Новый Завет (на цсл., гражданский шрифт, с ударениями)

¹⁶ Помяну́х же глаго́л Госпо́день, я́коже глаго́лаше: Иоа́нн у́бо крести́́л есть водою, вы же и́мате крести́тися Ду́хом Святы́м.

¹⁷ Да а́ще у́бо ра́вен дар даде́ им Бог, я́коже и нам ве́ровавшим в Го́спода на́шего Иису́са Христа́, аз же кто бех моги́й возбрани́ти Бо́га?

¹⁸ Слы́шавше же сия́, умолко́ша и сла́вляху Бо́га, глаго́люще: у́бо и язы́ком Бог покая́ние даде́ в живо́т.

¹⁹ Разсе́явшии же ся от ско́рби, бы́вшия при Стефа́не, проидо́ша да́же до Финики́и, и Ки́пра, и Антиохи́и, ни еди́ному же глаго́люще сло́ва, то́кмо иуде́ем.

²⁰ Бя́ху же не́цыи от них му́жие ки́прстии и кирине́йстии, и́же вше́дше во Антиохи́ю, глаго́лаху к е́ллином, благовеству́юще Го́спода Иису́са.

²¹ И бе рука́ Госпо́дня с ни́ми: мно́гое же число́ ве́ровавше обрати́шася ко Го́споду.

²² Слы́шано же бысть сло́во о них во у́шию це́ркве су́щия во Иерусали́ме, и посла́ша Варна́ву преити́ да́же до Антиохи́и.

²³ И́же прише́д и ви́дев благода́ть Бо́жию, возра́довася и утеша́ше вся изволе́нием се́рдца терпе́ти о Го́споде.

²⁴ Я́ко бе муж благ, и испо́лнь Ду́ха Свя́та и ве́ры. И приложи́ся наро́д мног Го́сподеви.

²⁵ Изы́де же Варна́ва в Тарс взыска́ти Са́вла, и обре́т его́, приведе́ его́ во Антиохи́ю.

²⁶ Бы́сть же им ле́то це́ло собира́тися в це́ркви, и учи́ти наро́д мног, нарещи́ же пре́жде во Антиохи́и ученики́, Христиа́ны.

²⁷ В ты́я же дни́ снидо́ша от Иерусали́ма проро́цы во Антиохи́ю.

²⁸ Воста́в же еди́н от них, и́менем Ага́в, назна́менаше Ду́хом гла́д вели́к хотя́щь бы́ти по всей вселе́нней, и́же и бысть при Клавди́и ке́саре.

²⁹ От учени́к же, по ели́ку кто име́яше что, изво́лиша ки́йждо их на слу́жбу посла́ти живу́щим во Иуде́и бра́тиям,

³⁰ Е́же и сотвори́ша, посла́вше к ста́рцем руко́ю Варна́влею и Са́влею.

Глава 12

¹ Во о́но же вре́мя возложи́ И́род царь ру́це озло́бити не́кия и́же от це́ркве.

² Уби́ же Иа́кова, бра́та Иоа́ннова, мече́м.

³ И ви́дев, я́ко го́де есть Иуде́ем, приложи́ я́ти и Петра́, [бя́ху же дни́е опресно́чнии.]

⁴ Его́же и емь всади́ в темни́цу, преда́в четы́рем четвери́цам во́инов стрещи́ его́, хотя́ по Па́сце извести́ его́ к лю́дем.

⁵ И у́бо Петра́ стрежа́ху в темни́це: моли́тва же бе приле́жна быва́емая от це́ркве к Бо́гу о нем.

⁶ Егда́ же хотя́ше его́ извести́ И́род, в нощи́ той бе Петр спя между́ двема́ во́инома, свя́зан желе́знома у́жема двема́, стра́жие же пред две́рьми стрежа́ху темни́цы.

⁷ И се А́нгел Госпо́день предста́, и свет возсия́ в хра́мине: толкну́в же в ре́бра Петра́, воздви́же его́, глаго́ля: воста́ни вско́ре. И спадо́ша ему́ у́жя желе́зная с руку́.

