Том 14 (Конец XVI - начало XVII века, подступы к решительным переменам)

Мне же, недостойному, самовидцу бывшу, како или коими чюдесными благотворении яви Богъ и Богородица от земных недръ чюдотворный свой образ (якоже преди простретися слово хощет); писанию ж предати замедлившу — или от недостатка разума, или от нерадения и душегубителные лености, ово же и страха ради недостоинства: пленицами бо моих грехов стягнут есмъ и таковым преславнымъ вещем не лепо ми бе коснутися, но разве точию безакония моя знати и просити отпущения безчисленым моим согрешением.

Но понеже желание привлачит мя и страх глаголати нудит мя, греси же мои, яко бремя тяжко, отяготеша на мне,[6] и что убо сотворю? Дерзну ли к начинанию? Что убо: реку ли или запрещу себе окаянства ради моего? или паки внимаю восходящая на сердце мое — блаженьством о Всепетей и Богоприятней Богородицы и Приснодевей Марии?

Но ты сама содействуй ми, о Преблагословенная, Заступнице Усердная, Мати Бога Вышняго, яко да воля иже ис тебе рождьшагося Христа Бога нашего будет: да ми, недостойному, помрачивыйся умъ мой, тобою, о Всенепорочная, просветится! Ты бо за всехъ молиши Сына своего, Христа Бога нашего, и пишущу ми содействуй, всем бо твориши спастися, в державный ти покров прибегающим!

Множицею бо воспомянух, некогда же и слезы испустих, ведый мое недостоинство, но обаче и се ми во ум прииде, яко неправедно есть Божиих тайн и неизреченных к нам и многомилостивных дарованиих в забвения глубине погружати, имже многим источником целебным и самовидец бых; и елико видехи слышах о пречюдней ти иконе, подай ми, о Всепетая, глаголати и писати, и всех нас заступи, Госпожа Царице!

Аще по достоянию и несмь достоин похвалы тебе принести малы некия от великихъ, но обаче сподоби мя, о Владычице, от твоих неизреченных на нас благодеяних хвалу тобе принести, и якоже сподобила мя еси, о Всеблаженая, недостойнаго и грешнаго, скверными моими руками преже всех священных прикоснутися пречистому твоему образу и чюдотворнай иконе и Сына твоего Христа Бога нашего! Аще бо и вси достойни, но аз недостоин сый; но обаче влеком жадая, да поне прикоснуся пречистому твоему и чюдотворному образу, Владычице, и превечнаго ти младенца Спаса Христа!

Ныне же паки, что реку или что возглаглю великоименитей Девей, паче же рещи многоименитей, пророки прореченней?[7] Пять убо к десятим летом преидоша явлению чюдотворныя Богородицыны иконы, чюдесная же исцеления безпрестани неоскудно бывают, и вся страсти душевныя и недуги телесныя немедлено от человекь отгоними бывают. Сие паки призывает мя к торжеству и глаголати понужает, и яко подобает ми и писанию сия предать, да не буду осужен, якоже и скрывый талантъ господина своего.[8]

Понеже убо человеческий род обыче и святых памяти духовные с похвалами празновати, а иже Пресвятей и Преславней Царице — царски празники празновати, Пречистыя Богородицы и Приснодевы Мария! Сию попремногу паче онех любовию почитати должни есмы, та бо есть божественый покров рабом своим, и притецати к тихому сему и доброму пристанищу, скорой помощнице, готовому и теплому спасению — покрову Девыя; и яко вышшей и паче всех тварей вышшую похвалу принести, яко Царице и Владычице, Царя и Владыку всех рождьшую!

Тоя бо ради праматерняя клятва потребися и Адам от вечных уз свободися, и Богъ к нам примирися! Тогда бо Ияковля лествица утвердися, Богу хотящу по ней снити[9] и человеком путь сотворити къ небесным, и человецы со аггелы во едино быша. Не ктому, якоже тогда, со Ияковом древле борется,[10] ибо Творец Ияковль на землю сниде, погибшую драхму взыскати хотя[11] и Отцу принести. Темже пророцы тогда возрадошася, своему пророчеству збытие зряще! Тогда убо Давидъ, видев от семени его правнуку родившуся,[12] бряцая в гусли,[13] играя духом, глаголя: «Слыши, дщи, и виждь, и приклони ухо твое!»[14] Темже тогда не токмо пророцы, но и превышняя и земная тварь съпразноваше.

Ныне же паки приспе новый празник честный Владычицы нашея Богородицы — честнаго ея образа иконы Одигитрия,[15] крепкия помощница, да познают вси, яко не токмо, егда в мире бяше, ходатайственое къ своему Творцу и Сыну показоваше, но и паче и по преславном своем преставлении от земных в небесная непрестанно милостивно нас присещая![16]

Темже, оставльше начало словеси, на совершение ведемся шествующе; да коснемся иже о сих беседе, елико подастъ Святый Духъ, преже похваливше ваше усердие теплое. Толико бо к Церкви ваше тщание, паче же к чюдотворней Богородицынай иконе вера и моление, елико чадом к матери, елико жаждущему ко источнику, елико кораблю къ пристанищу. Толико и нас веселит преспеяние ваше, яко ныне явити нам о семъ.