Том 10 (XVI век, литература «государственного устроения»)

А приходъ ихъ — перьвое, пришьли во Египетъ к папе[102] и патриарху Иакиму александрийскому[103] и начаша ему о государи цари и великого князя здравии сказывати: «Благоверный и христолюбивый царь и великий князь Иван Васильевичь всеа Русии здравствуетъ, отче». Такоже и о благоверной царицы и великой княгини Анастасии и о царевичехъ — о Иваньне и о царевиче Феодоре. Воспроси же насъ о митрополите. Мы же о митрополите рекохомъ ему: «Макарей, митрополитъ великого града Москвы и всеа Русии, велел тобе, святейшему папе и патриарху Иакиму, челом ударити». И поклонихомся до земля. Онъ же рекъ намъ: «Какъ Богъ милуетъ брата нашего Макария, митрополита всеа Русии, и како церьковъ Христову пасетъ и словесное стадо?» — Мы же отвещахомъ ему: «Молитвами вашими здравствуетъ о Христе и церьковъ Христову хранитъ целу и непорочну». И вземъ у насъ пречестный образ и шубу.[104] И благослови насъ своимъ благословением, и вели к собе кресло принести и насъ, возле собя велел поставити кресло, понеже в полате его лавокъ нетъ, а среда наслана ковры шолковыми. Самъ же сяде и намъ велелъ сесьти возле собя. И емъ насъ за руку и велел толмачю говорити[105]: «Подобает де намъ спрашивати васъ про вашу веру православную и о Божиихъ церквах стоячи. И вы де на меня не позазрите в томъ, занеже немощен есмъ вельми, 19 дней лежал есьми на одре своемъ, а ныне, мню, Богъ мя от одра воздвиг вашего ради пришестьвия». Мы же ему поклонихомся до земли и рекохом ему: «Вашими святыми молитвами миръ стоитъ». И нача насъ вопрошати о строении нашего царьства. Мы же ему вси истинну поведахомъ, и како нашему государю покоришася многие царьства иноверныхъ,[106] и государь велелъ в техъ царьствах святые церкви устроити и провославие. И онъ возревъ на образъ, прекрестися и посмотревъ печати царьские и воспроси нас: «Благоверный, де, царь на сей печати на коне?»[107] Мы же рекохомъ ему: «На кони, государь». Он же воставъ с кресла и поклонися до земли Пречистые образу, ото очию же его слезы вельми течаху. И глаголюще: «Укрепи, Господи, православного царя!». Мы же зряще на Пречестъные его образ, не могохомъ удерьжатися от слез. И глаголюще к намъ: «В нашихъ, де, в греческихъ книгахъ пишетъ, яко востанетъ царь от восточныя страны православной и покоритъ ему Богъ многие царьства.[108] И будетъ имя его славно от востока и до запада, якоже и древняго царя Олександра Макидонского.[109] И сядетъ на престоле града царьствующаго, да и мы же избавлени будемъ его рукою от безбожных турков». И повеле сести и вопрошаше нас: «Како в вашей стране во святыхъ церквахъ соверьшаетца божественное пение?[110] И како крестьяне живутъ? И како церкви стоятъ?»

Мы же ему вся исповедахомъ: «Есть, государь, у нашего государя в Московском царьстве святыхъ церквей безчисленно много, а пение в нихъ божестьвенное по вся дни не во едино время, но вся часы. Есть, господине, церькви ружьные,[111] что поютъ в нихъ на перьвом часу утреньнюю божественную литурьгию, а в ыныхъ утреньную с полунощи, а литурьгию на третьемъ часу дни, а в ыных утреньнюю пред зарею, а литурьгию на четвертом часу дни и на пятом, а вечерьню потому же и рано и поздно». Он же отвеща намъ: «Богъ да благословитъ и укрепитъ вашего государя царя и царевичей, и их царьства; миром оградитъ давшего вамъ таковую благодать славити собя на земли безпрестанно. Ангелы бо его на небесех славятъ непрестанно, а вы на земли».

И еще нас вопрошаетъ: «Есть ли в вашей земли, в государстве царьстве иноверных — жидове, и бусормане, и еретицы, и ковти, и арьмены,[112] и протчая ихъ проклятая вера — ересь? Живут ли домами своими?» Мы же рекохомъ: «Никако, владыко. У нашего государя в царьстве жилища имъ нетъ. Жидомъ государь и торговать не велитъ[113] впускать во свою землю». Он же воставъ со престола, сотвори молитву и поклонися до земля и рече: «Богъ да проститъ царя, государя и великого князя Ивана Васильевича всеа Русии и его царевичевъ Иванна и Феодора, что отогнали пребеззаконных жидовъ, аки волковъ, от стада Христова». И рече к намъ: «Мы, братие, нарицаемся крестияне. А от нихъ велие нужды терьпим имени ради Христова». И нача плакати вельми. Мы же зряще на него, пречестный образ, не могохомъ удерьжатися от слезъ и молихомъ его со слезами, дабы намъ на пользу изрекъ свои крестьянскии нужи. Онъ же поседевъ мало и нача намъ сказывати толмачом старцомъ Моисеомъ Савина монастыря.[114]

Был де во Египте царь греческий, имя ему Гаврилъ,[115] а неверием турчанинъ; а на крестьянъ золъ добре, злее нынешнихъ турковъ. А у него былъ братъ жидовин, хитръ добре. Дивно же исповедати о преславномъ папе олександрийском Иакиме и о его терьпении.[116]