Книга об Антихристе и о прочих действах иже при нем быти хотящих

Первее о сем подобает священным писанием показати, яко сия пророка Енох и Илия с плотию взяты быша, и даже доселе во плоти живи пребывают. О Енохе в книге Бытия речено: «И поживе Енох, и угоди Богу, и не обреташеся, зане престави его Бог» (гл. 5). И Сирах глаголет: «Енох угоди Господеви, и преложися образ покаяния родом» (гл. 44). И паки тойже: «Ни кто же создан бысть тако, яко Енох на земли: той бо вознесен бысть от земли». Святый Иоанн Златоуст на словеса апостола: «По вере умроша сии вси, не приемше обетования» (Евр., зач. 328), глаголет: «Двое зде истязати достоит, како рек: преложи Еноха не видети смерти и не обреташеся, и глаголет, по вере умроша сии вси». Ниже: «По вере умроша, рече, сии вси, еже вси зде, рече, не понеже вси умроша, но понеже изяту бывшу оному, умроша сии вси, ихже вемы умерших» (беседа 23). Еще на словеса апостола: «Верою Енох преложися не видети смерти, и не обреташеся, зане преложи его Бог» (зач. 326). В Толковом Апостоле пишет: «Енох преложен жив в явлении Божия силы, еже по нем родом яко могущи сохранити от крепости смертныя и не умрети». Ниже: «Жив бо преложися Енох, и еще жив, где же и како, не явлено» (л. 1020). И паки в зачале 328 глаголет: «По вере умроша вси, не приемше обетования». В толковании: «Двоего зде искати подобает: выше бо рече, по вере умроша вси». Ниже: «Но иже по вере умроша вси, приими кроме Еноха». И в Соборнике во главе 69-й пишет: «Седмый от Адама в роде Енох, иже неумре, но преложися, еже не видети смерти». И в Прологе ноября в 8-й день глаголет: «Ангелом же взят бысть Енох, и пренесен бысть на место рая, яко не видети ему общия с человеки смерти даже и до втораго снития Господня еже на землю». И декабря в 17-й день: «Енох не вкусивыи и доныне смерти». И в книге печатной Иоанна Златоустаго, в неделю 2-ю поста: «Постися Енох, и взят бысть с плотию на небо, и доныне жив есть». И сия убо до зде о Еносе.