Книга 3. Письма. Творения гимнографические. Эпиграммы. Слова

От финик ваиа сплетше мысленно, и чувственно сретение Владыце сотворим, грядущему к нам: ибо благословен Грядый во имя Господа же и Отца, яко Сын истинный.

Стихира на Господи воззвах, глас 6

Двоеденствует Лазарь во гробе, сущия от века видит умершия, тамо зрит страхи странныя, множество неисчетное адовыми держимое узами: темже сродницы рыдают горько, предвидяще гроб его. Христос же идет оживити друга Своего, едино от всех совершити согласие: благословен еси Спасе, помилуй нас.

B четверток ваий

По 3-м стихословии седален, глас 6

Двоеденствует днесь Лазарь умерый, и о сем проливают печали слезы сродницы, Мариа с Марфою, камень предвидящи гробный. Предста Зиждитель с Своими ученики, смерть пленити, даруяй живот. Темже вопием Ему: Господи слава Тебе.

Богородичен: Святая Владычице Чистая, Бога нашего Мати, всех Творца неизреченно рождшая, моли со апостолы священными всегда благость Его, страстей нас избавити, и оставление нам дати грехов.

Трипеснец. Глас 6

Песнь 4

Ирмос: Услышах слух Твой, и убояхся, разумех дела Твоя, и ужасохся: слава силе Твоей Господи.

Погребается Лазарь, и на гробе яже о Марфе ныне рыдают и плачут, предстати Тебе Животодавцу, желающия.

Смерть начинает трепетати, еже к ней снития Твоего Христе ощущающи: яко жизнь бо, тщетну сию показал еси концем.

Троичен: Единице простая, несозданная, безначальное Естество, в Троице певаемое Ипостасьми, спаси ны верою покланяющияся державе Твоей.

Богородичен: Из Отца безлетна Сына, в лето Богородительнице, неискусомужно родила еси, странно чудо, пребывши Дева доящи.

Снидитеся, приидите, иже в пустынях и пещерах, срести грядущаго на жребяти, Господа славы в песнех.

Песнь 8

Ирмос: Преподобнии Твои отроцы в пещи Херувимы подражаху, трисвятую песнь воспевающе: благословите, пойте, и превозносите во вся веки.

Мариа же и Марфа ныне рыдают, во гробе лежаща видяще Лазаря, и болезненно вопиют: аще бы был Христос зде, сродник наш не бы умерл.

Ад да чает погубитися, ибо Жизнь приходит Лазаря воздвигнути вопиюща: благословите, пойте, и превозносите во вся веки.

Троичен: Безначальным и рождеством же и происхождением, Отцу покланяюся рождшему, Сына прославляю рождшася, воспеваю совозсиявша Отцу же и Сыну, Духа Святаго.

Богородичен: Егоже родила еси Дево несказанно, всегда яко Человеколюбца не престай молящи, да от бед спасет к Тебе прибегающия.

Добродетели яко ветви, и яко ваиа, ко сретению уготовим, и Царю Христу вернии возопием: благословите, пойте, и превозносите во вся веки.

Песнь 9

Ирмос: Безсеменнаго зачатия Рождество несказанное, Матере безмужныя нетленен Плод: Божие бо рождение обновляет естества, темже Тя вси роди, яко Богоневестную Матерь, православно величаем.

В гробе Лазарь двоеденствует днесь, и над ним проливаете слезы Мариа же и Марфа, яко сестры родныя: Христос же грядет к нему с божественными апостолы, показати велие чудо.

Смерте всепагубная, приими разрушение, вратницы же твои заклепы да блюдут: ибо глаголом сокрушит твоя врата Христос, Лазаря возставив. Пий первое сие аде пророк тебе вопиет с нами.

Троичен: Единаго единородителю, единороднаго Сына Отче: и едине единаго свете, света сияние: и единый едине единаго Бога, Святый Душе, Господа Господь, воистинну сый. О Троице Единице Святая, спаси мя богословяща Тя.

Богородичен: Чудо Рождества Твоего удивляет мя Всенепорочная, како зачинаеши безсеменно необыменнаго? рцы, како девствуеши, рождши яко Мати? Еже паче естества верою прием, Рожденному поклонися, елика хощет бо и может.

Господь грядет всести, якоже писано, на жребя: людие готовитеся со страхом прияти Царя всех с ваием, яко победителя смерти, из ада воздвигшаго Лазаря.

Стихира на Господи воззвах, глас 8

На Серафимех страшных, в вышних Христе носимый, яко Бог же, и всех Творец, Сам на жребя на земли всести идеши, яко сый по нам человечески. Вифаниа веселится, приимши Тя Спасе: Иерусалим радуется, яко чаяй Тя прияти: смерть умертвися, предощутивши Лазаря, приити из мертвых: и мы с ваиами сретение совершающе в радости, воспеваим державу благости Твоея Господи.

В пяток ваий

По 3-м стихословии седален, глас 8

Двоица ученик посылается днесь, жребя привести Владыце всех: грядет всести, носимый серафимскими множествы. Начинает боятися Лазарем, миродержица всеядица смерть, первее пленившая род человеческий.

Крестобогородичен: При страсти Сына Чистая стоящи, рыдающи горько восклицаше песньми: како Тя немолчно ангельскими песньми славословимаго, дети еврейстии, увы Мне, Пилатову судищу Сыне представиша? Песнословлю Твое Слове многое и неизреченное благоутробие.

Трипеснец. Глас 8

Песнь 5

Ирмос: Мрак души моея разжени светодавче Христе Боже, началородную тьму изгнав бездны, и даруй ми свет повелений Твоих Слове, да утренюя славлю Тя.

Двоицу ученик Твоих, внегда хотел еси достигнути в Вифанию Христе, посылаеши привести Тебе жребя, на неже никтоже от человек вседе (Мк. 11:1–2): кроме бо Тебе Спасе никтоже безсловесныя языки повину.