Выставочный Иерусалим

На полуденную страну нынешнего града за стеною, а внутръ града стараго, стоитъ гора Сионская великая; на той горе церковь великая святый Сионъ, мати церквамъ, Божие жилище. На той же горе манастырь Виницейскаго царя, а живетъ в немъ Игуменъ и мнихи, а держат ту церковь Виницеяне, а ныне ту церковь держат Турки. На той же горе былъ домъ Зеведеовъ, отца Иванна Богослова; в томъ сотвори Иисусъ тайную вечерю со ученики своими и нозе имъ умы и окаяннаго

Лист 354, рис.116.

Рис.116.Лист 354

Июду не презре. Ту же и Иваннъ Богословъ возлеже на перси Христу. На той же горе в дому Иоанна Богослова жила по роспятии Господа нашего Иисуса Христа Пречистая Богородица. Егда Иисусъ Христосъ, стоя на кресте, глагола Матери Своей: «Жено, се сын Твой» И потомъ глагола ученику: «Се мати твоя». И от того часа поятъ Ю ученикъ во свояси, сииречь в дом свой. На той же горе бысть сшествие Святаго Духа на святыя ученики и апостолы. На той же горе собрашася апостоли на преставление Божия Матери. На той горе прииде Христосъ по воскресении Своемъ ко ученикомъ, и дверемъ затвореннымъ, и ребра своя показа, и Фому уверивый. На той же горе гробъ былъ царя Давыда и сына его Соломона. На том же Сионе есть пещера, где царь Давыдъ сложилъ Псалтырь. И от того места вержением камени, на том же Сионе, где отсеклъ агглъ Господень жидовину руце, прикоснувшуся ко гробу Пречистыя Богородицы. От великия церкви святаго Сиона на левую сторону вержениемъ от лука стрелы Галилея Малая и тамо первие явися Христосъ по воскресениии Своемъ из мертвыхъ. И та вся святая места на Сионской горе.

[О] манастырехъ. [В]нутръ святаго града Иерусалима стоитъ 13 манастырей и доныне, а пение Божественное в нихъ не во всехъ совершается: много пусто стоятъ от поганых Турковъ.

Первой манастырь пречистыя Богородицы честнаго ея Одигитрия.

Второй манастырь святаго Иоанна Предотеча.

Третий манастырь святаго великомученика Димитрия.

Четвертый манастырь святаго великомученика Георгия.

Пятой манастырь святаго архистратига Михаила. В том манастыре старцы Савина манастыря. И в том манастыре трапеза была каменна велика, погании же Турки разбиша верхъ у тое трапезы, и много летъ стояша без верха. Старцы же Савина манастыря Моисей да Кестодей, и приидоша

Лист 354 оборот, рис.117.

Рис.117.Лист 354 оборот

в Московское царство ко царю и великому князю Иванну Васильевичу всеа Руси и ко святейшему митрополиту Макарию и молиша государя, чтоб имъ далъ убогимъ на соружение трапезы. Царь же государь и великий князь Иваннъ Васильевичь всеа Руси и митрополитъ не презре моления и повеле имъ дати на соружение трапезы. Они же приимше милостыню от православнаго царя, отидоша радующуся в Царь град и даша Турскому царю злата много, дабы имъ повелелъ убогимъ у трапезы верхъ зделати. Он же злата ради повеле им у трапезы верхъ зделати и даша санчагу грамоту. Санчаг же повеле о трапезы верхъ зделати. Они же великъ трудъ подяша своима рукама верхъ зделаша у трапезы. Санчак же приде видети трапезы и дьявольским навождениемъ разъярися яростию великою на старцовъ и повеле у нихъ у трапезы разбити опять. Они же убогия плакахуся горко и припадоша к великому архистратигу Михайлу со слезами и сотвориша пение всенощное во храме его. В ту же нощь прииде к санчагу во храмину, где онъ опочиваетъ з женою своею человекъ незнаемъ и взя его от ложа и поиде с нимъ; стражие же и людие его санчаковы не видеша человека того въ дворъ входяща и из двора исходяща с нимъ. На утрии же обретоша санчака пред враты лежаща мертва и прободена мечемъ. И пыташа известно, какъ санчакъ изыде из двора нощию, а не виде его никто, и паде на поганых страхъ великъ, и реша в себе: «Они калугери за трапезу его убиша, да идемъ к калугерамъ, и обрящемъ у нихъ оружие что железно, побиемъ ихъ всехъ. И приидоша к нимъ в манастырь

Лист 355, рис.118.

Рис.118.Лист 355

святаго архистратига Михаила. И обретоша ихъ калугеровъ во церкви молящеся, искаша у нихъ оружия и не обретоша ничтоже, и не сотвориша калугером зла Божиею благодатию, и не смеяше трапезе прикоснутися. Стоитъ манастырская трапеза цела доныне.

Шестой манастырь святыя великомученицу Екатерины.

Седмой манастырь святыя преподобная Анны, матери святыя Богородицы.

Осмый манастырь святаго преподобнаго Еуфимия Великаго.

Девятый манастырь святыя мученицы Феклы.

Десятой манастырь святаго отца Харитона.

Первый на десятъ манастырь Воскресение Христово.

Вторый на десятъ манастырь святых четыредесятъ мученик, иже в Севастии.

Третий на десят манастырь святаго апостола Иакова, брата Господня.