Том 3 (XI-XII века, священная история)

И виде на друземъ месте столы огнены и на нихъ множство народу мужъ и женъ, згараху на нихъ, и воспроси архистратига Святая (...) «иже поповъ не чтуть, то ни встають имъ и егда приходять оть церкви Божии, да того ради мучатся».

И увиде Святая Богородица древо железно, имеюще отрасли и витвии железныи, и вершие ветвия того имеяше уды железныя, и бяше множство висящии, мужъ и женъ, за языки. И видевши Святая, прослезися и воспроси Михаила: «Кто си суть, что ли согрешении ихъ?» И рече архистратигъ: «И се суть клеветницы и свадницы, иже разлучиша брата отъ брата и мужъ отъ женъ своихъ». И рече Михаилъ: «Послушаи, Пресвятая, да ти азъ скажу и о сихъ: аще кто хотяше креститися и покаятися греховъ своихъ, то ти разглаголаху и не поучаху спасению, да того ради тако мучатся на векъ».

И виде Святая на друземъ месте висяща мужа за четверо, за вся края ноготь его, исхожаше кровь велми зело, и языкъ его вязашеся отъ пламени огненаго, не можаше воздохнути, ни рещи: «Господи, помилуй мя». И видевши его, Пресвятая Богородица, и рече: «Господи, помилуй», 3-ю и сотвори молитву. И приде къ ней ангелъ, иже обладаше муками, отрешити языкъ мужеви тому. И воспрси Святая: «Кто се есть бедныи человекъ, приемля сию муку?» И рече ангелъ: «Се есть икономъ и церкви служитель, и не творя воля Божия, но да продаяше сосуды, имение церковное, и глаголаша: иже церкви работаеть, то отъ церкви питаеться, и того ради мучится зде». И рече Святая: «Якоже есть сотворилъ, тако приемлетъ». И паки ему ангелъ связа языкъ.

И рече архистратигъ: «Поди, Госпоже, да ти покажу, где мучать ереи», и виде попы висяща отъ краи ногти, исхождаше огнь отъ темяни ихъ и опаляше я. И видевши Пресвятая, и рече: «Кто си суть, что ли согрешеньи ихъ?» И рече Михаилъ: «Си суть литоргии служители и предстоящи престолу Божию и достоинии ся творящи, да егда проскомисаху просвиру, и не храняху, и роняху крупицы на землю, яко звезды Божия: тогда страшный престолъ колебашеся, и подножие Божие трепеташе, да того ради тако мучатся».

И виде Святая мужа, змии крылатъ имеющь 3 главы, едина же бе глава ко очима мужа, а 2-я ко устомъ его. И рече архистратигъ: «Се есть бедныи человекъ, яко не можетъ отдохнути отъ змию сего». И рече архистратигъ: «Се есть, Госпоже, и святыя книги прочиташе и евангелия, а самъ не послушаше; люди учаше, а самъ не творяше воля Божия, блудомъ и всемъ безакониемъ».

И рече архистратигъ силы господня: «Поди, Пресвятая, да ти покажу, где ся мучитъ чинъ ангельски и апостольски». И увиде Святая, где лежаху на пламени огненемъ и ядяше ихъ червь не усыпая. И рече Святая: «Кто си суть?» И отвеща Михаилъ: «Сии суть, иже образъ ангельски носять и апостольски, на земли величающися, патриархи и епископи, славнии имены, и словяху: благословити отцы святии, но на небеси не звашеся святии, не сотвориша бо, яко бо ангельски и апостольски образъ носиша, да того ради тако мучатся».

И виде Пресвятая жены висяща за вся ногти и пламени исхожаше изо устъ ихъ и опаляше вся, и змия исхожаше изъ пламени того и прилепяху къ нимъ, и вопияху, глаголаше: «Помилуйте насъ, яко мы едины мучимся паче всехъ мукъ». И рече Святая, прослезившися: «Что есть согрешении техъ?» И рече архистратигъ: «То суть попадьи, иже поповъ своихъ не почтоша, и по смерти ихъ идоша за мужъ, да того ради мучатся».

И виде другия жены во огни лежаша и различныя змия ядяху ихъ, и рече Святая: «Что согрешение ихъ?» И отвеща Михаилъ: «То суть монастыря черницы, яже телеса своя продаша на блудъ, да того ради зде мучатся».

И рече архистратигъ: «Поди, Пресвятая, и покажу ти, где ся мучитъ множство грешникъ». И виде Святая реку огненую.и видение реки тоя яко кровь текущи, и пояда всю землю, и посреде волны тоя множство грешникъ. И видевши Богородица прослезися и рече: «Что есть согрешение ихъ?» Рече архистратигъ: «То суть блудницы и любодеицы, татие, иже послушають отаи, что суть ближнии глаголють, свадницы и клеветницы, иже чужие нивы ужинаху, или урояху, иже брени си остани дожидають, иже ядять труды чюжы, и малжены разлучаютъ, пьяницы, иемилостиви князи, епископи и патриарси, и цари, иже не сотвориша воля Божия, сребролюбци, иже лихву емлють, беззаконницы». Слышавше то, Пречистая Богородица прослезися и рече: «О люте грешникомъ!» и рече ко архистратигу: «Тяжко согрешающимъ, да бы ся не ражали!»