яже и при нас быти тем. Иже суть Константинополскому Афанасию, Антиохийскому Макарию, Иерусалимскому Паисею, якоже и прежде бывшим Константинопол(л. 147)скому [555] Иеремию, Иерусалимскому Феофану, прочих митрополит и архиепископов и епископов, Бог число их изочтет, да почто аще и вне своея епархии обреталися, но койждо своею титлою престола писалися и именовалися, якоже и ты днесь зде пишешися и именуешися Газский митрополит в чюждей епрахии. Да уже не леть есть, глаголеши, нам в своей епархии именоватися, еже злаго ради времени отшедшим. Почто ты в чюждей пишешися и именуешися Газским, да где есть Газа и колико время преходя скитаешися от нея, аки змий, ползая по земли, изблевая смертоносная своя беззаконная слова и уядая простейшия человеки. Сыскать, аще бы (л. 147 об.) [556] о тебе колико от Газы, одва и бывал ли в Газе, или есть ли в Газе и седалище или престол архиерейский. У брата сучец видиши, а у себя и бревна не видиши. Лицемере, изми первие бревно изо очесе твоего и потом прозриши изъяти сучец изо очесе брата твоего. Тако Господу заповедующу: Писано [557] есть, не оклеветайте друг друга, братие. Оклеветаяй бо брата своего или осуждаяй брата своего, оклеветает закон и осуждает закон. Аще закон осуждаеши, неси творец, но судия. Един есть Законоположник и Судия, могий спасти и погубити, ты кто еси, осуждаяй друга?

Послушай же (л. 148) [558] святых отец святаго 1-го собора Вселенскаго правило 6.

Египтом или всею и Пентаполиею Александрийский епископ да владеет, и Римский епископ сущими под Римом да владеет, и Антиохийский и прочии епископи своими да обладают.

И Втораго Вселенскаго собора правило 4-е.

Предел ради никто же да смешает Церковь, ни поставляет презвитера, ни епископа. Сущи яже во языцех Божия Церкви, святых отец обычаи да держат.

Толкование.

Во многих правилех речено есть, яко не подобает епископу на чюжую епископию находити, но койждо внутрь своих предел да пребывает.

Сам ты свидетельствуеши, яко Александрийский пренесеся во Египет (л. 148 об.) [559] и Антиохийский в Дамаск. Почто же не пишутся ов Египецкий и ов Дамаскинский, да уже по твоему толкованию и сии извержены суть. Безумне, почто не согласився с Божественным писанием, порицаеши нас без правды? Видел ли еси, яко несть согрешил епископ, внутрь своих предел пребывая, и ниже есть описано место епископу в своей ему епископии где пребывати. Но точию вся святыя правила отрицают и извергают, свою оставя епископию, в чюждих пребывающих, якоже ты, непреподобне, вся святыя правила ни во что вменил еси и яко тать по писаному, не входя дверми, но прелазя инуде, обретаешися, тать бо не преходит, (л. 149) [560] разве да украдет и убиет и погубит, от плод бо познайте их, аще объемлют от терния гвоздие и от репия смокви.

Блюдитеся, рече святый апостол, яко по нашем отшествии внидут волцы тяжце, не щадяще стада Христова, и блюдитесь от псов и лаятелей.