Минея праздничная

Со́лнце, ви́девшее пре́жде заше́дшее Со́лнце Пра́вды, / ви́дит ны́не и Луну́ заше́дшую, / Де́ву и Ма́терь Све́та.

⁸³ Зане́ бы́х я́ко ме́х на сла́не, оправда́ний Твои́х не забы́х.

Гро́б несве́тлый покры́ приосене́нную и светоно́сную го́ру Госпо́дню, / покры́вшую небеса́ доброде́телию.

⁸⁴ Коли́ко е́сть дне́й раба́ Твоего́? Когда́ сотвори́ши ми́ от гоня́щих мя́ су́д?

Аще и преста́вилася еси́ от земли́ к небе́сным, Де́во, / оба́че вся́ земля́ сора́дуется / и сла́вит преставле́ние Твое́.

⁸⁵ Пове́даша мне́ законопресту́пницы глумле́ния, но не я́ко зако́н Тво́й, Го́споди.

Аще и в небеси́ заключи́ся нетле́нное те́ло Твое́, Де́во, / оба́че благода́ть Твоя́ излия́ся / и исполня́ет все́ лице́ земли́.

⁸⁶ Вся́ за́поведи Твоя́ и́стина, непра́ведно погна́ша мя́, помози́ ми́.

В пе́снех к Бо́гу, моли́твах и поще́ниих, Де́во, / в сии́ дни́ упражня́ющися, / ожида́ла еси́ преставле́ния Твоего́.

⁸⁷ В ма́ле не сконча́ша мене́ на земли́, а́з же не оста́вих за́поведей Твои́х.

Ра́дуется душа́, и лице́ све́том блиста́ет, / отходя́щей Тебе́ ко Го́споду, / Всесвята́я Госпоже́ ве́рных.

⁸⁸ По ми́лости Твое́й живи́ мя, и сохраню́ свиде́ния у́ст Твои́х.

Се́, ве́рнии, надгро́бную пе́снь соверша́ем Тебе́, / нача́тку жи́зни на́шея, / предстоя́ще гро́бу Твоему́ благоче́стно.

⁸⁹ Во ве́к, Го́споди, сло́во Твое́ пребыва́ет на небеси́.

Любо́вию, ве́рнии, ны́не у́тренююще, / славосло́вим Тя́, Влады́чице, Де́во Непоро́чная, / и сла́вим успе́ние Твое́.

⁹⁰ В ро́д и ро́д и́стина Твоя́: основа́л еси́ зе́млю, и пребыва́ет.

Помяни́ на́с во Ца́рствии небе́снем, / преставле́ние Твое́ ве́рно пою́щих, / Де́во Богоневе́сто.

⁹¹ Учине́нием Твои́м пребыва́ет де́нь, я́ко вся́ческая рабо́тна Тебе́.

Ны́не Си́льный, я́коже предрекла́ еси́, / вели́чие Тебе́, Пречи́стая Де́во, сотвори́, / не́ба и земли́ Созда́тель.

⁹² Я́ко а́ще бы не зако́н Тво́й поуче́ние мое́ бы́л, тогда́ у́бо поги́бл бы́х во смире́нии мое́м.

Предстои́ши ны́не Божеству́ Триипоста́сному, / лице́м к лицу́ зря́щи, / иде́же ли́ца покрыва́ют Серафи́ми.

⁹³ Во ве́к не забу́ду оправда́ний Твои́х, я́ко в ни́х оживи́л мя́ еси́.

Не́бо ны́не сра́дуется земле́ и сликовству́ет, / челове́цы со Ангелы соедини́шася, / преста́вльшейся Чи́стей на не́бо.

⁹⁴ Тво́й е́смь а́з, спаси́ мя́, я́ко оправда́ний Твои́х взыска́х.

Иоаки́м ны́не сра́дуется сла́ве Дще́ри своея́ и Богоотрокови́цы, / неизрече́нней и боже́ственней и́стинно.

⁹⁵ Мене́ жда́ша гре́шницы погуби́ти мя́, свиде́ния Твоя́ разуме́х.

