Том 3 (XI-XII века, священная история)

И рече къ ней Михаилъ: «Почто ся плачеши, Святая? Неси ли видела великъ мукъ?» И рече Пресвятая: «Поведи мя, да вижю вся мукы». И рече къ ней Михаилъ: «Куды хощеши, Благодатная, да изыдемь на востокъ или на западъ, или в раи, на десно или на лево, идеже суть великия муки?» И рече Пресвятая: «Изыдемъ на левую страну». Слово рекше Пресвятей, и обратишася херувими и серафими и 400 ангелъ, изведоша Пресвятую отъ востокъ на левую страну, и близъ тоя реки бяше тма мрачна: ту лежаше множство мужъ и женъ, и клоктаху яко въ котле и яко морския волны, и ображаются надъ грешники, да егда волны возхождаху, и погружаху грешники 1000 локоти, не можаху рещи: «Праведный судья, помилуи ны». Ядяше же червии неусыпаяи, и скрежетъ зубомъ. И видевше Пресвятую ангели стрегуще, и возопиша вси едины усты, глаголюще: «Святъ, святъ, святъ еси, Боже святый, и ты, Богородице, благословимъ тя и Сына Божия, родившагося отъ тебе, яко бо отъ века ие видехомъ света, и днесь видимъ светъ тебе ради, Богородице». И паки возопиша вси единемъ гласомъ, глаголюще: «Радуйся, Благодатная Богородице; радуйся, просвещение света вечнаго; радуйся, святыи архистратиже Михаиле, моляся Владыце за весь миръ, мы убо видимъ грешныя мучащияся, и зело скорбимъ».

Видевши Богородица ангелы скорбныи и уныли грешникъ ради, и возплакася Пресвятая, и возопиша вси единымъ гласомъ, глаголюще: «Добре есте пришли во тму сию, да ны видить како ны есть мука; помолись, Пресвятая, со архистратигом». И слыша плачъ и гласъ грешныхъ, воздвигоша плачъ свои, вопиюще и глаголюще: «Господи, помилуй ны», да яко опростиша молитву, уставися буря речная и волны огненыя, и явишася грешницы, яко зерна горюшична. И видевши Святая, прослезися и рече: «Что есть река си и волны ея?» И рече къ ней архистратигъ: «Сии река вся смолена, а волны ея вся огнены, а иже ся мучатъ, то суть жидове, иже мучиша Господа нашего Исуса Христа, Сына Божия, и вси языцы, иже крестишася во имя отца и сына и святаго духа, иже крестьяне суще, ти веруютъ въ демоны и отвергошася Бога и святаго крещения, и еже блудъ створиша по святомъ крещении, и съ кумы (...) своими и съ матерьми своими и со щерьми своими, и отравницы, иже ядями уморяютъ человеки, и оружьемъ убиваютъ человеки, и давятъ дети своя, и того ради мучатся противу деломъ своимъ». И рече Святая: «По деломъ ихъ буди тако!» И паки наиде на ня бурна река и огнена волны, и тма покры я. И рече Михаилъ к Богородицы: «Аще ся кто затворитъ во тме сей, несть памяти о немъ отъ Бога». И рече Пресвятая: «О люте грешникомъ, яко неусыпаемыи есть пламы огня сего!»

И рече къ ней архистратигъ: «Поди, Пресвятая, да ти покажу озеро огнено, да видиши, где мучатся родъ христьянскии». И виде, и услыша плачъ и вопль отъ нихъ, а онехъ не бе видети, и рече: «Котории си суть, что ли согрешение ихъ есть?» И рече къ Ней Михаилъ: «Сии суть, иже крестишася и крестъ словомъ нарицаху, а дияволя дела творяще: и погубиша время покаянию, и того ради мучатся тако зде».

И рече Пресвятая ко архистратигу: «При единои молитве молютися, да вниду и азъ, да ся мучу со крестьяны, и понеже нарекошася чада сына моего». И рече архистратигъ: «Почиваи въ раи». И рече Пресвятая: «Молю ти ся, и подвигни воинства 7-ми небесъ и вся воинства ангели, да ся помолимъ за грешники, не бы ли насъ услышалъ Господь Богъ и помиловалъ ихъ».

«Живъ господь Богъ, имя его велико, 7-жды на день и 7 на нощь, егда хвалу приносимъ Владыце и за грешники, Госпоже, Господеви поклоняемся, да ни худе насъ послушаетъ владыка». И рече Пресвятая Богородица: «Молим ти ся, повели ангельскому воинству, и вознесете мя на высоту небесную и поставите мя предъ невидимымъ Отцемъ».

И повеле архистратигъ, и предсташа херувими и серафими, и вознесоша Благодатную на высоту небесную, и поставиша ю предъ невидимымъ Отцемъ у престола, и возде руце свои ко благодатному Сыну своему, и рече: «Помилуи, Владыко, грешныя, яко видехъ я, и не могу терпети, да ся мучю и азъ со крестьяны». И прииде гласъ къ ней, глаголя: «Како хощу тыя помиловати? А вижу гвоздия во дланехъ сыну моему, да не имамъ я како те помиловати». И рече: «Владыко, не молюся за неверныя жиды, но за крестьяны молю твое милосердие». И прииде гласъ, глаголя: «Азъ вижу, яко братия моея не помиловаша, да несть ми како техъ помиловати». И рече паки Пресвятая: «Помилуй, владыко, грешныя; помилуй, Господи, тварь руку своею, яко по всей земли твое имя нарицаютъ и въ мукахъ и на всякомъ месте, и по всей земли глаголюще: “Пресвятая Госпожа Богородице, помогаи намъ”, и егда ражается человекъ, и глаголетъ: “Святая Богородице, помози ми”». Тогда рече къ ней Господь: «Послушай, Пресвятая Богородице, Владычице, — несть того человека, иже не молить имени твоего; азъ же не оставляю техъ то ни на небеси, ни на земли».