Минея праздничная

Вся́ земля́ сла́вит погребе́ние Твое́, Христе́, / и пое́т, Влады́ко, погреба́льная Пречи́стыя Твоея́ Ма́тери всеблагогове́йно.

⁷ Испове́мся Тебе́ в пра́вости се́рдца, внегда́ научи́ти ми ся судьба́м пра́вды Твоея́.

А́нгели, зря́ще Тя́, Чи́стая, просте́рту ме́ртву, / Живо́т мíру возсия́вшую, / соужаса́ющеся, дивля́хуся.

⁸ Оправда́ния Твоя́ сохраню́, не оста́ви мене́ до зела́.

Па́ки по́слан бы́сть Гаврии́л от Бо́га / и Твое́ благовеству́ет изше́ствие, / Пренебе́сная, Нетле́нная, Чи́стая.

⁹ В чесо́м испра́вит юне́йший пу́ть сво́й? Внегда́ сохрани́ти словеса́ Твоя́.

В черто́г Боже́ственный, Тебе́ Неве́сту Бо́жию, / Жени́х призыва́ет, Богоневе́сто, / весели́тися при́сно боголе́пно.

¹⁰ Все́м се́рдцем мои́м взыска́х Тебе́, не отри́ни мене́ от за́поведей Твои́х.

До Престо́ла Бо́жия, / иде́же све́т Тро́ицы стра́шный и непристу́пный, / дости́гла еси́ и почи́ла еси́, Де́во, и́стинно.

¹¹ В се́рдце мое́м скры́х словеса́ Твоя́, я́ко да не согрешу́ Тебе́.

Преста́вльшися от земли́, Бо́гу предста́ла еси́, Богоро́дице, / от Бо́га ника́коже отлуче́на бы́вши / николи́же от утро́бы ма́тере.

¹² Благослове́н еси́, Го́споди, научи́ мя оправда́нием Твои́м.

Честно́е Твое́ те́ло, Де́во, / тле́ния и во гро́бе не уве́де, / но с те́лом прешла́ еси́ от земли́ к небеси́.

¹³ Устна́ма мои́ма возвести́х вся́ судьбы́ у́ст Твои́х.

Всесвято́е Твое́ лице́, Пречи́стая, и ме́ртвое я́ко ра́й явля́шеся, / благода́тию и жи́знию ды́шущее взира́ющим.

¹⁴ На пути́ свиде́ний Твои́х наслади́хся, я́ко о вся́ком бога́тстве.

От на́с, ча́д Твои́х, Ма́ти, / любо́вь на́шу и пе́снь исхо́дную приими́, / приноси́мую из глубины́ души́.

¹⁵ В за́поведех Твои́х поглумлю́ся и уразуме́ю пути́ Твоя́.

Отве́рзи, Ма́ти, честны́я Твои́ о́чи / и на ча́д со́бранных при́зри, / Твое́ успе́ние сла́вящих че́стно.

¹⁶ Во оправда́нниих Твои́х поучу́ся, не забу́ду слове́с Твои́х.

Отве́рзи уста́ и да́ждь нам благослове́ние, Пресвята́я Богоро́дице, / преста́вльшаяся от на́с коне́чне.

¹⁷ Возда́ждь рабу́ Твоему́, живи́ мя, и сохраню́ словеса́ Твоя́.

Не оста́ви на́с ны́не, си́рых, Ма́ти, / от земли́ на не́бо ны́не взе́млема, / сопребыва́ти иму́щая Сы́ну и Бо́гу.

¹⁸ Откры́й о́чи мои́, и уразуме́ю чудеса́ от зако́на Твоего́.

Окрест одра́ Твоего́ предстоя́ще, / те́пле взыва́ем Тебе́, Де́во: / поми́луй, Всесвята́я, спаси́ все́х ве́рных.

¹⁹ Пришле́ц а́з е́смь на земли́, не скры́й от мене́ за́поведи Твоя́.

Прииди́ ны́не, Анно, ста́ни с на́ми, / нача́льствующи во пра́зднестве твоея́ / Святы́я Дще́ре, Богома́тере.

