Русский Мисопогон. Петр I, брадобритие и десять миллионов «московитов»

Сим трием Собором и прочим, прежде сих бывшим, и мерность наша всесоборне последует. И яже они о брадобрийцах и тафионосцах изрекоша, таяжде и мы изрицаем[1116], яко глаголет в книзе «О судех святителских»: престати молю от таковаго несмыслства[1117]. Аще кто прежде нашего увещания и наказания поползнеся в сицевое неистовство[1118], аще бы и не было о сем от святых отец и Синодов определенно написано, и тако подобаше (Л. 442) хранити обычай Святыя Церкве непоколеблен (и неписаныя бо законы[1119] повелеся[1120] хранити опасно, колми паче[1121] написаная, и утвержденая, и узаконеная, преданная[1122] святых отец[1123] Соборами, паче же самем Богом заповеданая подобает всеконечно блюсти), – внемлите, молю! Се отвсюду показася грех сей тяжчайш и богопротивен: и от самаго Бога творения, и заповедания, и святых апостол завещаний[1124], и святаго [В]селенскаго Шестаго Синода запрещения, и от увещаний по особно от святых богодухновенных отец, Духом Святым вещавших, и святейших [В]селенских патриархов, Местных Соборов, и зде, в Велицей России, святейших патриархов с благочестивыми цари и прочими архиереи бывшими соборы, брадобрийцы и тафионосцы отлучению[1125] предавших, и по смерти помяновения отчюждивших, и с неверными таковыя причтавших[1126]. Кое ино болше сего наказание и увещание кто востребует? Или творяй сицевый смертный и богопротивный грех откуду[1127] инуду[1128] помощь[1129] и ползу души своей (Л. 442 об.) взыщет, токмо[1130] от[1131] еже всеконечно престати от таковаго пребеззакония[1132] и умилостивити всеблагаго Бога слезами, и моленми, и иными благодеянми, паче же послушанием безпрекословным к Святей Божией Церкви и к отцем своим[1133] духовным? Еще со всеусердием слезно прошу: аще хощете искренно нарицатися мужие, а не мужежены[1134], поне отныне престаните вид мужеобразный Богоукрашенный тлити, рекше брити или стрищи брады! Не бывайте прочее явлени блудницы женообразныя, на прелесть блуда творящеся, паче же на скареднейшее содомство издаюшеся! Постыдитеся своея[1135] совести, обличающия вы! Аще бо стрижете брады ваша, и украшаете себе чюждими накладными женовидными[1136] власы плетеными[1137], и инако многоухищреньми творяще себе самыя женообразны, возимате некогда по нраву жен блудниц и лица ваша натирати разными шары и вонями, (Л. 443) ко угождению мерзкия[1138] скверныя сласти блудныя! Не срамляетеся ли убо о сии, деемаго вами противно Богу и закону Его, и противу Соборов, и изречением святых мужей чудоделателей и мудрых учителей? Не рдитеся ли, и чермнеетеся, и закрываетеся от стыда, слышаще сия святых[1139] словеса, совести вашей обличающей вы? Аще бо и мнитеся кии вас от сего честни, и лепи, и благообразни быти, истинно безчестни есте, и гнусни, и злообразни и пред Богом, и человеки[1140], аще в том пребудете. Аще же истинно слова Божия от мерности нашея и от отцев ваших духовных, глаголемаго к вам, послушаете, и от того гнуса власоращения, и брадобрития, и тафионошения престанете, от нанесеных вам прежде бывшими Соборы архиерейскими и нашею мерностию[1141] запрещений и отлучений свободни будете. И будете истиннии православнии христиане, сынове Святыя Церкве. И, прежде содеяная злая покаянием истинным очистивше, не токмо муки избудете, но и наследницы будете Небеснаго Царствия.

(Л. 443 об.) Не послушая же увещания сего и прошения мерности нашея, аще отселе впрочее начнет кто[1142] противное деяти, за прещением от самаго Бога, и святых апостолов, и[1143] отец соборне и по особне изреченным[1144], мы таковаго погибели не винни[1145]: еже бо[1146] должни бехом сотворити – сотворихом, долг свой отдахом, слово Божие возвестихом – сие убо есть наш долг. Кийждо же сам о себе узрит в час исхода души своея и в День Страшнаго Суда Божия и воздаяния, комуждо по делом его. Непослушания бо сынове – сынове суть погибели, на няже, по святому апостолу, грядет гнев Божий[1147].