Том 4 (XII век, литература эпохи «Слова о полку Игореве»)

53. Уставъ Володимерь Всеволодича.[1131] А се уставилъ Володимеръ Всеволодичь по Святополце,[1132] созва дружину свою на Берестовемь:[1133] Ратибора[1134] Киевьского тысячьского, Прокопью[1135] Белогородьского тысячьского, Станислава[1136] Переяславьского тысячьского, Нажира,[1137] Мирослава,[1138] Иванка Чюдиновича,[1139] Олгова[1140] мужа, и уставили до третьяго реза,[1141] оже емлеть въ треть куны; аже кто возметь два реза, то то ему взяти исто; паки ли возметь три резы, то иста ему не взяти.

Аже кто емлеть по 10 кунъ от лета на гривну, то того не отметати.

54. Аже которыи купець истопиться. Аже которыи купець, кде любо шедъ съ чюжими кунами, истопиться, любо рать возметь, ли огнь, то не насилити ему, ни продати его; но како начнеть от лета платити, тако же платить, зане же пагуба от Бога есть, а не виноватъ есть; аже ли пропиеться или пробиеть, а в безумьи чюжь товаръ испортить, то како любо темъ, чии то товаръ: ждуть ли ему, а своя имъ воля, продадять ли, а своя имъ воля.

55. О долзе. Аже кто многимъ долженъ будеть, а пришедъ гость из иного города или чюжеземець, а не ведая запустить за нь товаръ, а опять начнеть не дати гости кунъ, а первии должебити начнуть ему запинати, не дадуче ему кунъ, то вести и на торгъ, продати же и отдати же первое гостины куны, а домашнимъ, что ся останеть кунъ, тем же ся поделять; паки ли будуть княжи куны, то княжи куны первое взяти, а прокъ в делъ; аже кто много реза ималъ, то тому не имати.

56. Аже закупъ[1142] бежить. Аже закупъ бежить от господы, то обель; идеть ли искать кунъ, а явлено ходить, или ко князю или къ судиямъ бежить обиды деля своего господина, то про то не роботять его, но дати ему правду.

57. О закупе же. Аже у господина ролеиныи закупъ, а погубить воискии конь,[1143] то не платити ему; но еже далъ ему господинъ плугь и борону, от него же купу емлеть, то то погубивше платити; аже ли господинъ его отслеть на свое орудье, а погибнеть без него, то того ему не платити.

58. О закупе же. Аже изъ хлева выведуть, то закупу того не платити; но же погубить на поли и въ дворъ не вженеть и не затворить, кде ему господинъ велить, или орудья своя дея, а того погубить, то то ему платити.

59. Аже господинъ переобидить закупа, а увидить купу его или отарицю,[1144] то то ему все воротити, а за обиду платити ему 60 кунъ.

60. Паки ли прииметь на немь кунъ, то опять ему воротити куны, что будеть принялъ, а за обиду платити ему 3 гривны продажи.

61. Продасть ли господинъ закупа обель, то наимиту[1145] свобода во всехъ кунахъ, а господину за обиду платити 12 гривенъ продаже.

62. Аже господинъ бьеть закупа про дело, то без вины есть; биеть ли не смысля, пьянъ, а без вины, то яко же въ свободнемь платежь, тако же и в закупе.

63. О холопе. Аже холопъ обелныи выведеть конь чии любо, то платити за нь 2 гривны.

64. О закупе. Аже закупъ выведеть что, то господинъ в немь; но оже кде и налезуть, то преди заплатить господинъ его конь или что будеть ино взялъ, ему холопъ обелныи; и паки ли господинъ не хотети начнеть платити за нь, а продасть и, отдасть же переди или за конь или за волъ, или за товаръ, что будеть чюжего взялъ, и прокъ ему самому взяти собе.

65. А се, аже холопъ ударить. Аже холопъ ударить свободна мужа, а убежить в хоромъ, а господинъ его не выдасть, то платити за нь господину 12 гривенъ; а затемь аче и кде налезеть удареныи тъ своего истьця, кто его ударилъ, то Ярославъ былъ уставилъ убити и, но сынове его по отци уставиша на куны, любо бити и розвязавше, любо ли взяти гривна кунъ за соромъ.

66. О послушьстве. А послушьства на холопа не складають; но оже не будеть свободнаго, то по нужи сложити на боярьска тивуна, а на инехъ не складывати.

А в мале тяже по нужи възложити на закупа.

67. О бороде. А кто порветь бороду, а въньметь знамение, а вылезуть людие, то 12 гривенъ продаже; аже безъ людии, а в поклепе, то нету продаже.

68. О зубе. Аже выбьють зубъ, а кровь видять у него во рте, а людье вылезуть, то 12 гривенъ продаже, а за зубъ гривна.

69. Аже украдеть кто бобръ, то 12 гривенъ.

70. Аже будеть росечена земля или знамение, им же ловлено, или сеть, то по верви искати в собе татя любо платити продажю.

71. Аже кто борть разнаменаеть. Аже разнаменаеть борть, то 12 гривенъ.

72. Аже межю перетнеть бортьную, или ролеиную разореть, или дворную тыномь перегородить межю, то 12 гривенъ продажи.

73. Аже дубъ подотнеть знаменьныи или межьныи, то 12 гривенъ продаже.

74. А се наклади.[1146] А се наклады 12 гривенъ: отроку[1147] 2 гривны и 20 кунъ, а самому ехати со отрокомь на дву коню, сути же на ротъ овесъ, а мясо дати овенъ любо полоть, а инемь кормомь, что има черево возметь, писцю 10 кунъ, перекладнаго[1148] 5 кунъ, за мехъ[1149] две ногате.

75. А се о борти. Аже борть подътнеть, то 3 гривны продаже, а за дерево пол гривны.

76. Аже пчелы выдереть, то 3 гривны продажи; а за медъ, аже будеть пчелы не лажены, то 10 кунъ; будеть ли олекъ, то 5 кунъ.[1150]