«Повесть временных лет» как исторический источник

1. И у Ярополка жена грекини бе, и бяше была черницею, юже бе привелъ отець его Святославъ, и въда ю за Ярополка, красоты деля лица ея [Ип., 63, 6485/977 г.].	1. Сего мати преже бе чьрницею, гръкыни сŷщи, и поялъ ю бе Яропълкъ, брат Володимирь, и ростригъ ю красоты деля лица ея [Усп. сб., с.43].
2. Володимиръ же залеже жену братьню грекиню, и бе непраздна, от нея же роди Святополка ‹…› темьже и отець его не любяше, бе бо отъ двою отцю [Ип., 66, 6488/980 г.].	2. Володимиръ же поганъи еще ŷбивъ Ярополка и поятъ женŷ его непраздьнŷ сŷщу, отъ нея же роди ся сий оканьный Святополк, и бысть отъ дъвою [от]цю и братŷ сŷщю, темь же и не любляаше его Володимиръ [Усп. сб., с.43].
3. Ŷмре же Володимиръ князь великый на Берестовъмь, и потаиша и, бе бо Святополкъ в Кыеве, и нощью же межи клетми проимавъше помостъ, въ ковре опрятавши и ужи свесиша на землю възложиша и на сани и везоша его, и поставиша и въ святей Богородици церкви, юже бе самъ создал [Ип., 115, 6523/1015 г.].	3. И се приде вестьникъ к немŷ поведая емŷ отчю съмрьть ‹…› и како Святополкъ потаи съмьрть отца своего, и ночь проимавъ помостъ на Берестовемь и в ковъръ обьртевъши съвесивъше ŷжи на землю, везъше на саньхъ, поставиша и въ церкви святыя Богородица [Усп. сб., с. 44].
4. Святополкъ же седе в Киеве по отци своемь, и созва кыяны, и нача имение имь даяти; а они приимаху, и не бе сердце ихъ с нимь [Ип., 118].	4. Святополкъ же седя Кыеве по отци, призвавъ кыяны, многи дары имъ давъ, отпŷсти [Усп. сб., с.46].
5. Реша ему дружина отня: се дружина ŷ тебе отня и вои; поиди, сяди в Кыеве на столе отне; он же рече: не буди то мне вьзняти рукы на брата стареишаго; аще отец ми умре, то сей ми будеть в отца место; и се слышавше вои, и разиидошася отъ него [Ип., 118].	5. И реша къ немŷ дрŷжина: поиди, сяди Кыеве на столе отни, се бо вси вои въ рŷку твоею сŷть. Онъ же имъ отъвещааваше: не бŷди ми възяти рŷкы на брата своего и еще же и на стареиша мене: его же быхъ имелъ аки отца. Си слышавъше вои разидоша ся от него [Усп. сб., с. 46].
6. Святополкъ же приде нощью к Вышегороду, и отай призва Путшю и вышегородьскыя боярьце, и рече имъ: прияете ли ми всимъ сердцем; И рече Путьша: можемъ головы свое с вышегородци положите за тя; он же рече имъ: не поведаючи никомуже, шедше ŷбиите брата моего Бориса [Ип., 118–119].	6. Пришедъ Вышегородŷ ночь отай призъва Пŷтьшю и вышегородьскые мŷже и рече имъ: поведите ми по истине, приязньство имеете ли къ мне. Пŷтьша рече: вьси мы можемъ главы своя положити за тя. ‹…› И отъвьрзъ пресквьрньая ŷста рече испŷсти зълый гласъ Пŷтьшине чади: аще ŷбо главы своя обещасте ся положити за мя, шедъше ŷбо братия моя отай, къде обрящете брата моего Бориса, съмотрьще время ŷбити [Усп. сб., с. 46].
7. И се нападоша на нь, акы зверье дивии около шатра, и насунуша его копьи, и прободоша Бориса и слугу его, падша на немь, прободоша с нимь: бе бо сьи любимъ Борисомъ; бяше бо отрокъ сь родомъ ŷгрин, именемь Георгии, его же любляше по велику Борисъ, бе бо възложи на нь гривьну злату [Ип., 120].	7. И без милости прободено бысть чьстьное и многомилостивое тело святого и блаженааго Христова страстотьрпьца Бориса насŷнŷша копии оканьнии Пŷтьша, Тальць, Еловичь, Ляшько. Видевъ же отрокъ его, вьрже ся на тело блаженааго, рекый: да не останŷ тебе господине мой драгый ‹…› Бяше же сь родъмь ŷгрин, имьньмь же Георгий, и беаше възложилъ на нь гривьнŷ златŷ и бе любимъ Борисъмь паче меры [Усп. сб., с. 48].
