Том 4 (XII век, литература эпохи «Слова о полку Игореве»)

1. Аже убиеть мужь мужа, то мьстити брату брата, любо отцю, ли сыну, любо братучадо, ли братню сынови;[1117] аще ли не будеть кто его мьстя, то положити за голову 80 гривенъ, аще будеть княжь мужь или тиуна княжа; аще ли будеть русинъ, или гридь, любо купець, любо тивунъ боярескъ, любо мечникъ, любо изгои, ли словенинъ, то 40 гривенъ положити за нь.

2. По Ярославе же паки совкупившеся сынове его, Изяславъ, Святославъ, Всеволодъ, и мужи ихъ, Коснячько, Перенегь, Никифоръ, и отложиша убиение за голову, но кунами ся выкупати; а ино все, якоже Ярославъ судилъ, такоже и сынове его уставиша.

3. О убиистве. Аже кто убиеть княжа мужа в разбои, а головника не ищють, то виревную платити, въ чьеи же верви голова лежить, то 80 гривенъ, паки ли людинъ, то 40 гривенъ.

4. Которая ли вервь начнеть платити дикую виру,[1118] колико летъ заплатить ту виру, зане же безъ головника имъ платити.

5. Будеть ли головникъ ихъ въ верви, то зане к нимъ прикладываеть, того же деля имъ помагати головнику; любо си дикую виру, но сплатити имъ во обчи 40 гривенъ, а головничьство самому головнику, а въ 40 гривенъ ему заплатити ис дружины свою часть.

6. Но оже будеть убилъ или въ сваде или в пиру явлено, то тако ему платити по верви ныне, иже ся прикладываеть вирою.

7. Оже станеть без вины на разбои. Будеть ли сталъ на разбои безъ всякоя свады, то за разбоиника люди не платять, но выдадять и всего съ женою и с детми на потокъ и на разграбление.

8. Аже кто не вложить в дикую виру, тому людье не помагають, но самъ платить.

9. А се покони вирнии были при Ярославе: вирнику взяти 7 ведеръ солоду на неделю, же овенъ любо полоть, любо 2 ногате; а в середу куна оже сыръ, а в пятницю тако же, а куръ по двою ему на день, а хлебовъ 7 на неделю, а пшена 7 уборковъ,[1119] а гороху 7 уборковъ, а соли 7 голважень;[1120] то то вирнику со отрокомь; а кони 4, конемъ на ротъ сути овесъ; вирнику 8 гривенъ, а 10 кунъ перекладная,[1121] а метелнику 12 векшии, а съсадная гривна.[1122]

10. О вирах. Аже будеть вира во 80 гривенъ, то вирнику 16 гривенъ и 10 кунъ и 12 векши, а переди съсадная гривна, а за голову 3 гривны.

11. О княжи отроци. Аже въ княжи отроци или в конюсе, или в поваре, то 40 гривенъ.

12. А за тивунъ за огнищныи и за конюшии, то 80 гривенъ.

13. А в сельскомь тивуне княже или в ратаинемь, то 12 гривенъ.

14. А за рядовича 5 гривенъ. Тако же и за боярескъ.

15. О ремественице и о ремественице. А за ремественика и за ремественицю, то 12 гривенъ.

16. А за смердии холопъ[1123] 5 гривенъ, а за робу 6 гривенъ.

17. А за кормилця 12 гривенъ, тако же и за кормилицю, хотя си буди холопъ, хотя си роба.

18. О поклепнеи вире. Аще будеть на кого поклепная вира, то же будеть послуховъ 7, то ти выведуть виру, паки ли варягъ или кто инъ, то два.

19. А по костехъ и по мертвеци не платить верви, аже имене не ведають, ни знають его.

20. Аже свержеть виру. А иже свержеть виру, то гривна кунъ сметная отроку; а кто и клепалъ, а тому дати другую гривну; а от виры помочьнаго 9[1124] кунъ.

21. Искавше ли послуха и не налезуть истьця начнеть головою клепати, то ти имъ правду железо.[1125]

22. Тако же и во всехъ тяжахъ, в татбе и в поклепе; оже не будеть лиця, то тогда дати ему железо из неволи до полугривны золота;[1126] аже ли мене, то на воду,[1127] оли то до дву гривенъ, аже мене, то роте ему ити по свое куны.

23. Оже кто ударить мечемь. Аже кто ударить мечемь, не вынезъ его, или рукоятию, то 12 гривенъ продажи за обиду.

24. Аже ли вынезъ мечь, а не утнеть, то гривна кунъ.

25. Аже кто кого ударить батогомь, любо чашею, любо рогомь, любо тылеснию, то 12 гривенъ.

26. Не терпя ли противу тому ударить мечемь, то вины ему в томь нетуть.

27. Аче ли утнеть руку, и отпадеть рука или усохнеть или нога, или око, или нос утнеть,[1128] то полувирье 20 гривенъ, а тому за векъ 10 гривенъ.

28. Аже перстъ утнеть кии любо, 3 гривны продаже, а самому гривна кунъ.

29. А придеть кровавъ мужь. Аже придеть кровавъ мужь на дворъ или синь, то видока ему не искати, но платити ему продажю 3 гривны; аще ли не будеть на немь знамения, то привести ему видокъ слово противу слова; а кто будеть почалъ, тому платити 60 кунъ; аче же и кровавъ придеть или будеть самъ почалъ, а вылезуть послуси, то то ему за платежь, оже и били.

30. Аже ударить мечемь, а не утнеть на смерть, то 3 гривны, а самому гривна за рану же лечебное, потнеть или на смерть, а вира.

31. Аче попъхнеть мужь мужа любо к собе ли от собе, любо по лицю ударить, ли жердью ударить, а видока два выведуть, то 3 гривны продажи; аже будеть варягъ или колбягъ, то полная видока вывести и идета на роту.

32. О челяди. А челядинъ скрыеться, а закличють и на торгу, а за 3 дни не выведуть его, а познають и третии день, то свои челядинъ поняти, а оному платити 3 гривны продажи.

33. Аже кто всядеть на чюжь конь. Аже кто всядеть на чюжь конь не прашавъ, то 3 гривны.