⁸ Рече́ же А́нгел к нему́: препоя́шися и вступи́ в плесни́цы твоя́. Сотвори́ же та́ко. И глаго́ла ему́: облецы́ся в ри́зу твою́ и после́дствуй ми.

⁹ И изше́д вслед его́ идя́ше и не ве́дяше, я́ко и́стина есть бы́вшее от А́нгела, мня́ше же виде́ние зре́ти.

¹⁰ Проше́дша же пе́рвую стра́жу и втору́ю, приидо́ста ко врато́м желе́зным, вводя́щим во град, я́же о себе́ отверзо́шася и́ма, и изше́дше преидо́ша сто́гну еди́ну, и а́бие отступи́ А́нгел от него́.

¹¹ И Петр быв в себе́, рече́: ны́не вем вои́стинну, я́ко посла́ Бог А́нгела Своего́ и изъя́т мя из руки́ И́родовы и от всего́ ча́яния люде́й иуде́йских.

¹² Смотри́в же прии́де в дом Мари́ин ма́тере Иоа́нновы, нарица́емаго Ма́рка, иде́же бя́ху мно́зи со́брани и моля́щеся.

¹³ Толкну́вшу же Петру́ во врата́ двора́, приступи́ слы́шати отрокови́ца, и́менем Ро́ди,

¹⁴ И позна́вши глас Петро́в, от ра́дости не отве́рзе врат, прите́кши же сказа́ Петра́ стоя́ща пред враты́.

¹⁵ Они́ же к ней ре́ша: бесну́еши ли ся? Она́ же крепля́шеся та́ко бы́ти. Они́ же глаго́лаху: А́нгел его́ есть.

¹⁶ Петр же пребыва́ше толки́й: отве́рзше же ви́деша его́ и ужасо́шася.

¹⁷ Помаа́в же им руко́ю молча́ти, сказа́ им, ка́ко Госпо́дь его́ изведе́ из темни́цы. Рече́ же: возвести́те Иа́кову и бра́тиям сия́. И изше́д и́де во и́но ме́сто.

¹⁸ Бы́вшу же дню, бе молва́ не ма́ла в во́инех, что́ у́бо Петру́ бысть.

¹⁹ И́род же, поиска́в его́ и не обре́т и истяза́в стра́жи, повеле́ отвести́ их. И изше́д от Иуде́и в Кесари́ю, живя́ше.

²⁰ Бе же И́род гне́ваяся на Ти́ряны и Сидо́няны: и́же единоду́шно приидо́ша к нему́, и умоли́вше Вла́ста посте́льника царе́ва, проша́ху ми́ра, поне́же страны́ их от ца́рства его́ пита́хуся.

²¹ В нарече́нный же день И́род, обо́лкся во оде́жду ца́рску и сед на суди́ще пред наро́дом, глаго́лаше к ним.

²² Наро́д же возглаша́ше: глас Бо́жий, а не челове́чь.

²³ Внеза́пу же порази́ его́ А́нгел Госпо́день, зане́ не даде́ сла́вы Бо́гу: и быв червьми́ изъя́ден, издше́.

²⁴ Сло́во же Бо́жие растя́ше и мно́жашеся.

²⁵ Варна́ва же и Савл возврати́стася из Иерусали́ма во Антиохи́ю, испо́лнивше слу́жбу, пое́мше с собо́ю и Иоа́нна, нарица́емаго Ма́рка.

Глава 13

¹ Бя́ху же не́цыи во це́ркви су́щей во Антиохи́и проро́цы и учи́телие: Варна́ва же и Симео́н, нарица́емый Ни́гер, и Луки́й Кирине́анин, и Манаи́н со И́родом четвертовла́стником воспита́нный, и Савл.

² Служа́щим же им Го́сподеви и постя́щимся, рече́ Дух Святы́й: отдели́те Ми Варна́ву и Са́вла на де́ло, на не́же призва́х их.