Том 4 (XII век, литература эпохи «Слова о полку Игореве»)

34. Аче кто конь погубить, или оружье, или портъ, а заповесть на торгу, а после познаеть въ своемь городе, свое ему лицемь взяти, а за обиду платити ему 3 гривны.

35. Аже кто познаеть свое, что будеть погубилъ или украдено у него что, или конь, или портъ, или скотина, то не рци и: «Се мое», но поиди на сводъ, кде есть взялъ, сведитеся, кто будеть виноватъ, на того татба снидеть; тогда онъ свое возметь, а что погибло будеть с нимь, то же ему начнеть платити; аще будеть коневыи тать, выдати князю на потокъ; паки ли будеть клетныи тать, то 3 гривны платити ему.

36. О своде. Аже будеть во одиномь городе, то ити истьцю до конця того свода; будеть ли сводъ по землямъ, то ити ему до третьяго свода; а что будеть лице, то тому платити третьему кунами за лице, а с лицемь ити до конця своду, а истьцю ждати прока, а кде снидеть на конечняго, то тому все платити и продажю.

37. О татбе. Паки ли будеть что татебно купилъ в торгу, или конь, или портъ, или скотину, то выведеть свободна мужа два или мытника; аже начнеть не знати, у кого купилъ, то ити по немь темъ видокомъ на роту, а истьцю свое лице взяти; а что с нимь погибло, а того ему желети, а оному желети своихъ кунъ, зане не знаеть у кого купивъ; познаеть ли на долзе, у кого то купилъ, то свое куны возметь, и сему платити, что у него будеть погибло, а князю продажю.

38. Аже познаеть кто челядь. Аще познаеть кто челядинъ свои украденъ, а поиметь и, то оному вести и по кунамъ до 3-го свода; пояти же челядинъ в челядина место, а оному дати лице, ать идеть до конечняго свода, а то есть не скотъ, не лзе рчи: «Не веде, у кого есмь купилъ», но по языку ити до конця; а кде будеть конечнии тать, то опять воротить челядина, а свои поиметь, и проторъ тому же платити, а князю продаже 12 гривенъ в челядине или украдше.

39. О своде же. А ис своего города в чюжю землю свода нетуть, но тако же вывести ему послухи любо мытника, передъ кимь же купивше, то истьцю лице взяти, а прока ему желети, что с нимь погибло, а оному своихъ кунъ желети.

40. О татьбе. Аже убиють кого у клети или у которое татбы, то убиють во пса место; аже ли и додержать света, то вести на княжь дворъ; оже ли убиють и, а уже будуть людие связана видели, то платити в томь 12 гривенъ.

41. Аже крадеть кто скотъ въ хлеве или клеть, то же будеть одинъ, то платити ему 3 гривны и 30 кунъ; будеть ли ихъ много, всемъ по 3 гривны и по 30 кунъ платити.

42. О татбе же. Аже крадеть скотъ на поли, или овце, или козы, ли свиньи, 60 кунъ; будеть ли ихъ много, то всемъ по 60 кунъ.

43. Аже крадеть гумно или жито въ яме, то колико ихъ будеть крало, то всемъ по 3 гривны и по 30 кунъ.

44. А у него же погибло, то оже будеть лице, лице поиметь, а за лето возметь по полугривне.

45. Паки ли лиця не будеть, а будеть былъ княжь конь, то платити за нь 3 гривны, а за инехъ по 2 гривны.

А се уроци скоту. Аже за кобылу 60 кунъ, а за волъ гривна, а за корову 40 кунъ, а за третьяку 30 кунъ, за лоньщину пол гривны, за теля 5 кунъ, а за свинью 5 кунъ, а за порося ногата, за овцю 5 кунъ, за боранъ ногата, а за жеребець, аже не вседано на нь, гривна кунъ, за жеребя 6 ногатъ, а за коровие молоко 6 ногатъ;[1129] то ти уроци смердомъ, оже платять князю продажю.

46. Аже будуть холопи татье, судъ княжь. Аже будуть холопи татие любо княжи, любо боярьстии, любо чернечь, их же князь продажею не казнить, зане суть не свободни, то двоиче платить ко истьцю за обиду.

47. Оже кто кунъ взищеть. Аже кто взищеть кунъ на друзе, а онъ ся начнеть запирати, то оже на нь выведеть послуси, то ти поидуть на роту, а онъ возметь свое куны; зане же не далъ ему кунъ за много летъ, то платити ему за обиду 3 гривны.

48. Аже кто купець купцю дасть в куплю куны или в гостьбу, то купцю пред послухи кунъ не имати, послуси ему не надобе, но ити ему самому роте, аже ся почнеть запирати.

49. О поклажаи. Аже кто поклажаи кладеть у кого любо, то ту послуха нетуть, но оже начнеть болшимь клепати, тому ити роте, у кого то лежал товаръ: «А толко еси у мене положилъ», зане же ему въ бологоделъ и хоронилъ товаръ того.

50. О резе. Аже кто даеть куны в резъ, или наставъ в медъ, или жито во просопъ, то послухи ему ставити: како ся будеть рядилъ, тако же ему имати.

51. О месячнемь резе. А месячныи резъ, оже за мало, то имати ему; заидуть ли ся куны до того же года, то дадять ему куны въ треть,[1130] а месячныи резъ погренути.

52. Послуховъ ли не будеть, а будеть кунъ 3 гривны, то ити ему про свое куны роте; будеть ли боле кунъ, то речи ему тако: «Промиловался еси, оже еси не ставил послуховъ».