ANTOLOGIO

la reguloza kafedrinkanti. Or, Usan esquado dil universitato di Florida jus

finis efektigar studiuro qua tendencas pruvar ke la kafeino amelioras la

memoro e diminutas la cerebrala lezuri dil Alzheimer-morbo.

La sisamil specalisti, qui partoprenis dum pasinta julio, en Paris, la 19ma

Kongreso mondala pri gerontologio* e pri geriatrio* (medicinala faki por

flegar olda personi NDLT), grande difuzis l'informo pri ca rezulti. Voluntez

tamen vartar ante hastar a via kafe-kruchi : ica Usana ciencala exploro

efektigesis ... che musi ed on vartas ankore la konkluzi di simila studiuro

efektigita che la homo. Nome, kompreneble, la kafeino ne havas nur bon

efiki. Che la granda kafedrinkeri (o pri kafeinizita drinkaji), ol havas anke

kom konsequi, desfacilaji por dormeskar, anxio, iracemeso e desfacilaji

por koncentresar mentale. Ultre lo, ol havas nenegebla efekto pri la urinala

eksekreco dil kalcio e dil magnezio. Se la perdado de kalcio esas facile

kompensata che la yuna personi di qua la kapableso absorbar kalcio esas

tre granda, ol esas min multe kompensata che la evozi, qui mustas sorgar

pri kompensar la perdado per la singladia absorbo di glasedo de lakto o

lua equivalanto.

Ni skribez pluse ke certena medikamenti antibiotika ampligas l'efiko dil

kafeino per plulentigar olua eliminado. Fine, recenta studiuri incitas pensar

ke la kombinuro dil kafeino e dil aspirino esas toxika por la reni. Plu kam

la cetera personi, la homi di qui la reni ne funcionas kontentigante, mustas

esar prudenta carelate.

LA DOZO ESAS IMPORTANTA

On devas fine mencionar, ke, se l'efekto maxim serchata dil kafeino, t.e.

lua stimuliva efiko, konsistas precipue ek disimular la bezono pri dormo e

repozo, ol remplasas nek la una nek l'altra. Lo esas ya la motivo pro quo

lua konsumado ecesanta esas nociva. Koncerne adulto en bona sanesala

stando, diala dozo de cirkum triacent miligrami ek kafeino ne havas

nedezirinda efekti. Ol korespondas kun aproxime sis tasedi de «arabica»

kafeo, ma kun nur tri tasedi de «robusta» kafeo, olqua esas duople plu

richa ye kafeino. Od anke kun tri «expresso»-i de «arabica» kafeo. Ma nia

plumulta kafei esas mixuri.

[ Tradukuro di artiklo publikigita en LES VEILLEES DES CHAUMIERES

(LA VESPERI EN LA PALIO-DOMI) redaktita da Catherine Lejeune. ]

(Ek Kuriero Internaciona n° 2/2009)

142

KELKA ANEDOKTI DIL ANTIQUA EPOKO

La filozofo Diogenes esis survoye de Sparta ad Athina. Lor lua voyirado

Greko hazarde renkontris Diogenes e questionis lu : «De-ube tu venas, ho

Diogenes ? Ad-ube tu iras ?». Lore la sajulo respondis quik : «Me venas

de-che la viri e me iras ad-che la mulieri.» Nome on opinionis ita-tempe ke

la Athinani pro ke li esis tro avida ye moleso e luxo, esis simila a mulieri.

Ita ipsa Diogenes promenis en Athina ante la nokto kun acendita lanterno.

Lore l'Athinani questionis ica novaspeca filozofo : «Pro quo tu promenas

tra l'urbo kun lanterno sub la sunlumo ?» Ma Diogenes respondis ridante

: «Me serchas homo.» En Korinthos, Diogenes qua blamis la richeso di

lua habitanti, ne nur kareis domo, ma mem habitis en barelo. Alexandros

rezolvis vizitar ica famoza sajulo. A la filozofo sidanta en la barelo il dicis :

«Tu ne pasas agreabla vivo. Koncerne me, me povas donar omnaspeca

kozi pro ke me havas tre granda richaji disponebla. Konseque, voluntez

demandar a me omno quo plezas a tu.» Ma ica sajulo respondis nur : «

Pro tu me esas en ombro ; do voluntez forirar de mea sunlumo.»

Segun lernolibro pri la Latina linguo. (Ek Kuriero Internaciona n° 2/2009)

DIGLOSIO*

La diglosio* esas ulo quo facinas me. Ol esas la situeso en qua trovesas

populo, qua havas kom oficala e skribita linguo ulaspeca linguo e parolas

altraspeca linguo. Ico povas esar la difero inter arkaika stando di la linguo

uzata kom literaturala linguo, quale exemple ico existis en la Latinida landi

komence dil Mezepoko kande la skribita linguo esis la Latina e ke la

parolata linguo esis evolucioninta Romana dialekto. Ico existas anke

kande la skribita linguo esas moderna normigita "standarda" linguo e la

lokala idiomo esas dialekto di ca linguo, quale ico esas fakto en Sud-

Germania ed en Germaneparolanta Suisia. Ico povas esar tote altra

idiomo, quale en Alzacia ube la parolata linguo dil rurani esas Germana

dialekto e la skribita linguo esas la Franca.

Mea-judike la maxim interesiva kazo di diglosio esas olta dil

Arabeparolanta landi. Pro religiala motivi, la Arabi mantenas kom oficala

linguo la klasika Araba idiomo dil Korano evanta de deke-kin yarcenti ed

ol esas la linguo docata en la skoli ed en la Universitati. Dume, la simpla

populani parolas dialekti qui esas nur tre desfacile reciproke komprenebla

o, mem, kelkafoye tote ne. La oficala linguo esas tam diferanta de la