Том 10 (XVI век, литература «государственного устроения»)

А о левую страну тое церкви, под гору, домъ святыхъ праведныхъ богоотецъ Иакима и Анны;[224] и в томъ дому церковъ во имя ихъ. А живутъ в томъ дому турки, а християне приходятъ помолитися, а поганые турки емлютъ с нихъ поминки, тоже и в церковъ пустятъ. В томъ дому стоитъ древо дафанъ, на немъ же виде святая Анна гнездо птиче,[225] и молитву под ним творяше. И то древо стоитъ цело и до сего дни. Близъ тово места ровъ Еремия пророка,[226] коли в кал вверьжен бысть возле градцкую стену. А от дому святых праведныхъ Иакима и Анны пошед мало на гору, домъ Пилатовъ,[227] в немъ же судили пребеззаконныи июдеи Господа нашего Исуса Христа, судию всего мира. В томъ дому и доныне судъ, саньчакъ судит градцкихъ людей. И пошед от того дому мало, на другой стране улицы, под гору, домъ Аннинъ и Кайяфинъ,

[228] а засыпаны землею. Коли Господа нашего Исуса Христа распяли пребеззаконьнии июдеи, и по роспятии повелеша крестъ Христовъ и разбойничеи сохранити в гору, и вразумеша, что будетъ взыскание крестомъ и помыслиша своим злосерьдиемъ, хотеша утаити божество, но не возмогоша. И повелеша на ту гору всему граду землю и соръ сыпати, и засыпаша ту гору землею. И Божиею волею прииде царица Елена от Царяграда во Иерусалимъ на взыскание честнаго креста и, пришед, известно уведа о кресте Господни. И повеле ту гору очищати и ту землю сыпати на домъ Аньнин и Каияфин, и тою землею засыпаша домы ихъ.

А от западныя страны града у градцкихъ великих вратъ, в кои входятъ от Египта и от Лиды,[229] дом Давида пророка и царя, возле градскую стену; а вкругъ дому ровъ копанъ, какъ кругь града и вымурован; а чрез ровъ камень веденъ, а на мост из дому врата великие, какъ градцкие, а в тех вратех пушки лежатъ и сторожи. А християнъ в тотъ домъ не пущаютъ, и стоятъ у того двора турки и янычаре. А величеством дому того, аки лукомъ, вержениемъ стрелы, 2 поперег; а хоромъ в нем нетъ, развее одна полата; из нея же виде Давид Вирсавию во ограде мыющеся.[230] А тот град от дому Давидова вержениемъ от лука стрелы; и доныне стоитъ целъ и недвижимъ, а у полаты зделаны два окна, а в ней одно окно в пределе полаты, И нас, грешных, сподобил Богъ быти в том дому и в полате. О томъ дому рече Божественное Писание: «В дому Давидове страх великъ, ту бо престоломъ поставленымъ судятся всяка племена земная и языцы».[231] А ныне в томъ дому несть страха. Нам же воспросившим о томъ дому и Божественномъ Писании патриарха иерусалимскаго Софрония.[232]

Патриархъ же намъ отвеща: «Егда будетъ пришествие Сына Человеческаго судити живым и мертвьшъ, тогда в томъ дому все Божественное Писание совершится». От того дому есть поток сух, под градцкую стену, под домъ Давидов пошел. А имя тому потоку Удоль Плачевна,[233] тужду хощетъ течи огненная река в день Страшного Суда.

О горе Сионе

На полуденную страну нынешнего града за стеною, а внутре ныне стараго града, стоитъ гора Сионская, велика. Святый Сион, мати церквамъ, Божие жилище. На той же горе былъ домъ — монастырь Виноцейского царя. А живетъ в нем игуменъ и мнихи, а держатъ ту церковъ виноцеене; а ныне ту церковь держатъ турки.

На той же горе был домъ Зеведеовъ, отца Иванна Богослова. В томъ дому тайную вечерю сотвори Исусъ со ученики своими и нозе имъ ум̀ы, а окаяннаго Июды[234] не презре. В томъ же дому Иванна Богослова возляже

[235] на перси Христу. В том же дому Иванна Богослова жила по распятии Господа нашего Исуса Христа мати пречистая Богородица. Егда Исусъ Христосъ стоя на кресте, глагола матери своей: «Жено, се сын твой», и потом глагола ученику: «Се мати твоя»,[236] от того часа поят в той домъ.

На той же горе прииде Исусъ Христосъ по воскресении своем ко ученикомъ,[237] дверем затворенным, и ребра своя показа и Фому уверивъ.[238] На той же горе в том же дому бысть сшествие Святого Духа[239]

на святыя ученики и апостолы. На той же горе собрашася апостоли на преставление Божия Матери. На той же горе гроб святого первомученика Стефанна.[240] На том же Сионе есть пещера, где царь Давидъ псалтырь сложил, от того места вержениемъ каменя, на том же Сионе, — где отсекл аггелъ Господень руце жидовину,[241] прикоснувыйся ко гробу пречистыя Богородица. А от великия церкви святого Сиона на левую стърану вержениемъ от лука стрелы Галилея Малая.[242] Тамо первое явися Христосъ, по воскресении своем воста из мертвых. И та вся святая места на Сионской горе.

О монастырех