Новый Завет (на цсл., гражданский шрифт, с ударениями)

³ Тогда́ пости́вшеся и помоли́вшеся и возло́жше ру́ки на ня, отпусти́ша их.

⁴ Сия́ у́бо по́слана бы́вша от Ду́ха Свя́та, снидо́ста в Селевки́ю, отту́ду же отплы́ша в Кипр.

⁵ И бы́вше в Салами́не, возвеща́ста сло́во Бо́жие в со́нмищах Иуде́йских, име́ста же и Иоа́нна слугу́.

⁶ Проше́дша же о́стров да́же до Па́фа, обрето́ста не́коего му́жа волхва́ лжепроро́ка Иуде́анина, ему́же и́мя Вариису́с,

⁷ И́же бе со анфипа́том Се́ргием Па́влом, му́жем разу́мным. Сей призва́в Варна́ву и Са́вла, взыска́ услы́шати сло́во Бо́жие.

⁸ Сопротивля́шеся же и́ма Елли́ма волхв, [та́ко бо сказу́ется и́мя его́,] иски́й разврати́ти анфипа́та от ве́ры.

⁹ Савл же, и́же и Па́вел, испо́лнися Ду́ха Свя́та, и воззре́в нань,

¹⁰ Рече́: о, испо́лненне вся́кия льсти и вся́кия зло́бы, сы́не диа́воль, вра́же вся́кия пра́вды, не преста́неши ли развраща́я пути́ Госпо́дни пра́выя?

¹¹ И ны́не, се рука́ Госпо́дня на тя, и бу́деши слеп, не ви́дя со́лнца до вре́мене. Внеза́пу же нападе́ нань мрак и тма, и осяза́я иска́ше вожда́.

¹² Тогда́ ви́дев анфипа́т бы́вшее, ве́рова, дивя́ся о уче́нии Госпо́дни.

¹³ Отве́зшеся же от Па́фа, Па́вел и су́щии с ним, приидо́ша в Перги́ю Памфили́йскую. Иоа́нн же, отлучи́вся от них, возврати́ся во Иерусали́м.

¹⁴ Они́ же, проше́дше от Перги́и, приидо́ша во Антиохи́ю Писиди́йскую, и вше́дше в со́нмище в день суббо́тный, седо́ша.

¹⁵ По чте́нии же зако́на и проро́к, посла́ша нача́льницы со́нмища к ним, глаго́люще: му́жие бра́тие, а́ще есть сло́во в вас утеше́ния к лю́дем, глаго́лите.

¹⁶ Воста́в же Па́вел и помаа́в руко́ю, рече́: му́жие изра́ильтяне и боя́щиися Бо́га, услы́шите.

¹⁷ Бог люде́й сих избра́ отцы́ на́ши и лю́ди вознесе́ в прише́льствии в земли́ Еги́петстей, и мы́шцею высо́кою изведе́ их из нея́.

¹⁸ И до четы́редесяти лет препита́ их в пусты́ни.

¹⁹ И низложи́в язы́к седмь в земли́ Ханаа́нстей, даде́ им в насле́дие зе́млю их.

²⁰ И по сих, я́ко лет четы́реста и пятьдеся́т, даде́ им судии́ до Саму́ила проро́ка.

²¹ И отту́ду проси́ша царя́, и даде́ им Бог Сау́ла сы́на Ки́сова, му́жа от коле́на Вениами́нова, лет четы́редесять.

²² И преста́вль его́, воздви́же им Дави́да в царя́, ему́же и рече́ свиде́тельствовав: обрето́х Дави́да сы́на Иессе́ова, му́жа по се́рдцу Моему́, и́же сотвори́т вся хоте́ния Моя́.

²³ От сего́ се́мене Бог по обетова́нию воздви́же Изра́илю спасе́ние Иису́са.

²⁴ Пропове́давшу Иоа́нну пред лице́м вни́тия Его́ креще́ние покая́ния всем лю́дем изра́илевым.

