Новый Завет (на цсл., гражданский шрифт, с ударениями)

¹² Умолча́ же все мно́жество и послу́шаху Варна́вы и Па́вла пове́дающих, ели́ка сотвори́ Бог зна́мения и чудеса́ во язы́цех и́ма.

¹³ По умолча́нии же их отвеща́ Иа́ков глаго́ля: му́жие бра́тие, послу́шайте мене́.

¹⁴ Симео́н пове́да, я́ко пре́жде Бог посети́ прия́ти от язы́к лю́ди о и́мени Свое́м.

¹⁵ И сему́ согласу́ют словеса́ проро́к, я́коже пи́шет:

¹⁶ По сих обращу́ся и сози́жду кров Дави́дов па́дший, и раско́паная его́ сози́жду и испра́влю его́,

¹⁷ Я́ко да взы́щут про́чии челове́цы Го́спода, и вси язы́цы, в ни́хже нарече́ся и́мя Мое́, глаго́лет Госпо́дь, творя́й сия́ вся.

¹⁸ Разу́мна от ве́ка суть Бо́гови вся дела́ Его́.

¹⁹ Сего́ ра́ди аз сужду́ не стужа́ти от язы́к обраща́ющимся к Бо́гу,

²⁰ Но запове́дати им огреба́тися от треб и́дольских и от блуда́ и уда́вленины и от кро́ве, и ели́ка неуго́дна себе́ бы́ти, ины́м не твори́ти.

²¹ Моисе́й бо от родо́в дре́вних по вся гра́ды пропове́дающия его́ и́мать, в со́нмищах по вся суббо́ты что́мый.

²² Тогда́ изво́лися Апо́столом и ста́рцем со все́ю це́рковию, избра́вше му́жа от них, посла́ти во Антиохи́ю с Па́влом и Варна́вою, Иу́ду нарица́емаго Варса́ву, и Си́лу, му́жа наро́чита в бра́тии.

²³ Написа́вше рука́ма их сия́: Апо́столи и ста́рцы и бра́тия, су́щим во Антиохи́и и Сири́и и Килики́и бра́тии, и́же от язы́к, о Го́споде ра́доватися.

²⁴ Поне́же у́бо слы́шахом, я́ко не́цыи от нас изше́дше возмути́ша вас словесы́, развраща́юще ду́ши ва́ша, глаго́люще обре́затися и блюсти́ зако́н, и́мже мы не завеща́хом,

²⁵ Изво́лися нам собра́вшимся единоду́шно, избра́нныя му́жи посла́ти к вам, с возлю́бленныма на́шима Варна́вою и Па́влом,

²⁶ Челове́кома преда́вшема душа́ своя́ о и́мени Го́спода на́шего Иису́са Христа́.

²⁷ Посла́хом у́бо Иу́ду и Си́лу, и тех сло́вом сказу́ющих та́яжде.

²⁸ Изво́лися бо Свято́му Ду́ху и нам, ничто́же мно́жае возложи́ти вам тяготы́, ра́зве ну́ждных сих:

²⁹ Огреба́тися от идоложе́ртвенных и кро́ве, и уда́вленины, и блуда́, и ели́ка не хо́щете вам бы́ти, други́м не твори́те. От ни́хже соблюда́юще себе́, до́бре сотворите́, здра́вствуйте.

³⁰ Они́ же у́бо по́слани бы́вше приидо́ша во Антиохи́ю, и собра́вше наро́д, вда́ша посла́ние.

³¹ Проче́тше же, возра́довашася о утеше́нии.

³² Иу́да же и Си́ла, и та проро́ка су́ща, сло́вом мно́зем уте́шиста бра́тию и утверди́ста.

³³ Пребы́вше же та́мо вре́мя, отпуще́на бы́ста с ми́ром от бра́тий ко Апо́столом.

³⁴ Изво́лися же Си́ле пребы́ти та́мо, Иу́да же возврати́ся во Иерусали́м.

³⁵ Па́вел же и Варна́ва живя́ста во Антиохи́и, уча́ща и благовеству́юща сло́во Госпо́дне, и со ине́ми мно́гими.

