Минея праздничная

⁶² Полу́нощи воста́х испове́датися Тебе́ о судьба́х пра́вды Твоея́.

Ка́мо отхо́диши, Де́во? / Ка́мо преставля́ешися ны́не? / Превы́ше небе́с возлете́ла еси́, / оста́вльши на земли́ птенцы́.

⁶³ Прича́стник а́з е́смь все́м боя́щимся Тебе́ и храня́щим за́поведи Твоя́.

Дави́де богоо́тче, бу́ди с на́ми ны́не, / во исхо́де Ма́тери Бо́га на́шего / и в благознамени́тый де́нь пра́здника.

⁶⁴ Ми́лости Твоея́, Го́споди, испо́лнь земля́, оправда́нием Твои́м научи́ мя.

Возопи́й и ны́не ко А́нгелом Бо́жиим: / возми́те врата́ прия́ти Ма́терь Бо́жию боголе́пно.

⁶⁵ Бла́гость сотвори́л еси́ с рабо́м Твои́м, Го́споди, по словеси́ Твоему́.

Кра́сный добро́тою, Ца́рь небе́сный, / ны́не добро́ты Ма́тере вожделе́ / и призва́ Ю в небеса́.

⁶⁶ Бла́гости, и наказа́нию, и ра́зуму научи́ мя, я́ко за́поведем Твои́м ве́ровах.

А́ще и прие́млеши погребе́ние, Де́во, я́ко сме́ртная, / но, я́ко Ма́ти Бо́жия, востае́ши Ду́хом Бо́жиим, Вседе́тельным.

⁶⁷ Пре́жде да́же не смири́ти ми ся, а́з прегреши́х, сего́ ра́ди сло́во Твое́ сохрани́х.

Богоприе́мное те́ло, а́ще и во гро́б вселя́ется, / но во гро́бе пребы́ти не навы́че, / востае́т же си́лою Боже́ственною.

⁶⁸ Бла́г еси́ Ты́, Го́споди, и бла́гостию Твое́ю научи́ мя оправда́нием Твои́м.

Погребе́ние Твое́, Бого́родице, Ле́ствице небе́сная, / Тебе́ ле́ствица бы́сть, / е́юже возшла́ еси́ к Бо́гу, су́щему верху́ ея́.

⁶⁹ Умно́жися на мя́ непра́вда го́рдых, а́з же все́м се́рдцем мои́м испыта́ю за́поведи Твоя́.

Светоно́сный све́щник незаходи́маго Све́та / под земле́ю вма́ле сокрыва́ется, / но полага́ется све́тло на высоте́.

⁷⁰ Усыри́ся, я́ко млеко́, се́рдце и́х, а́з же зако́ну Твоему́ поучи́хся.

Бы́вши еди́ножды от Бо́га проклята́ земля́, / освяти́ся погребе́нием Бо́га на́шего, / и ны́не па́ки погребе́нием Твои́м, Ма́ти.

⁷¹ Бла́го мне́, я́ко смири́л мя́ еси́, я́ко да научу́ся оправда́нием Твои́м.

С небесе́ паде́ бе́дне безпло́тный дре́вле, / превы́ше небе́с чу́дно быва́ет ны́не плотоно́сная Де́ва Мариа́м.

⁷² Бла́г мне́ зако́н у́ст Твои́х, па́че ты́сящ зла́та и сребра́.

Твое́, Чи́стая, вели́чие и сла́ва вни́де пред лице́ сла́вы Го́спода, / преста́вльшейся Тебе́ от земли́.

Сла́ва Отцу́, и Сы́ну, и Свято́му Ду́ху.

Воспева́ем, Сло́ве, Тебе́, все́х Бо́га, / со Отце́м и Святы́м Твои́м Ду́хом, / и сла́вим Боже́ственный зра́к Тво́й.

И ны́не, и при́сно, и во ве́ки веко́в, ами́нь.

Блажи́м Тя́, вси́ ро́ди, Богоро́дице Присноде́во Влады́чице, / и сла́вим успе́ние Твое́.

