Том 10 (XVI век, литература «государственного устроения»)

И оттоле пришед во Египетъ. И служилъ патриархъ божестьвенную литурьгию самъ у святого Николы со всемъ соборомъ. И после отпуску[133] не велел ни единому человеку изыти вонъ. И седъ у царьских дверех по правую сторону, лицем к людемъ, во всемъ сану. И нача имъ сказывати, что идетъ в Синай за государя царя Бога молити. Людие же все поклонишася ему до земли и молиша его: «Владыко, не остави насъ, прииди к намъ из Синайския горы, не останися тамо». Он же дася слово свое.

И поидохомъ с нимъ в Синайскую гору в суботу о Дьмитрееве дни.[134] И наяхомъ верьблюды до Синайские горы, а найму дали по золотому с человека. А по два человека на верьблюде, по сторонамъ, и кормъ свой и воду в мешькахъ коженыхъ на верьблюдах положиша, боле десяти пудовъ тягини; а хлеба сухово по гентарю на человека. А гентарь[135] тянетъ три пуда. А ходу до Синайския горы 12 дней, а всего от Египта до Синайския горы пустынею. А пустыни у нихъ[136] не наши: въ ихъ пустынях нетъ ни лесу, ни травы, ни людей, ни воды. И идохомъ пустынею три дни, не видехомъ ничего, только един песокъ да камень. На четьвертой и день увидехомъ Черьмное море, — то место, где Моисей провел израильтеския люди,[137] 600 000 сквозе Черьмъное море, а фараона погрузи в мори со всеми вои его. Верьхъ же воды чьрез все море 12 дорогъ знать по морю. Море же бе сине, а дороги белы по морю лежатъ, издали видеть. А какъ к морю приидешь, ино море по обычаю стоитъ лазорево. Арапи же верьблюды корьмятъ сухимъ бобомъ, а воды имъ не даша три дни.

Дивно же исповедати о преходе сыновъ израилевых сквозе Черьмъное море. Егда повеле ангелъ Господень израильтянъ из Египта извести, Моисей же взем израильтянъ иде за Нилъ реку; в день их покрываше облакъ, а в нощь столпъ огненъ светяше имъ и пред ними иде. Они же идоше день и нощь и не почая. О томъ пророкъ Давидъ написа[138]: «Не бе в коленех ихъ боляй».[139] И приидоша к морю Черьмному и возропташа на Моисея, глаголюще: «Почто еси вывел насъ в пустыню из Египта?[140] Гробов ли намъ во Египте не было? Или бы мы работали на египтянъ? А ныне где можемъ укрытися от сильныя руки фараоновы? Почто еси насъ привелъ к морю?» Моисей же рече к нимъ: «Умолкните, а не ропчите; которой Богъ велелъ васъ из Египта извести, той и сохранитъ васъ». Ту же воскрай моря гора есть высока. Моисей же вшедъ на гору помолитися, и показа ему ангелъ древо и от того древа повеле ему урезати жезлъ и тем жезломъ ударити поперегъ моря. И раступитца море, и пройдутъ сынове израилеви сквозе море. А фараон прииде воследъ их. И прославитца Богъ израилевъ о фараоне и о воехъ его.

Моисей же сошедъ з горы и повеле имъ розделитися 12-м коленомъ. И пришед к морю и удари жезломъ поперегъ моря и рече: «Во имя Господа Бога Саваофа да разступитца море, да пройдутъ сынове израилевы посуху». И абие роступися море. И удари Моисей дванадесятъ кратъ по морю, и бысть 12 дорог, и поидоша сынове израилевы, коежьдо колено своею дорогою, а фараон прииде созади ихъ и гнаша. И выидоша сынове израилеви на брегъ моря, а фараон посреди моря. Моисей же простеръ руку и удари жезломъ в длину моря: «Во имя Господа Бога Саваофа да соступитца вода!» И абие соступися вода. Моисей же на мори начертавъ прооброзова крестъ Господень; фараон же потопе в мори со всеми своими вои, а люди фараоновы обратишася рыбою; а в техъ рыб главы человеческии, а тулова у них нетъ, токмо едина глава; а зубы и носъ человечьи, а где были уши, тутъ перье; а где потылица, тутъ сталъ хвостъ; а не едятъ ихъ нихто. И кони и оружие обратишася рыбами; а на коньских рыбахъ шерьсть конская, а кожа на нихъ толста на палец.[141] А ловятъ их, да кожи снимаютъ, а тело мечютъ. А в кожахъ орапе подшвы поднучи делаютъ и с шерьстию, а воды не терьпятъ, а в сушу на годъ станутъ. А где вышли сынове израилевы из моря, и от того места кабы верстъ 5, 12 источниковъ.[142] В томъ месте сынове израилевы возропташа на Моисея, что воды нетъ, пити имъ нечево. Моисей же повеле им стати коиждо своимъ коленомъ, они же сташа кабы на дву верстах. Моисей же пришед в станы их и удари жезломъ и воскипе вода — 12 источьниковъ. Дивно же о техъ источьникехъ. Гора бысть велика песчана; песокъ великъ, до полуноги погружаетца в песку. И на той горе те источьники кипятъ кверьху, а протекши сажени з две, да опять понырли в землю. И тутъ есми себе воды взяли. И идохомъ три дни и взыдохомъ на великую гору. И на той горе сынове израилевы возроптали опять на Моисея. Моисей же удари жезломъ в гору и потече из горы река.[143] О той реки пророкъ написа: «Дастъ имъ Богъ в безводныхъ реки».[144] И оттоле идохомъ три дни и обретохомъ на дороге камень великъ, что Моисей ис того каменя источи 12 источьникъ. И ныне знать, отколе вода шьла.