Книга 3. Письма. Творения гимнографические. Эпиграммы. Слова

Помилуй нас согрешающих Тебе много, на всякий час, о Христе мой, и даждь образ прежде конца покаятися Тебе.

Святому Духу, Еже царствовати подобает, освящати, подвизати тварь: Бог бо есть, Единосущен Отцу и Слову.

Антифон 2

Аще не Господь бы был в нас (Пс. 123:1), кто доволен целы сохранен быти от врага, купно и человекоубийцы?

Зубом их не предаждь, Спасе, твоего раба: ибо львовым образом на мя подвизаются врази мои.

Святому Духу живоначалие и честь: вся бо созданная, яко Бог сый силою соблюдает[1695] во Отце, Сыном же.

Антифон 3

Надеющиися на Господа, уподобишася горе святей (Пс. 124:1): иже никакоже движутся прилоги вражиими.

В беззаконии рук своих да не прострут (Пс. 124:3) божественне живущии: не оставляет бо Христос жезла на жребии (Пс. 124:5) Своем.

Святым Духом точится всяка премудрость: отсюду благодать апостолом, и страдальчествы венчаются мученицы, и пророцы зрят.

Степенны, глас 3[1696]

Антифон 1

Плен Сионь (Пс. 125:1) Ты изъял еси от Вавилона: и мене от страстей к животу привлецы, Слове.

В юг сеющии слезами (Пс. 125:5) Божественными, жнут класы радостию присноживотия.

Святому Духу всякое благодарение, якоже Отцу и Сыну сооблистает, в Немже вся живут и движутся.

Антифон 2

Аще не Господь созиждет дом добродетелей, всуе труждаемся (Пс. 126:1), душу же покрывающу, никтоже наш разорит град.

Плода чревна (Пс. 126:3) Духом сынотворенное Тебе Христу якоже и Отцу святии всегда суть.

Святым Духом прозрится всякая святыня, премудрость: осуществует бо всякую тварь: тому послужим, Бог бо, яко Отцу же и Слову.

Антифон 3

Боящиися Господа блажени (Пс. 127:1), в пути ходяще заповедей: снедят бо животное всеплодие.

Окрест трапезы твоея (Пс. 127:3) возвеселися, зря твоя пастыреначальниче исчадия, носяща ветви благоделания.

Святым Духом всякое богатство славы, от него же благодать и живот всякой твари: со Отцем бо воспеваемь есть, и с Словом.

Степенны, глас 4[1697]

Антифон 1

От юности моея мнози борют мя страсти, но Сам мя заступи, и спаси, Спасе мой.

Ненавидящии Сиона, посрамитеся от Господа, яко трава бо огнем будете изсохше.

Святым Духом всяка душа живится, и чистотою возвышается, светлеется Троическим единством священнотайне.

Антифон 2

Воззвах Тебе Господи тепле, из глубины души моея, и мне да будут на послушание Божественная Твоя ушеса.

На Господа надежду всяк кто стяжав, вышший есть всех скорбящих.

Святым Духом точатся благодатные струи, напаяюща всяку тварь ко оживлению.

Антифон 3

Сердце мое к Тебе Слове да возвысится, и да ничтоже усладит мя от мирских красот на сладость.

К матери своей якоже имать кто любовь, ко Господу тепльше люблением должни есмы.

Святым Духом боговедения богатство, зрения и премудрости, вся бо в сем отеческая веления Слово открывает.

Степенны, глас 5[1698]

Антифон 1

Внегда скорбети мне, Давидски пою Тебе, Спасе мой: избави душу мою от языка льстиваго (Пс. 119:2).

Пустынным живот блажен есть, Божественным рачением воскриляющимся.

Святым Духом одержатся вся, видимая же с невидимыми: Самодержавен бо сый, Троицы Един есть неложно.

Антифон 2

На горы, душе, воздвигнемся, гряди тамо, отнюдуже помощь идет (ср. Пс. 120:1).

Десная твоя рука, и мене Христе касающися, от лести всякия да сохранит.

Святому Духу богословяще рцем: Ты еси Бог, живот, рачение, свет, ум; Ты благостыня, Ты царствуеши во веки.

Антифон 3

Орекшихмне: во дворы внидем Господня (Пс. 121:1; 83:3): радости многия исполнен быв, молитвы возсылаю.

В дому Давидове страшная совершаются: огнь бо тамо паля всяк срамный ум.

Святому Духу живоначальное достоинство, от Него же всякое животно одушевляется, яко во Отце, купно же и Слове.

Степенны, глас 6[1699]

Антифон 1

На Небо очи мои возвожу, к Тебе, Слове: ущедри мя, да живу Тебе.

Помилуй нас уничиженных, устрояя благопотребныя Твоя сосуды, Слове.

Святому Духу, всякая всеспасительная вина, аще коему Сей по достоянию дхнет, скоро вземлет от земных: восперяет, возращает, устрояет горе.

Антифон 2

Аще не Господь бы был в нас (Пс. 123:1), никто же от нас противу возмогл бы вражиим бранем одолети: побеждающии бо от зде возносятся.

Зубы их да не ята будет душа моя яко птенец, Слове: увы мне, како имам от врага избыти грехолюбив сый!

Святым Духом обожение всем, благоволение, разум, мир и благословение: равнодетелен бо есть Отцу и Слову.

Антифон 3

Надеющимся на Господа (Пс. 124:1) врагом страшни, и всем дивни, горе бо зрят.

В беззакония рук своих (Пс. 124:3), праведных жребий, помощника тя имея Спасе, не простирает.

Святаго Духа держава на всех: емуже вышняя воинства покланяются, со всяким дыханием дольным.

Степенны, глас 7[1700]

Антифон 1

Плен Сионь (Пс. 125:1) от лести обратив, и мене Спасе, оживи, изымая работныя страсти.

В юг сеяй скорби постныя со слезами, сей радостныя пожнет рукояти присноживопитания (ср. Пс. 125:6).

Святым Духом источник Божественных сокровищ, от Него же премудрость, разум, страх: тому хвала и слава, честь и держава.

Антифон 2