«Повесть временных лет» как исторический источник

«Приде Святополк с печенегы в силе тяжце, и Ярославъ собра множьство вои, и изыде противу ему на Алъто [Льто]; Ярослав же ста на месте, идеже убиша Бориса,	«Трьклятый прииде съ множьствъмь печенегъ и Ярославъ съвъкŷпивъ воя, изиде противŷ емŷ на Льто и ста на месте, идеже бе ŷбиенъ святый Борисъ.
и вьздевъ руце на небо и рече: кровь брата моего вопиеть къ тобе, Владыко, мьсти от крови праведною сею, якоже мьстилъ еси отъ крови Авелевы, положивъ на Каине стенанье и трясение; тако положи на семь;	И въздевъ рŷце на небо и рече: се кровь брата моего въпиеть къ тебе, Владыко, яко же и Авелевава преже, и ты мьсти его, яко же и на ономъ положи стонание и трясение на братоŷбийци Каине. Ей молю тя, Господи, да въсприимŷть противŷ томŷ.
и помолился рекъ: брата моя, аще есте отсюду теломъ отошла, но молитвою помозита ми на противнаго сего убийцю гордаго;	Аще и телъмь ошьла есте, нъ благодатию жива еста и Господеви предъстоита, и молитвою помозета ми.
и се ему рекшю, и поидоша противу собе, и покрыша поле Лядьское обои от множества вой.	И си рекъ и поидоша противŷ собе, и покрыша поле Льтьское множьствъмь вои,
Бе же пятокъ тогда; всходящу солнцю, и совокупишася обои, и бысть сеча зла, аки же не бывала в Руси, и за рукы емлюще сечахуся; и соступишася трижды, яко по удольемь кръви тещи, и къ вечеру одоле Ярославъ, а Святополкъ побежа;	и състŷпиша ся въсходящю солнцю. И бысть сеча зла отинŷдь, и състŷпаша ся тришьды, и биша ся чересъ день весь, и уже къ вечерŷ одоле Ярославъ, а сь оканьныии Святопълкъ побеже,
бежащу же ему, и нападе на нь бесъ, и раслабеша кости его, и не можаше седети на кони, и ношахуть ѝ въ носилахъ;	и нападе на нь бесъ, и раслабеша кости его, яко не мощи ни на кони седети, и несяхŷть его на носилехъ.
и принесоша его кь Берестью, бегающе с нимь, он же глаголаше: побегаете со мною, а се женуть по насъ;	И прибегоша Берестию съ нимь, он же рече: побегаете, осе женŷть по насъ.
отроци же его посылаху противу: егда кто поженеть по немь; и не бе никого же вьследъ женущего с нимь; онъ же в немощи лежа, и вьсхапися глаголаше: о, се женуть, оно женуть, побегнете;	И посылахŷть противŷ, и не бе ни гонящаа го ни женŷщааго въ следъ его. И лежа в немощи въсхопивъ ся глаголааше: побегнемы еже женŷть, охъ мне.
и не можаше стерпети на единомъ месте, и пробеже Лядьскую землю, гонимъ гневомъ Божиимъ, и пробеже в пустыню межи чяхы и ляхы, и ту испроверже живот свой зле;	И не можааше тьрпети на единомь месте, и пробеже Лядьскŷ землю, гонимъ гневъмь Божиемь. И прибеже въ пŷстыню межю чехы и ляхы, и тŷ испроврьже животь свои зъле,
его же и по правде, яко неправедна, суду пришедшу, по отшествии сего света прияша муку оканьнаго: показываше яве посланая пагубная рана, въ смерть немилостивно вьгна, и по смерти вечно мучимъ есть и связанъ;	и приять възмьздие отъ Бога, яко же показа ся посъланая на нь пагŷбная рана, и по съмьрти мŷкŷ вечьнŷю. И тако обою животŷ лихованъ бысть. И сьде не тъкъмо княжения, нъ и живота гонезе, и тамо не тъкъмо царствия небеснааго и еже съ ангелы жития погреши, нъ и мŷце и огню предасть ся.
есть же могила его в пустыни той и до сих дний [сего дне], исходить же оть ней смрадъ золъ; се же Богъ показа на показание княземь рускымъ, да аще сицево створять, се слышавше бе, ту же казнь приимуть, но больши сея, понеже се ведуще бывшее, творити таково же зло братоубийство; 7 бо мьстий прия Каинъ, убивъ Авеля, Ламехъ 70, понеже бо Каинъ не веды мьщьния прията оть Бога, а Ламехъ веды казнь, бывшюю на прародителю его, створи убийство» [Ип., 131–133].	И есть могыла его и до сего дне, и исходить оть нее смрадъ зълый на показание человекомъ, да аще кто си сътворить, слыша таковая, си же прииметь и вящьша сихъ, яко же Каинъ не ведый мьсти прията и единŷ прия, а Ламехъ зане ведевъ на Каине темь же седмьдесятицею мьсти сия емŷ» [Усп. сб., с. 54–55].