История Смутного времени в России в начале XVII века

многочеловеческое христианское множество; услыши всенародный вопль и рыдание, утеши плачь неутешный людий своих; воздвигни паки на царьство ваше и отечество ваше возвеличи, хрестьянский же род возвыси; понеже бо ныни, грех ради наших, царьство ваше вдовствует и отечество ваше сиротствует, пресветлый же превысокий царьский престол плачет седящаго на себе царя царьствующаго не имый, земля же вся малая с великими и с сущими младенцы толицем безчисленным плачем вопиет: милосердуй о нас, царице благоприятная, не остави нас погибающих, не дай всех крестьян в расхищение, дондеже не увидят многих стран невернии языцы, яко царствие ваше безгосударно и возрадуются враги вашего царьствия. Тем же пощади, пощади, пощади, благоверная царице, благослови и даждь Богом избраннаго царя на царство, всем нам благонадежнаго государя всему Росийскому царьству самодержца, а брата своего государя нашего Бориса Федоровича: а блаженныя памяти при великом государе царе и великом князе Федоре Ивановиче, всея Русии самодержце, великие ваши государьства Росийского царьства он же великий государь наш Борис Федорович правил и содержал милосердым своим премудрым правительством, по вашему царьскому приказу». Тако же святейший Иев патриарх Московский и всея Русии, и весь вселенский собор, митрополиты и архиепископы, и епископы и архимариты и игумены, и царьский сигклит, боляре и дворяне, и приказные и служивые люди, и гости, и все православное крестьянство Росийского царьства, многажда били челом и со слезами милости просили у государя Бориса Федоровича, глаголюще: «Великий государь Борис Федорович! Тебе единаго предъизбра Бог и соблюде до нынешняго времени, и остави истиннаго правителя Росийскому государьству, христианского поборника, святым Божиим церквам теплаго заступника, царьского корени по сочтанию законнаго брака благорасленый цвет, государев шурин и ближней приятель: тем благосерден буди о нас, приими моление своих богомольцов и царьского сигклита и всея земля, толикого многаго христианского премножества вопль безвременный и рыдание и плачь неутешный: буди нам, милосердый государь, царем и великим князем и самодержцем всея Русии, по Божией воле восприими скифетр православия Росийского царствия; не дай истинные православные веры в попрание и святых Божиих церквей во осквернение и всех православных християн в расхищение». Великий же государь Борис Федорович, таковое к себе непреложное моление святейшаго Иева патриарха, и всего вселенского собора и всего народного множества слышав, непреклонен бысть к молению их, отрицашеся со многими слезами и рыданием, глагола: «Не мните себе того, еже хотети мне царьствовати, но ни в разум мой прииде о том, да и мысли моей на то не будет. Как мне помыслити на таковую высоту царьствия и на престол такого великого государя моего пресветлаго царя? Ныне бы нам промышляти, как устроити праведная и безпорочная душа пресветлаго государя моего царя и великого князя Федора Ивановича, всея Русии самодержца, а о государстве и о земских делах радети и промышляти и правити бы государьство тебе государю моему отцу, святейшему Иеву патриарху Московскому и всея Русии, и с тобою бояром; а будет моя работа пригодится, и аз за святыя Божия церкви и государьства Московского за одну пядь земли, и за все православное християнство и за ссущих младенец, рад кровь свою излияти и голову свою положити». Святейший же Иев патриарх, моляше государя Бориса Федоровича, глаголя: «Милосердый государь Борис Федорович! Не буди противен вышняго Бога промыслу, повинися святой воле