²⁰ Возлюби́ душа́ моя́ возжела́ти судьбы́ Твоя́ на вся́кое вре́мя.

Прииди́те, дади́м сла́ву и хвалу́ Бо́гу, / призва́вшему Сию́ во Свята́я, / я́ко Святу́ю, святы́х бо́льшую.

²¹ Запрети́л еси́ го́рдым, про́кляти уклоня́ющиися от за́поведей Твои́х.

Ны́не прия́т не́бо пресла́вно Цари́цу вселе́нныя и весели́тся, / ца́рствующую зря́ с Бо́гом.

²² Отыми́ от мене́ поно́с и уничиже́ние, я́ко свиде́ний Твои́х взыска́х.

Бо́г сла́вы, Сы́н Тво́й, Чи́стая, / со сла́вою, я́ко Ма́терь, прия́т Тя́ / и посади́ одесну́ю Себе́.

²³ Ибо седо́ша кня́зи и на мя́ клевета́ху, ра́б же Тво́й глумля́шеся во оправда́ниих Твои́х.

Облече́нна и преукра́шенна благода́тию, / ны́не предста́ла еси́ Бо́гу, / я́ко Цари́ца и Ма́ти Бо́жия.

²⁴ Ибо свиде́ния Твоя́ поуче́ние мое́ е́сть, и сове́ти мои́ оправда́ния Твоя́.

А́нгели, Де́во, служа́ху на земли́, / А́нгели и ны́не на небесе́х предстоя́т Тебе́ раболе́пно.

²⁵ Прильпе́ земли́ душа́ моя́, живи́ мя по словеси́ Твоему́.

А́нгельская во́инства, слете́вше, / со стра́хом обстоя́ху, / Твое́, Честна́я Влады́чице, преставле́ние зря́ще.

²⁶ Пути́ моя́ возвести́х, и услы́шал мя́ еси́, научи́ мя оправда́нием Твои́м.

И ны́не у́мныя си́лы, мы́сленно с на́ми предстоя́ще, пою́т, / преставле́ние сла́вяще Твое́.

²⁷ Пу́ть оправда́ний Твои́х вразуми́ ми, и поглумлю́ся в чудесе́х Твои́х.

От коне́ц приидо́ша ученицы́ Христо́вы, / послужи́ти погребе́нию Твоему́, Влады́чице, / и воспе́ти Твое́ успе́ние, Чи́стая.

²⁸ Воздрема́ душа́ моя́ от уны́ния, утверди́ мя в словесе́х Твои́х.

Христо́с Бо́г, Де́во, Ангелы Своя́ / и Боже́ственныя апо́столы посла́ на погребе́ние Ма́тере сыноле́пно.

²⁹ Пу́ть непра́вды отста́ви от мене́ и зако́ном Твои́м поми́луй мя́.

Все́ ду́ши святы́х пра́отец, и проро́к, и пра́ведник снидо́шася, / исхо́дную принося́ще пе́снь.

³⁰ Пу́ть и́стины изво́лих и судьбы́ Твоя́ не забы́х.

Тебе́, Богоро́дице Чи́стая, живу́щую и ны́не по сме́рти, / сла́вит все́ мно́жество небе́сных и земны́х.

³¹ Прилепи́хся свиде́нием Твои́м, Го́споди, не посрами́ мене́.

Живе́ши и по сме́рти, Живоприе́мный Исто́чниче, / от живота́ бо к животу́ прешла́ еси́, / я́ко ро́ждшая Присноживо́тный Живо́т.

³² Пу́ть за́поведей Твои́х теко́х, егда́ разшири́л еси́ се́рдце мое́.

Аще и умира́еши, Де́во, ны́не по подо́бию на́шему, / но все́х Цари́ца явля́ешися, / я́ко заче́ншая Творца́ вся́ческих.

³³ Законоположи́ мне́, Го́споди, пу́ть оправда́ний Твои́х, и взыщу́ и́ вы́ну.

Аще и сокрыва́ешися во гро́бе ма́лем, Де́во, / но са́мое не́бо Тебе́ отве́рзеся, / и на престо́л прия́т Тебе́ Бо́г.