Хожение за три моря

В том же граде Чюнѣре ханъ взял у меня жеребца, понеже бо свѣдал, что яз русинъ, и он мнѣ говорил: «И жеребца дамъ, да 1000 золотых || к тому дам, аще станеши в нашу вѣру бесерменскую^а[1240]; аще ли ни, и жеребца у тебя возму, да 1000 золотых на главѣ твоей возму». А срокъ учинил на 4 дни. И в день праздника^б[1241] Преображения Спасова господь богъ смиловался надо мною, на свой празникъ^в[1242] не отстави милости своея от мене грѣшнаго^г[1243], не дал мнѣ в Чюнѣре граде с нечестивыми погибнути. Хозяйочи Махметь хоросанецъ отпечаловал меня у хана, и в вѣру свою не поневолили, и жеребца отдал моево мнѣ. Таково^д[1244] мнѣ содѣяся спасово чюдо. Господия моя и братия, рустии християня! Аще хто похочет пойти в Ындѣйскую землю, и тыоставивѣру свою на Руси, да вскликни Бахмета, да пойди в Густанскую землю.

Мене залгали псы бесеръмена, а сказывали, всево много нашего товару, ажно нѣтъ ничево на нашу землю, токмо перецъ да краска, то^е[1245] дешево; бесермени возятъ морем, и они пошлинъ не дают, а^ж[1246] нам пошлины велики, и разбойниковъ много, кафары бо разбиваютъ, а вѣрою они погани, молятся каменымъ болваномъ и Христа не знаютъ.

А ис Чюнѣря есми вышли на Успениевъ день к Бедерю, к болшему ихъ граду, а шли мѣсяцъ. А оттолѣ до Кулонкеря 5 дней^з[1247], оттуду же до Келбергу 5 дний. Да и промежу тѣхъ градов много и иныхъ градовъ, на всякъ день шли по три и по четыре грады; сколко кововъ, столко и градовъ. От Чювиля бо до Чюнейря 20 кововъ, а оттолѣ до Бедеря 40 кововъ, оттолѣ же до Колунгеря 9 кововъ, паки от Бедеря до Колобергу 9 кововъ.

л. 414

В Бедери же торгъ на кони и на шолкъ, да на овощь; а на Рускую землю товару || никакова^а[1248] нѣтъ; да в нем же купити люди черныя, всѣ бо там черны, а все злодѣи, и тати, и лживъцы^б[1249], а жонки такоже^в[1250] все бляди, да вѣдь, да тать и государей своих зельи морятъ.

Во Индѣйской же земли княжата и бояре все хоросанцы; а гундоотанцы все пѣши ходят, и наги, и босы^г[1251], токмо в рукѣ щитъ, а в другой мечь, а ходятъ борзо, а у иных луки прямые и стрѣлы. А бой ихъ все слоны, а около слоновъ идутъ нѣти напреди на конехъ, а кони и сами в доспѣсех; а къ слоном вяжутъ к рылу да к зубом великия мечи по кенъдарю кованы, да облачат ихъ в доспѣхъ булатный, да на нихъ учинены городки, а в городкѣ по 12 человѣкъ в доспѣсехъ да пушки и стрѣлы.

Да тамо же есть у нихъ мѣсто шихбь алудинъ пиръ атыр бозар алядинандъ на год единъ бозар, сѣежается^д[1252] вся страна Индѣйская торговати, да торгуют 10 дний. А от Бедеря 12 кововъ, приводятъ коней до 20 000 и всякий товаръ; въ Гондустанстей земли той торгъ лучший на память шиха Аладина, а на руский празникъ на^е[1253] Покровъ святыя Богородицы.

л. 414 об.

В томъ Алянде есть птица именуема гукукъ, лѣтает ночи, а кличет «гу-кукъ»; и на коей хоромине посѣдит^ж[1254], и тут человѣкъ умретъ, а кто ея хощетъ убити, ино у нея изо рта огнь выдетъ^з[1255]. А мамоны тамо ходят ночи и ловятъ куры, а живутъ в горѣ или в камение. А обезьяны живутъ по лѣсу, и есть у них князь обезьянъский; и кто ихъ заимаетъ, и они жалуются князю своему, он же посылает на того рать свою, и они, пришедше на град, и дворы розваляютъ и людей побьютъ. А рати их, сказываютъ, велми много, и язык ихъ есть свой. || А дѣтей родятъ много. И который родится не^а[1256] въ отца, ни в матерь, и они тѣхъ мечютъ по дорогам, и гестустанцы тѣх емлютъ да учат ихъ всякому рукодѣлию, а иных продаютъ ночью, чтоб взад не знали бѣжати.

Весна же у них стала с Покрова святѣй Богородицы, а по Покровѣ двѣ недѣли празнуютъ шиху Аладину 8 дний; а весну, и лѣто, и осень, и зиму держат тоже по три мѣсяца.

В Бедери же ихъ стол Гондустану бесерменскому, а град великъ и людей много велми. А салтанъ великий 20 лѣтъ, а то содержатъ бояре. И с салтаном рати его выходитъ 300 000, а з бояры его выходитъ с меликтучаром 200 000, а с Меликханом 100 000, а с ыными со многими по 20 000 и по 10 000; и земля велми людна, а бояре силны и пыщны^б[1257]. А носятъ ихъ на кроватех сребреных, а кони пред ними водятъ в снастех золотых. А селские люди голы добрѣ. А выѣздъ ихъ добрѣ чюденъ. На потѣху егда султанъ выѣзжаетъ с материю и з женою, ино с ним конных 10 000, да пѣшихъ 50 000 человѣкъ, а слоновъ водятъ нарядных 200 в доспѣсех золоченых, да 100 человѣкъ трубниковъ, да плясцевъ 100 человѣкъ, да простых коней 300 в снастех золотых, да обезьянъ 100, да блядей 100, а все гаурки.

л. 415