8. Бориса же ŷбивше оканьнии, ŷвертевше и в шатеръ, и вьзложиша и на кола, повезоша, и еще дышющу ему; и ŷвидивьше се оканьный Святополкъ, и яко еще ему дышющу, и посла два варяга приконьчевати его; онема же пришедшима видевшима, яко ему еще живу сущю, и един ею извлекъ мечь и проньзе и въ сердце; и тако скончася блаженный Борис, приимь венець от Христа Бога с праведными, причтеся сь пророкы и съ апостолы, и с лики мученичьскыми въдворяяся, Авраму на лоне почивая, видя неизречьньную радость, вьспевая съ ангелы и веселяся с ликы святыхъ; и положиша тело его, принесше отай Вышегороду, въ Церкви святого Василия; оканьнии же ŷбийци придоша къ Святополку, аки хвалу имуще, безаконьници; суть же имена симъ законопреступникомъ: Путьша, Талець, Еловичь, Ляшько, отець же ихъ сотона [Ип., 120–121].	8. Блаженааго же Бориса обьртевъше въ шатьръ възложивъше на кола повезоша, и яко быша на борŷ начать въскланяти святŷю главŷ свою, и се уведевъ Святопълкъ пославъ два варяга и прободоста ѝ мечьмь въ сердце, и тако съконьча ся и въсприятъ не ŷвядаемый веньць, и положиша тело его принесмъше Вышегородŷ, ŷ церкве святааго Василия въ земли погребоша [Усп. сб., с. 50].
9. С лестью посла къ Глебу, глаголя сице: пойди вборьзе, отець тя зоветь, не здоровить бо вельми [Ип., 122].	9. Посла по блаженааго Глеба, рекъ: приди въборзе, отець зоветь тя и не съдравить ти вельми [Усп. сб., с. 50].
10. И пришедшю ему на Волгу, на поле, потъчеся под нимь конь въ рве, и наломи ему ногу мало; и приде ко Смоленьску, и поиде оть Смоленьска, яко зреима, и ста на Смядини в корабли; в се же время пришла бе весть от Передьславы къ Ярославу о отни смерти, и посла Ярославъ къ Глебу, глаголя: не ходи; отець ти ŷмерлъ, а брать ти убить оть Святополка [Ип., 122].	10. И пришедъ на Вългŷ на поле потъче ся подъ нимъ конь въ рове, и наломи ногŷ малы, и яко приде Смолиньскŷ и поиде отъ Смолиньска яко зьреимъ едино, ста на Смядине въ кораблици. И въ се время пришьла бяаше весть от Передъславы къ Ярославŷ о отьни съмьрти, и присла Ярославъ къ Глебŷ, река: не ходи брате, отець ти ŷмьрлъ, а брать ти ŷбиенъ от Святопълка [Усп. сб., с. 50].
11. Оканьный же Горясеръ повеле вборзе зарезати Глеба; поваръ же Глебовъ, именемь Торчинъ, выньзъ ножь, зареза Глеба, аки агня непорочно [Ип., 123].	11. Тъгда оканьный Горясеръ повеле зарезати ѝ въ бръзе, поваръ же Глебовъ, именьмь Търчинъ, изьмъ ножь и имъ блаженааго и закла ѝ, яко агня непорочьно и безлобиво [Усп. сб., с. 53].
12. Они же окаяннии вьзвратишася вьспять, якоже рче Давид: възвратишася грешници въ адъ; и пакы: оружье изьвлекоша грешници, и напрягоша лукы своя истреляти нища и убога, заклати правыя сердцемъ; и оружье ихъ внидетъ въ сердца ихъ, и луци ихъ сокрушаться; яко грешници погибнуть; изьщезающе, яко дымъ погибьнуть; онемъ же пришедшимъ и поведавшимъ Святополку: яко сотворихомъ повеленое тобою; он же се слыша, и възвеселися сердце его болма, и не веды Давида, глаголюща: что ся хвалиши о злобе, силный, и безаконье ŷмысли языкъ твой [Ип., 123–124].	12. Оканьнии же они ŷбоице възвративъше ся къ пославъшюŷмŷ я, яко же рече Давид: възвратять ся грешьници въ адъ и вьси забывающии Бога. И пакы: орŷжие звлекоша грешьници напрягоша лŷкъ свои за клати правыя сьрдьцьмь и орŷжие ихъ вънидеть въ сердца, и лŷци ихъ съкрŷшать ся, яко грешьници погыбънŷть. И яко съказаша Святопълкŷ яко сътворихомъ повеленое тобою. И си слышавъ възнесе ся срьдьцьмь и събысть ся реченое псалмопевьцемь Давидъмъ. Чьто ся хвалиши сильныт о зълобе, безаконие въ сь день неправьдŷ ŷмысли языкъ твои [Усп. сб., с. 53].
13. Глебу же ŷбьену и повержену бывшю на брезе межи двеима кладома; по сем же вьземше и везоша ѝ, и положиша ѝ ŷ брата своего Бориса, ŷ церькви святого Василья [Ип., 124].	13. Ŷбиенŷ же Глебови и повьрженŷ на пŷсте месте межю дьвема колодама [Усп. сб., с. 53].