Книга об Антихристе и о прочих действах иже при нем быти хотящих

От всех же вышереченных писаний, пророческих и апостольских предречений и святоотеческих сказаний явственно познавается и открытно показуется, антихристова царствования быти токмо полчетверта лета, в последнее время, во оной реченной седмице, на кончине мира. Сии же полчетверта лета явственно есть, яко чтутся по чувственному кругообращению солнечному, рочнаго летняго обычая, а не некая неопределенная лета, акибы идуща от воплощения Христова, или от римскаго падения, или от лет 1666, и акибы по тех оттоле царствует антихрист. Аще ли же оттоле уже царствует антихрист, то како сбудется вышереченное писание глаголющее: прекратятся дние тии избранных ради? И аще оттогда он царствует, то где дней прекращение? Многия бо от тех времен доселе роды проидоша, и прекращения несть. Аще и от лет 1666 царствует антихрист, но от тех до настоящих ныне времен два столетия пройде. И кое зде прекращение дней скорбных? Никоеже. Ибо кто родися в сих летех, и прежив жизнь свою скончася: однако не прекратишася когда дние скорби сея, и доселе не прекращаются. Аще ли же от воплощения Христова, или от римскаго падения полагати, то наипаче отнюд никоеже будет дней прекращение мнящейся настоящей скорби сей. Многия бо в сих временех роды быша и скончашася, дние же скорби сей и еще не прекратишася. Темже явственно есть, яко вся сия краткость времени речеся святым писанием, не о прошедших летех и скорбех, ниже о настоящих ныне, но о хотящих быти во свое время на скончание мира сего. Аще же сия тако суть, якоже и суть: убо и сие знамение показует, яко антихрист самосущественне не прииде в мир, ниже воцарися.

Всеми же сими священными писании, святоотеческим любомудрием и сказанием, и светлоявленным толкованием, вышеположенными доказательствы, и реченными посредствы и обстоятельствы ясно осиявается, и всеконечно открывается, яко чувственно хощет быти в мире антихристово пришествие, и яко не истинно есть мудрование утверждающих мысленное бытие его, и во многих неопределенных неких летех разумевающих царствование его, иже и прочим всем действом при нем быти хотящим, таинственно совершитися наменивше, и тому тако быти возмневше, емуже ныне не у пришло время. Егда же убо то время, в не же сему быти, приспеет, тогда все сие сбудется на самом искусе, якоже апостол глаголет: «Тогда явится беззаконный, егоже Господь Исус убиет духом уст Своих, и упразднит явлением пришествия Своего. И тогда отъимется царство прелестника антихриста вскоре, и прочее в мгновение ока прейдет образ мира сего» (беседа на 2-е послание солуняном, зачало 275-е, и слово Ипполита в Большом соборнике). И тогда праведный Судия Господь наш Исус Христос воздаст комуждо по делом его: праведным убо жизнь вечную во славе неисповедимей, грешным же томление и муку безконечную в посрамлении неизреченнем, еяже, о, дабы избавил нас по своей благости Небесный Царь! Емуже слава и держава, честь и поклонение ныне и во вся безконечныя веки, аминь.

Надсловие книги сея

Сия книга о антихристе, показующая чувственное его пришествие, хотящее быти на кончине мира сего: и во утверждение таковаго разумения предлагает 12 знамений, в них же на священное о сем писание обретается светлоявленное святоотеческое толкование, паче же Самого Бога духновение.

Темже убо, благочестивый читателю, да не соблазнит тя своемненное неких о сем размышление, сице глаголющих: «Не возможно есть антихристу чувственно быти: ибо аще бы чувственно приити тому надлежало, то како речено, яко мечтательну плоть приимет? И аще мечтательну, то како человек быти может? Но аще и человек будет и царем чувственным три лета и шесть месяцей, то како в таковое краткое время проповедатися ему, прельстити же и возобладати толь великим всего мира царствием? Да и начто же ныне таковому проповедатися в мире, понеже вмале уже не весь мир прельщен и соблазнен, и во всяком нечестии заблужден погибает? И паки: аще чувственно приидут на землю пророцы Илия и Енох обращати человеков от нечестия, и еже бы не веровали антихристу: то паки в толико краткое время, сиречь в три лета с половиною, как можно двум или трием человеком проповедати благоверие во всю вселенную, толиким пространством одержимую? Аще же сия вся чувственно будут, то и второе Христово пришествие могло бы от человек познатися, егоже Господь никому не сказа, дня же и часа того явити не изволи».