И па́ки пе́рвый ли́к пе́рвый сти́х:

Жи́знь, во гро́бе положи́лся еси́, Христе́, / и Ма́терь Живота́ полага́ется: / стра́нное виде́ние А́нгелом и челове́ком.

Та́же ектения́ ма́лая и возгла́с:

Я́ко благослови́ся Твое́ и́мя и просла́вися Твое́ Ца́рство, / Отца́, и Сы́на, и Свята́го Ду́ха, / ны́не, и при́сно, и во ве́ки веко́в.

И, покади́вшу иере́ю, ле́вый ли́к начина́ет втору́ю статию́.

Статия́ втора́я.

Досто́йно е́сть велича́ти Тя́, Жизнода́вца, / возвели́чившаго живоно́сное преставле́ние Ма́тере Твоея́ Чи́стыя.

⁷³ Ру́це Твои́ сотвори́сте мя́ и созда́ете мя́: вразуми́ мя, и научу́ся за́поведем Твоим.

Досто́йно е́сть велича́ти Тя́, Богоро́дице, / ду́шу Боже́ственную и непоро́чную в ру́це Бо́га положи́вшую.

⁷⁴ Боя́щиися Тебе́ у́зрят мя́ и возвеселя́тся, я́ко на словеса́ Твоя́ упова́х.

О, чудесе́ но́ваго! / Две́рь в две́ри, Не́бо в не́бо ны́не и́дет / и Престо́л Бо́жий на Престо́л Бо́жий.

⁷⁵ Разуме́х, Го́споди, я́ко пра́вда судьбы́ Твоя́, и вои́стинну смири́л мя́ еси́.

Ста́ и удиви́ся все́ мно́жество А́нгелов, зря́щи Христа́ Бо́га непристу́пнаго, / приступа́юща к Ма́тери, че́сть Ей воздаю́ща.

⁷⁶ Бу́ди же ми́лость Твоя́, да уте́шит мя́, по словеси́ Твоему́ рабу́ Твоему́.

Ужасе́ся, Бо́га тре́петно зря́щи, низходя́щаго па́ки, / и ду́шу на ру́це прие́млющаго, / и возше́дшаго во сла́ве Боже́ственней.

⁷⁷ Да прии́дут мне́ щедро́ты Твоя́, и жи́в бу́ду, я́ко зако́н Тво́й поуче́ние мое́ е́сть.

Ужасни́ся, не́бо, и ты́, земле́, внуши́ глаго́лы: / Бо́г, И́же над все́ми, пе́рвее сни́де / и ны́не второ́е на зе́млю ра́ди Ма́тере.

⁷⁸ Да постыдя́тся го́рдии, я́ко непра́ведно беззако́нноваша на мя́, а́з же поглумлю́ся в за́поведех Твои́х.

Прему́дрость до́м Сво́й, / от земли́ преста́вивши в до́м Сво́й пренебе́сный, / испо́лни ны́не сла́вы Боже́ственныя.

⁷⁹ Да обратя́т мя боя́щиися Тебе́ и ве́дящии свиде́ния Твоя́.

Не от не́ба сни́де Богоневе́стная Де́ва, / но на небеса́ взы́де, / я́ко ро́ждшая небе́снаго Царя́.

⁸⁰ Бу́ди се́рдце мое́ непоро́чно во оправда́ниях Твои́х, я́ко да не постыжу́ся.

Ны́не прохо́дно бы́сть не́бо и челове́ком, / прииди́те у́бо, вси́ христоно́снии, / взы́дем с Ма́терию Бо́жиею.

⁸¹ Исчеза́ет во спасе́ние Твое́ душа́ моя́, на словеса́ Твоя́ упова́х.

В зе́млю пони́кла еси́, неора́нная земле́ Госпо́дня, / Кла́с живота́ израсти́вшая, / и во стране́ произни́кла еси́ небе́сней.

⁸² Исчезо́ша о́чи мои́ в сло́во Твое́, глаго́люще: когда́ уте́шиши мя́?