Новый Завет (на цсл., гражданский шрифт, с ударениями)

¹⁷ Та после́довавши Па́влу и нам, взыва́ше глаго́лющи: си́и челове́цы раби́ Бо́га Вы́шняго суть, и́же возвеща́ют нам путь спасе́ния.

¹⁸ Се же творя́ше на мно́ги дни. Стужи́в же си Па́вел, и обра́щся, ду́хови рече́: запреща́ю ти и́менем Иису́са Христа́, изы́ди из нея́. И изы́де в том часе́.

¹⁹ Ви́девше же госпо́дие ея́, я́ко изы́де наде́жда тяжа́ния их, пое́мше Па́вла и Си́лу, влеко́ша на торг ко князе́м.

²⁰ И вве́дше их к воево́дам, ре́ша: си́и челове́цы возмуща́ют град наш, иуде́е су́ще.

²¹ И завещава́ют обы́чаи, я́же не досто́ит нам приима́ти, ни твори́ти, ри́мляном су́щим.

²² И сни́деся наро́д на них, и воево́ды растерза́вше им ри́зы, веля́ху па́лицами би́ти их.

²³ Мно́ги же да́вше им ра́ны, всади́ша в темни́цу, завеща́вше темни́чному стра́жу тве́рдо стрещи́ их.

²⁴ И́же таково́ завеща́ние прие́м, всади́ их во вну́треннюю темни́цу, и но́ги их заби́ в кла́де.

²⁵ В полу́нощи же Па́вел и Си́ла моля́щася поя́ста Бо́га, послу́шаху же их ю́зницы.

²⁶ Внеза́пу же трус бысть ве́лий, я́ко поколеба́тися основа́нию темни́чному, отверзо́ша же ся а́бие две́ри вся, и всем ю́зы ослабе́ша.

²⁷ Возбу́ждься же темни́чный страж, и ви́дев отве́рсты две́ри темни́цы, извле́к нож, хотя́ше себе́ уби́ти, мня избе́гша ю́зники.

²⁸ Возгласи́ же гла́сом ве́лиим Па́вел, глаго́ля: ничто́же сотвори́ себе́ зла, вси бо есмы́ зде.

²⁹ Проси́в же свещи́, вскочи́, и тре́петен быв, припаде́ к Па́влу и Си́ле.

³⁰ И изве́д их вон, рече́: госпо́дие, что ми подоба́ет твори́ти, да спасу́ся?

³¹ О́на же реко́ста: ве́руй в Го́спода Иису́са Христа́, и спасе́шися ты и весь дом твой.

³² И глаго́ласта ему́ сло́во Госпо́дне, и всем и́же в дому́ его́.

³³ И пое́м я́ в той же час но́щи, измы́ от ран, и крести́ся сам и свои́ ему́ вси а́бие.

³⁴ Введ же я́ в дом свой, поста́ви трапе́зу, и возра́довася со всем до́мом свои́м, ве́ровав Бо́гу.

³⁵ Дню же бы́вшу, посла́ша воево́ды па́личники, глаго́люще: отпусти́ челове́ка о́на.

³⁶ Сказа́ же темни́чный страж словеса́ сия́ Па́влу, я́ко посла́ша воево́ды, да отпуще́на бу́дета: ны́не у́бо изше́дша, иди́та с ми́ром.

³⁷ Па́вел же рече́ к ним: би́вше на́ю пред людьми́, неосужде́нна челове́ка Ри́млянина су́ща, всади́ша в темни́цу, и ны́не о́тай изво́дят на́ю? Ни у́бо, но да прише́дше са́ми изведу́т на́ю.

³⁸ Сказа́ша же па́личницы воево́дам глаго́лы сия́: и убоя́шася слы́шавше, я́ко Ри́млянина еста́.

³⁹ И прише́дше умоли́ша их и изве́дше моля́ху изы́ти из гра́да.

