Том 4 (XII век, литература эпохи «Слова о полку Игореве»)

77. Не будеть ли татя, то по следу женуть; аже будеть следъ ли к селу или к товару, а не отсочать от собе следа, ни едуть на следъ или отбьють, то темь платити татбу и продажю; а следъ гнати с чюжими людми а с послухи; аже погубять следъ на гостиныце на велице, а села не будеть, или на пусте, кде же не будеть ни села, ни людии, то не платити ни продажи, ни татбы.[1151]

78. О смерде. Аже смердъ мучить смерда безъ княжа слова, то 3 гривны продажи, а за муку гривна кунъ; аже огнищанина мучить, то 12 гривенъ продаже, а за муку гривна.

79. Аже лодью украдеть, то 60 кунъ продаже, а лодию лицемь воротити; а за морьскую лодью 3 гривны, а за набоиную лодью[1152] 2 гривны, за челнъ 20 кунъ, а за стругъ гривна.

80. О перевесехъ. Аже кто подотнеть вервь в перевесе, то 3 гривны продажи, а господину за вервь гривна кунъ.

81. Аже кто украдеть въ чьемь перевесе ястрябъ или соколъ, то продаже 3 гривны, а господину гривна; а за голубь 9 кунъ, а за куря 9 кунъ, а за утовь 30 кунъ, а за густь 30 кунъ, а за лебедь 30 кунъ, а за жеравль 30 кунъ.

82. А в сене и въ дровехъ 9 кунъ, а господину колико будеть возъ украдено, то имати ему за возъ по 2 ногате.

83. О гумне. Аже зажьжеть гумно, то на потокъ и на грабежь домъ его, переди пагубу исплатившю, а въ проце князю поточити и. Тако же аже кто дворъ зажьжеть.

84. А кто пакощами конь порежеть или скотину, то продаже 12 гривенъ, а за пагубу господину урокъ платити.

85. Ты тяже все судять послухи свободыми; будеть ли послухъ холопъ, то холопу на правду не вылазити; но оже хощеть истець, или иметь и, а река тако: «По сего речи емлю тя, но язъ емлю тя, а не холопъ», и емети и на железо; аже обинити и, то емлеть на немь свое; не обинить ли его, а платити ему гривна за муку, зане по холопьи речи яли.

86. А железного платити 40 кунъ, а мечнику 5 кунъ, а пол гривны детьскому;[1153] то ти железныи урокъ, кто си в чемь емлеть.

87. Аже иметь на железо по свободныхъ людии речи, либо ли запа на нь будеть, любо прохожение нощное, или кимь любо образомь аже не ожьжеть, то про муки не платити ему, но одино железное, кто и будеть ялъ.

88. О жене. Аже кто убиеть жену, то тем же судомь судити, яко же и мужа; аже будеть виноватъ, то пол виры 20 гривенъ.

89. А в холопе и в робе виры нетуть; но оже будеть без вины убиенъ, то за холопъ урокъ платити или за робу, а князю 12 гривенъ продаже.

90. Аже умреть смердъ. Аже смердъ умреть, то задница князю;[1154] аже будуть дщери у него дома, то даяти часть на не; аже будуть за мужемь, то не даяти части имъ.

91. О заднице боярьстеи и о дружиннеи. Аже в боярехъ любо въ дружине, то за князя задниця не идеть; но оже не будеть сыновъ, а дчери возмуть.

92. Аже кто умирая разделить домъ свои детемъ, на том же стояти; паки ли безъ ряду умреть, то всемъ детемъ, а на самого часть дати души.

93. Аже жена сядеть по мужи, то на ню часть дати, а что на ню мужь възложить, тому же есть госпожа, а задниця еи мужня не надобе.

94. Будуть ли дети, то что первое жены, то то возмуть дети матере своея; любо си на жену будеть възложилъ, обаче матери своеи возмуть.

95. Аже будеть сестра в дому, то тои заднице не имати, но отдадять ю за мужь братия, како си могуть.

96. А се закладаюче городъ. А се уроци городнику: закладаюче городню,[1155] куну взяти, а кончавше ногата; а за кормъ, и за вологу, и за мяса, и за рыбы 7 кунъ на неделю, 7 хлебовъ, 7 уборковъ пшена, 7 луконъ овса на 4 кони; имати же ему, донеле городъ срубять; а солоду одину дадять 10 луконъ.

97. О мостницехъ. А се мостнику уроци: помостивше мостъ, взяти от 10 локотъ по ногате; аже починить моста ветхаго, то колико городне починить, то взяти ему по куне от городне; а мостнику самому ехати со отрокомь на дву коню, 4 лукна овса на неделю, а есть, что можеть.

98. А се о заднице. Аже будуть робьи дети у мужа, то задници имъ не имати, но свобода имъ с матерью.

99. Аже будуть в дому дети мали, а не джи ся будуть сами собою печаловати, а мати имъ поидеть за мужь, то кто имъ ближии будеть, тому же дати на руце и с добыткомь и с домомь, донеле же возмогуть; а товаръ дати перед людми; а что срезить товаромь темь ли пригостить, то то ему собе, а истыи товаръ воротить имъ, а прикупъ ему собе, зане кормилъ и печаловалъся ими; яже от челяди плод или от скота, то то все поимати лицемь; что ли будеть ростерялъ, то то все ему платити детемъ тем; аче же и отчимъ прииметь дети съ задницею, то тако же есть рядъ.

100. А дворъ без дела отень всякъ меншему сынови.

101. О жене, аже ворчетъ седети. Аже жена ворчеть седети по мужи, а ростеряеть добытокъ и поидеть за мужь, то платити еи все детемъ.

102. Не хотети ли начнуть дети еи ни на дворе, а она начнеть всяко хотети и седети, то творити всяко волю, а детемъ не дати воли; но что еи далъ мужь, с тем же еи седети или, свою часть вземше, седети же.

103. А матерня часть не надобе детемъ, но кому мати дасть, тому же взяти; дасть ли всемъ, а вси розделять; безъ языка ли умреть, то у кого будеть на дворе была и кто ю кормилъ, то тому взяти.