³⁶ По не́ких же днех рече́ Па́вел к Варна́ве: возвра́щшеся подоба́ет посети́ти бра́тию на́шу во всех гра́дех, в ни́хже пропове́дахом сло́во Госпо́дне, ка́ко пребыва́ют.

³⁷ Варна́ва же восхоте́ поя́ти с собо́ю Иоа́нна нарица́емаго Ма́рка.

³⁸ Па́вел же глаго́лаше отсту́пльшаго от на́ю от Памфили́и и не ше́дшаго с на́ма на де́ло, на не́же положе́ни бы́хом, не поя́ти сего́ с собо́ю.

³⁹ Бысть у́бо ра́спря, я́ко отлучи́тися и́ма от себе́: Варна́ва у́бо пое́м Ма́рка отплы́ в Кипр.

⁴⁰ Па́вел же избра́в Си́лу изы́де пре́дан благода́ти Бо́жией от бра́тий.

⁴¹ Прохожда́ше же Сири́ю и Килики́ю, утвержда́я це́ркви.

Глава 16

¹ Прии́де же в Де́рвию и Ли́стру. И се, учени́к не́кий бе ту, и́менем Тимофе́й, сын жены́ не́кия Иуде́аныни ве́рны, отца́ же Е́ллина:

² И́же свиде́тельствован бе от су́щих в Ли́стрех и Икони́и бра́тии.

³ Сего́ восхоте́ Па́вел с собо́ю изы́ти: и прие́мь обре́за его́ Иуде́й ра́ди, су́щих на ме́стех о́нех: ве́дяху бо вси отца́ его́, я́ко Е́ллин бя́ше.

⁴ И я́коже прохожда́ху гра́ды, предая́ше им храни́ти уста́вы сужде́нныя от Апо́стол и ста́рец, и́же во Иерусали́ме.

⁵ Це́ркви же утвержда́хуся ве́рою и прибыва́ху в число́ по вся дни.

⁶ Проше́дше же Фриги́ю и Галати́йскую страну́, возбране́ни бы́ша от Свята́го Ду́ха глаго́лати сло́во во Аси́и.

⁷ Прише́дше же в Миси́ю, покуша́хуся в Вифини́ю поити́: и не оста́ви их Дух.

⁸ Преше́дше же Миси́ю, снидо́ша в Троа́ду.

⁹ И виде́ние в нощи́ яви́ся Па́влу: муж не́кий бе Македо́нянин стоя́, моля́ его́ и глаго́ля: прише́д в Македо́нию, помози́ нам.

¹⁰ И я́коже виде́ние ви́де, а́бие взыска́хом изы́ти в Македо́нию, разуме́вше, яко призва́ ны Госпо́дь благовести́ти им.

¹¹ Отве́зшеся же от Троа́ды, приидо́хом в Самофра́к, во у́трие же в Неапо́ль,

¹² Отту́ду же в Филиппу́сы, и́же есть пе́рвый град ча́сти Македо́нии, коло́ниа. Бе́хом же в том гра́де пребыва́юще дни не́кия.

¹³ В день же суббо́тный изыдо́хом вон из гра́да при реце́, иде́же мня́шеся моли́твенница бы́ти, и се́дше глаго́лахом к собра́вшимся жена́м.

¹⁴ И не́кая жена́, и́менем Лиди́а, порфиропрода́льница от гра́да Фиати́рскаго, чту́щи Бо́га, послу́шаше: е́йже Госпо́дь отве́рзе се́рдце внима́ти глаго́лемым от Па́вла.

¹⁵ Я́коже крести́ся та и дом ея́, моля́ше ны глаго́лющи: а́ще смотри́сте мя ве́рну Го́сподеви бы́ти, вше́дше в дом мой, пребу́дите. И прину́ди нас.

¹⁶ Бысть же иду́щим нам на моли́тву, отрокови́ца не́кая иму́щая дух пытли́в сре́те нас, я́же стяжа́ние мно́го дая́ше господе́м свои́м волхву́ющи.