Том 10 (XVI век, литература «государственного устроения»)

И абие пред зарею облечеся патриархъ во святительскую одежу и исполни всю церковъ воня благоухания — змирно и темьянъ. Патриархъ же вземъ крестъ и возгласи велегласно: «Христосъ воскрес!». И вся по ряду поюще утреньнюю. И по всемъ церквамъ и по приделомъ начнутъ утреньнюю и по времени и литурьгию. И празнуютъ неделю въсю радующеся духовне, а не телесне, не пьянствомъ.[206] А в церковъ погании турки опять запрутъ, замкнутъ и запечатаютъ. Патриархъ же оставляетъ внутрь великие церкви священника чернаго, да дьякона, да понамаря, да не останетъ старая трапеза без божестьвеннаго пения. А пищу имъ приносятъ от патриарха и подаютъ в церковъ в оконце, что на дверех церковных. А тутъ у церкви за стеною приделана патреаршеская келья, и в той кельи те люди и пребываютъ неисходимо. А на десной стране не исходя из церкви стоитъ колокольница велика и высока, на четырехъ столпехъ каменных. Под тою колокольницею стоятъ три церкви: одна Воскресение Христово, а другая — Иякова, брата Господня,[207] а третьяя — святыхъ мученикъ 40, иже в Севастии. И к темъ церквамъ приделанъ домъ патриаршеской. К божестьвенному пению патриархъ приходитъ к тем же церквамъ. На той же стране стоитъ темница на осужение повинным. В той темницы сиделъ великий пророкъ Иванъ Предотеча[208] от пребеззаконного царя Ирода.

А от великие церкви на восточную страну пошед мало стоитъ церковъ вельми чюдъна, по-еврейски зоветца Еро, а по руски Святая Святыхъ.[209] Егда созданъ святый градъ Иерусалимъ повелениемъ июдейского царя Салима и совокупиша церковъно ей имя царскимъ именемъ и нарекоша граду тому имя Ерусалимъ. А ту церковъ Соломан со июдеи[210] созидал повелениемъ ангеловомъ 45 летъ. И егда прииде Господь Исусъ Христосъ во святый градъ Иерусалимъ и рече имъ на соньмищи пред тою церковию о церкви тела его: «Разорю церковъ сию и треми деньми созижьду ̀ю».[211] Июдеи же неразумеша, что рече имъ Господь нашь, бе бо не дано имъ разумети свыше. И реша к себе июдеи: «Како можетъ разорить сию церьковъ треми деньми и создати ̀ю, а мы ею создахомъ 45 летъ?». В той же церкви заклан

был пророкъ Захария[212] межь церковию и олтаремъ. В той же церкви праведный Семионъ приятъ на руку Христа и глагола: «Ныне отпущаеши раба своего, Владыко, по глаголу твоему, с миромъ, яко видеста очи мои спасение твое, еже еси уготовал пред лицемъ всех людей твоих светъ во откровение языком и славу людей твоих и Израиля».[213]

От той же церькви близь на восточную страну, к горе Елеоньстей,[214] стоятъ врата великие железные старого града Иерусалима затворена, не входитъ в них никто. В те врата въехал Господь нашь Исусъ Христосъ от Вифания

[215] на жребцы и осли з горы Елеонъския. Дети еврейския резаху ветьвие от древесъ и постилаху по пути от техъ вратъ и до церкви, пояху пред нимъ: «Благословен грядый во имя Господне, осанна в вышьних,[216] царь Иизраилевъ!». И приеха Господь нашь к той церькви на жребцы и осли. Пред тою церьковью лежитъ пред враты камень дикой широкъ, на четыре углы. И на тотъ камень возъеха Господь нашь и позна камень Создателя своего, и ста камень под жребцомъ мякокъ, аки воскъ.[217] И вообразишася стопы жребцовы в тотъ камень до полуперста, знать и до сего дни. Ис тое же церкви Господь нашь Исусъ Христосъ изгна торжники,[218]

продающе овца, и голуби, и птицы, и столы опроверьже и пенязи розсыпа и рече имъ: «Не творите дому купленного, домъ молитве, домъ Отца моего». В ту же церковь введена бысть пресвятая Богородица трею летъ сущи.[219] Пред тою же церквию пред враты стоитъ церковъ невилика, а в ней стоитъ мерило праведное, сотворено мудрымъ Соломономъ, кабы скалвы,[220] две чаши висятъ великии железные, черны, а не рьжавеютъ, на железныхъ чепехъ. А варки добре от единой свещи ставитца на земли.[221] Церковъ же Святая Святыхъ создания Соломонова розбиена до основания царемъ Титомъ римскимъ.[222] Одно осталось мерило праведное не врежено ничемъ. А ныне на том месте погании турки учинили свою мечитъ, а крестияне тамо не входятъ, разее хто дастъ поминокъ янычанамъ; и они его пустятъ втаи, да видитъ мерило праведное. О той же церкви пророкъ Давидъ глаголетъ: «Боже, приидоша языцы в достояние твое, оскверниша церковъ святую твою».[223]