²⁵ И я́коже скончава́ше Иоа́нн тече́ние, глаго́лаше: кого́ мя непщу́ете бы́ти, несмь аз, но се гряде́т по мне, Ему́же несмь досто́ин разреши́ти реме́нь сапогу́ Его́.

²⁶ Му́жие, бра́тие, сы́нове ро́да Авраа́мля, и и́же в вас, боя́щиися Бо́га, вам сло́во спасе́ния Сего́ посла́ся.

²⁷ Живу́щии бо во Иерусали́ме и кня́зи их сего́ не разуме́вше, и гла́сы проро́ческия, по вся суббо́ты что́мыя, осуди́вше Его́, испо́лниша.

²⁸ И ни еди́ныя вины́ сме́ртныя обре́тше, проси́ша у Пила́та уби́ти Его́.

²⁹ Я́коже сконча́ша вся, я́же о Нем пи́сана, сне́мше с дре́ва, положи́ша во гро́бе.

³⁰ Бог же воскреси́ Его́ от ме́ртвых.

³¹ И́же яви́ся на дни мно́ги совозше́дшим с Ним от Галиле́и во Иерусали́м, и́же ны́не суть свиде́телие Его́ к лю́дем.

³² И мы вам благовеству́ем обетова́ние, бы́вшее ко отце́м, я́ко сие́ Бог испо́лнил есть нам, ча́дом их, воздви́г Иису́са.

³³ Я́коже и во псалме́ второ́м пи́сано есть: Сын Мой еси́ Ты, Аз днесь роди́х Тя.

³⁴ А я́коже воскреси́ Его́ от ме́ртвых, не ктому́ хотя́ща возврати́тися во истле́ние, си́це рече́: я́ко дам вам преподо́бная Дави́дова ве́рная.

³⁵ Те́мже и в друго́м глаго́лет: не да́си Преподо́бному Твоему́ ви́дети истле́ния.

³⁶ Дави́д бо у́бо своему́ ро́ду послужи́в, Бо́жиим сове́том у́спе, и приложи́ся ко отце́м свои́м, и ви́де истле́ние.

³⁷ А Его́же Бог воздви́же, не ви́де истле́ния.

³⁸ Ве́домо у́бо да бу́дет вам, му́жие бра́тие, я́ко Его́ ра́ди вам оставле́ние грехо́в пропове́дается; и от всех, от и́хже не возмого́сте в зако́не Моисе́ове оправди́тися,

³⁹ О сем всяк ве́руяй оправда́ется.

⁴⁰ Блюди́те у́бо, да не прии́дет на вас рече́нное во проро́цех:

⁴¹ Ви́дите, неради́вии, и чуди́теся, и у́зрите и исче́знете: я́ко де́ло Аз соде́лаю во дни ва́шя, ему́же не и́мате ве́ровати, а́ще кто пове́сть вам.

⁴² Исходя́щим же им от со́нмища Иуде́йска, моля́ху язы́цы в другу́ю суббо́ту глаго́латися им глаго́лом сим:

⁴³ Разше́дшуся же собо́ру, после́доваша мно́зи от Иуде́й и чести́вых пришле́ц, Па́влу и Варна́ве, и́же глаго́люще им, увеща́ху их пребыва́ти в благода́ти Бо́жией.

⁴⁴ Во гряду́щую же суббо́ту ма́ло не весь град собра́ся послу́шати сло́ва Бо́жия.

⁴⁵ Ви́девше же Иуде́и наро́ды, испо́лнишася за́висти и вопреки́ глаго́лаху глаго́лемым от Па́вла, сопроти́в глаго́люще и хуля́ще.

⁴⁶ Дерзну́вша же Па́вел и Варна́ва реко́ста: вам бе ле́по пе́рвее глаго́лати сло́во Бо́жие: а поне́же отверго́сте е́ и недосто́йны творите́ са́ми себе́ ве́чному животу́, се обраща́емся во язы́ки.

⁴⁷ Та́ко бо запове́да нам Госпо́дь: положи́х Тя во свет язы́ком, е́же бы́ти Тебе́ во спасе́ние да́же до после́дних земли́.