⁴⁰ Изше́дша же из темни́цы приидо́ста к Лиди́и, и ви́девша бра́тию, уте́шиста их и изыдо́ста.

Глава 17

¹ Преше́дша же Амфипо́ль и Аполло́нию, внидо́ста в Солу́нь, иде́же бе со́нмище Иуде́йское.

² По обы́чаю же своему́ Па́вел вни́де к ним и по суббо́ты три стяза́шеся с ни́ми от Писа́ний,

³ Сказу́я и предлага́я им, я́ко Христу́ подоба́ше пострада́ти и воскре́снути от ме́ртвых, и я́ко Сей Иису́с, Его́же аз пропове́даю вам, есть Христо́с.

⁴ И не́цыи от них ве́роваша и приложи́шася к Па́влу и Си́ле, от чести́вых Е́ллин мно́жество мно́го и от жен благоро́дных не ма́ло.

⁵ Зазре́вше же непоко́ршиися Иуде́е и прие́мше крамо́льники не́кия му́жи злы́я, и собра́вше наро́д, мо́лвяху по гра́ду, наше́дше же на дом Иассо́нов, иска́ху их извести́ к наро́ду.

⁶ Не обре́тше же их, влеча́ху Иассо́на и не́кия от бра́тий ко градонача́льником, вопию́ще, я́ко и́же разврати́ша вселе́нную, си́и и зде приидо́ша,

⁷ И́же прия́т Иассо́н. И си́и вси проти́вно веле́нием ке́саревым творя́т, царя́ глаго́люще ино́го бы́ти, Иису́са.

⁸ Смято́ша же наро́д и градонача́льники слы́шащия сия́.

⁹ Взе́мше же дово́льное от Иассо́на и от про́чих, отпусти́ша их.

¹⁰ Бра́тия же а́бие в нощи́ отсла́ша Па́вла и Си́лу в Бе́рию, и́же прише́дша, идо́ша в собо́р Иуде́йский.

¹¹ Си́и же бя́ху благоро́днейши живу́щих в Солу́не, и́же прия́ша сло́во со всем усе́рдием, по вся дни разсужда́юще Писа́ния, а́ще суть сия́ та́ко.

¹² Мно́зи у́бо от них ве́роваша, и от е́ллинских жен благообра́зных и муже́й не ма́ло.

¹³ И я́ко уве́даша и́же от Солу́ня иуде́е, я́ко и в Бе́рии пропове́дася от Па́вла сло́во Бо́жие, приидо́ша и та́мо дви́жуще и смуща́юще наро́ды.

¹⁴ А́бие же тогда́ бра́тия отпусти́ша Па́вла ити́ на помо́рие, оста́ста же Си́ла и Тимофе́й та́мо.

¹⁵ Провожда́ющии же Па́вла ведо́ша его́ да́же до Афи́н, и прие́мше за́поведь к Си́ле и Тимофе́ю, да я́ко скоре́е прии́дут к нему́, изыдо́ша.

¹⁶ Во Афи́нех же жду́щу их Па́влу, раздража́шеся дух его́ в нем зря́щем и́дол полн сущь град.

¹⁷ Стяза́шеся же у́бо на со́нмищи со иуде́и и с чести́выми, и на то́ржищи по вся дни с приключа́ющимися.

¹⁸ Не́цыи же от епику́р и от сто́ик филосо́ф стяза́хуся с ним, и не́цыи глаго́лаху: что у́бо хо́щет суесло́вивый сей глаго́лати? Ини́и же: чужди́х бого́в мни́тся пропове́дник бы́ти, я́ко Иису́са и воскресе́ние благовествова́ше им.

¹⁹ Пое́мше же его́, ведо́ша на ареопа́г, глаго́люще: мо́жем ли разуме́ти, что но́вое сие́ глаго́лемое тобо́ю уче́ние?

²⁰ Стра́нна бо не́кая влага́еши во ушеса́ на́ша, хо́щем у́бо разуме́ти, что хотя́т сия́ бы́ти?