Том 10 (XVI век, литература «государственного устроения»)

Святейший же патриархъ приим чашу и прослезися в той часъ и сотвори молитву; и назнаменавъ крестом чашу и дунувъ на нее, и абие отступи пена и явися в чаши вино красное. Християне же на царскомъ дворе кричаше со слезами: «Владыко, помилуй родъ християнескъ!» И нача звати: «Господи, помилуй!» И испивъ чашу до дна, и показася ему вино слаткое, хорошое. И бысть цел и невреженъ. И рече патриархъ царю: «Вели ми мало воды дати». Царь же повеле ему дати воды. Лице же его просвятися, яко солнеце. Все же начаша дивитися о красоте лица его. И принесоша ему воду. И вольяша воду в кубокъ и пополоскавъ принес к жидовину и рече ему: «Яз от твоея от добрыя веры пил смертное зелие, а ты от моея от недобрыя веры испей воду». Жидовин же не хотяше пити. Патриархъ же рече: «Царю, дай ми судъ праведенъ со жидовиномъ. Мы от его руки пили зелие, что он за неделю делал. А яз пред тобою воду влил, а не зелие». А туто много народу стоящу, и все народи кликнуша на одного жидовина. И царь ему повеле пити. И испивъ воды тое мало, и абие нача тело его пухнути. Он же побеже ис полаты в домъ свой. Царь же посла за ним яныченина[123] видети, что над ним будетъ. И за полгодины прииде ко царю яныченин и сказа: «Царю, окоянный жидовин зле животъ свой испроверьже: и розсядеся утроба его и излияся». Царь же рече: «Старче, проси у мене что хощеши, а на меня гнева не дерьжи. Не яз тебе то зелие давал; хто тебе давал, тотъ и погибе». Патриархъ же рече: «Дай мне, царю, тех християнъ, которые во Египте живутъ, чтоб яз ихъ ведал и судилъ и приставы бы по них твои не ходили, чтобъ имъ продажи не было».

Царь же отдастъ ему крестиян и грамоту ему дал. Онъ же поиде от царя. Християне же понесоша его на рукахъ своих и прославиша Бога и сотвориша трапезу великую и честьну страннымъ и убогим. И турки же от того часа начаша чтити и боятися его вельми. Святейший же патъриархъ прииде в келию свою и испадоша ему зубы от лютаго того зелия, единъ по единому, без болезьни. Старецъ же ему по вся дни печаху пресноки,[124] махкой хлеб белой, темъ его корьмятъ. И после того злаго зелия во Египте бысть патриархомъ 16 летъ.

И прииде царь Сулиманъ турский ко Египту с войскомъ из Царяграда и взя Египетъ лета 7022-го[125] и того царя Гаврила взялъ и велелъ его обесити[126] в железныхъ воротех по конец большего торгу в царьскомъ платьи.

А слышахомъ о святемъ патриархе, что он на патриаршестьве 85 летъ, а постриженикъ онъ Синайского монастыря. А в монастыре был 12 летъ, а во Иерусалиме у Гроба Господня служил три лета.[127]

Дивно же намъ поведа святый патриархъ о церькве святого Николы, что во Египте. Тотъ же царь чертиской Гаврил пребеззаконный повеле у патриарха церковъ отняти и претворити в баню себе. Патриархъ же нача скорьбети и помолися в церкви святого Николы со християны. И в ту же нощь явися царю святый Никола и взя его за горло рукою и стиснувъ и глагола ему: «Почто еси велел в моемъ дому баню сотворити? Аще ли не велиши дому моего отдати християномъ, то в другую нощь прииду погублю тя». И в тот часъ посла царь к людемъ своим и не веле тое церькви крянути, и отдаша ̀ю патъриарху. Патриархъ же служить в той церкви и до ныне.

И повеле намъ патриярхъ ехати со собою в Старой Египетъ.[128] А до Старого Египта 3 версты. И приидохомъ в Старой Египетъ с патриархомъ. И в Старомъ Египте большая церьковъ святый страстотерпецъ Георьгий, монастырь девичь. А в церькви на левой руки написанъ образъ Георьгий[129] чюдотворецъ, за решоткою за меденою. Многа же знамения и исцеления бываютъ от того образа; и исцеляше не токмо християнъ, но и туркомъ, и арапомъ, и латыномъ. Другая же церьковъ пречистыя Богородица. А иные были церкви в Старом Египте християнские: святыхъ мученикъ Серьгия и Вакха, да Успение пречистей Богородицы, да святые мученицы Варвары.[130] А нынечь теми церквами владеютъ еретики ковти. А в церьквахъ у нихъ образы и олтарь есть. А крещения у них нетъ, обрезаютца по старому закону. А Старой Египетъ нынечь пустъ, живутъ в немъ немного старых египтянъ, цыгановъ; а турки и християне не живутъ. А город былъ камен, да розвалялся, только едины врата стоятъ целы; в те врата въехала Богородица[131] со Христомъ и со Иосифомъ из Ерусалима.

И быхомъ в Старом Египте 4 дни с патриархомъ. И оттоле поидохомъ в монастырь святого Арьсения, что царския дети училъ грамоте, Аркадия и Онурия;[132] а до того монастыря 7 верстъ. Стоитъ монастырь на горе высокой на каменной, и в той горе есть пещеры каменные, где старцы живутъ отшельники. Монастырь былъ добре красен, кельи мурованые. А ныне пустъ ото араповъ.