Книга об Антихристе и о прочих действах иже при нем быти хотящих

Якоже убо Христу Спасителю нашему хотящу воплотитися, прежде Его мнози предъидоша пророцы, и овии отдалече Его воплощения, овии же отблиз, предвозвещающе о Нем, дабы удобнее были человецы ко принятию Его: тако и пред антихристом отдавнауже мнози предъидоша лжехристи и лжепророцы, уготовляюще ему люди развращенны: напоследок же приити имут чуднее и паче сих, якоже речеся. И якоже пред Христом по всех онех святых пророцех прииде един некий пророк паче всех пророк, и более всех в рожденных женами, иже есть Предотеча Иоанн, мало Христа предупреждающе и Того перстом показуя рек: «Се агнец Божии вземляи грехи всего мира» (Ин., зач. 3). И паки рече: «Яко Сей есть Сын Божии». И ко Христу людей обращая, глаголет: «Покайтеся, приближибося Царство Небесное» (Мф., зач. 5). И еще глаголет: «Грядет Креплии мене во след мене, Емуже несмь достоин преклонся разрешити ремень сапог Его. Аз убо крестих вы в воде, Той же крестит вы Духом Святым» (Мр., зач. 1). Тако и по многих лжехристах предотечах антихристовых будет един некий паче сих чудный предотеча, мало антихриста предваряюще. О сем же лжепророце, антихристовом предотече, святый Иоанн Богослов, во Апокалипсисе сказуя, сице глаголет: «И видех инаго зверя восходяща из земли: и имяше два рога подобна агньчима, глаголаше яко змий, и власть перваго зверя всю творит пред ним, и творяше землю и живущая на ней, да поклонятся зверю первому, егоже исцеле язва смертная его. И творит знамения велия, да и огнь сотворит нисходити на землю пред человеки. И прельщает живущая на земли знамений ради яже дана быша ему сотворити пред зверем». От толкования. «Вся же сотворит (глаголет) чародеянием и мечтами, отступника лжехриста предотеча, на прелесть человеческую, да мнят бога быти антихриста, яко от делателя сицевых чудес свидетельствуема, и несумненную славу приемлюща, по подражанию Крестителя, приводящего Спасителю Верующия. Любопрится бо ложь, на прелести человеков, еже подражати истине. Не чудно же есть во очесех прельщаемых, да видят огнь с небесе сходящ, идеже и во истории Иовли уведехом сего низшедша и скоты его сожегша, по Божию попущению и сатанину действу» (Апокалипсис толковый печатный, зач. 37).

Сие внимательно разумети подобает, ибо зде явствует, яко тогдашнее прельщение на человеки приидет не от недоумения и лыцения некоего спроста в догматех веры, якоже при прочих еретицех бывает, но от знамений и чудес тогда хотящих быти уверятися имут. Ныне же ниже слышатся таковая чудеса где или от кого бывающая. Темже от сего знамения явно показуется, яко еще антихрист не прииде в мир, ниже воцарися: вся бо сия во оная будущая времена содеятися имут. И по вышереченным убо от сего лжепророка чрез чудеса и область антихрист аки бог проповедан будет. Обаче тогда послани будут истинная пророка Енох и Илия, во еже проповедати людем, да не приемлют того. И о сем последовательне в третием знамении покажется.

Глава 9

Знамение 3 Чувственное во плоти пришествие Еноха и Илии пророков, во обличение антихристу, во обращение же и утверждение человеком