Гефсима́ния, блаже́нный и де́вственный гро́б прие́мшая, ублажа́ется, / честву́ема, я́ко черто́г ца́рский.

⁹⁶ Вся́кия кончи́ны ви́дех коне́ц, широка́ за́поведь Твоя́ зело́.

Прииди́те, ве́рнии, / свято́му гро́бу Го́спода и Всесвяты́я Его́ Ма́тере поклони́мся / со стра́хом и ра́достию.

⁹⁷ Ко́ль возлюби́х зако́н Тво́й, Го́споди, ве́сь де́нь поуче́ние мое́ е́сть.

Иерусали́м оби́мем вси́ усе́рдно / и у́зрим та́инства Бо́жия, / на́с ра́ди соверши́вшияся.

⁹⁸ Па́че вра́г мои́х умудри́л мя́ еси́ за́поведию Твое́ю, я́ко в ве́к моя́ е́сть.

А́нгели че́стно сопровожда́ют честны́й гро́б Тво́й, Чи́стая, / све́том свяще́нным молниено́сно сия́ющий, / просвеща́емый све́том Бо́жиим.

⁹⁹ Па́че все́х уча́щих мя́ разуме́х, я́ко свиде́ния Твоя́ поуче́ние мое́ е́сть.

Ужасо́шася вси́ ду́си возду́шнии, / о е́же на небеса́ восхожде́нии Твое́м, / и вострепета́ша держа́вы Твоея́, Чи́стая.

¹⁰⁰ Па́че ста́рец разуме́х, я́ко за́поведи Твоя́ взыска́х.

Вострепета́ сатана́, узре́в све́т сла́вы Ма́тере Бо́жия, / от высоты́ молниеви́дно проше́дший да́же до а́да, / и, пла́ча и стеня́, взыва́ше: / что́ мне́ и Тебе́, Ма́ти Бо́жия?

¹⁰¹ От вся́каго пути́ лука́ва возбрани́х нога́м мои́м, я́ко да сохраню́ словеса́ Твоя́.

О, бога́тства Христа́ Бо́га! / О, безме́рная глубина́ любве́! / И до́льнейшия страны́ земли́ испо́лни пресла́внаго явле́ния Ма́тере.

¹⁰² От суде́б Твои́х не уклони́хся, я́ко Ты́ законоположи́л ми́ еси́.

Пре́жде на́с ра́ди во а́д Христо́с сни́де, / ны́не же Де́ва Мариа́м взы́де на не́бо, / в ра́дость и по́мощь на́м.

¹⁰³ Ко́ль сладка́ горта́ни моему́ словеса́ Твоя́, па́че ме́да усто́м мои́м.

Схожде́нию Бо́жию и восхожде́нию Твоему́, Де́во, / покланя́юся, сла́влю я́ и чту́, / я́ко вины́ вхо́да моего́ в живо́т.

¹⁰⁴ От за́поведей Твои́х разуме́х, сего́ ра́ди возненави́дех вся́к пу́ть непра́вды.

По́яс честны́й, во свиде́ние Твоего́ с пло́тию ны́не к Бо́гу преставле́ния, / вруча́еши, Де́во, Фоме́.

¹⁰⁵ Свети́льник нога́ма мои́ма зако́н Тво́й и све́т стезя́м мои́м.

Аще и ны́не па́ки не приспе́ Фома́ близне́ц, / но та́ин сподо́бися, / пресла́вным воскресе́нием Христа́.

¹⁰⁶ Кля́хся и поста́вих сохрани́ти судьбы́ пра́вды Твоея́.

О, бори́тельный и стропти́вый ро́де евре́йский! / Сы́на кресту́ пре́дал еси́ / и ны́не ру́це воздвиза́еши на Ма́терь.

¹⁰⁷ Смири́хся до зела́, Го́споди, живи́ мя по словеси́ Твоему́.

Ка́ко киво́ту Киво́та Бо́га Жи́ва прикосну́тися, лука́ве, дерзну́л еси́? / Но пости́же су́д отсече́нием.

¹⁰⁸ Во́льная у́ст мои́х благоволи́ же, Го́споди, и судьба́м Твои́м научи́ мя.