Том 6 (XIV - середина XV века, литература времени национального подъема)

И се в той час единъ отрокъ его въскочи в вежю обледевшим лицем и измолкъшим гласомъ: «Господине княже, се уже едутъ от Орды Ковгадый и князь Юрей съ множествомъ народа прямо къ твоей вежи». Он же наборзе воставъ, и въздохнувъ, рече: «Вемъ, на что едут, на убиение мое». И отсла сына своего Костяньтина къ царице. И бе страшно в той час, братие, видети от всехъ странъ множество женущих видети блаженнаго князя Михаила. Ковгадый же и князь Юрей послаша убийцы, а сами в торгу сседоша с коней, близъ бо бяше в торгу, яко каменемъ доврещи.

Убийцы же, яко дивии зверие, немилостивии кровопийцы, разгнавше всю дружину блаженнаго, въскочивше в вежю, обретоша его стояща. И тако похвативше его за древо, еже на выи его, удариша силно и възломиша на стену, и проломися стена. Он же паки въскочивъ, итако мнози имше его, повергоша на землю, бияхутъ его нещадно ногами. И се единъ от безаконных, именем Романецъ, и извлече ножь, удари в ребра святаго, в десную страну и, обращая ножь семо и овамо, отреза честное и непорочное сердце его. И тако предасть святую свою блаженную душю в руце Господеви великий христолюбивый князь Михайло Ярославичь месяца ноября в 22 день, в среду, въ 7 дни и спричтеся с лики святых и съ сродникома своима, з Борисом и Глебом,[167] и с тезоименитым своимъ с Михайлом с Черниговьским.[168] И приятъ венецъ неувядаемый от рукы Господня, егоже въжделе.

А двор блаженнаго разграбиша русь же и татарове, а имение русское повезоша к себе в станы, а вежю всю расторгоша подробну, а честное тело его повергоша наго, никимже небрегому. Един же пригна в торгъ и рече: «Се уже повеленное вами сотворихомъ». Ковгадый же и князь Юрей вседше на кони, приехаша въскоре к телу святаго и видеша тело святаго наго, браняше и съ яростию князю Юрию: «Не отець ли сей тебе бяшет князь великий? Да чему тако лежит тело наго повержено?» Князь же Юрий повеле своимъ покрыти единою котыгою,[169] еже ношаше при деде его, а другыя кыптом[170] своим.

И положиша и́ на велицей веце, и возложиша и́ на телегу, и увиша ужи крепко, и превезоша за реку, рекомую Адежь, еже речется «горесть». Горесть бо намъ въистинну, братие, в той час бысть, видевшим такову смерть поносную господина своего князя Михаила Ярославича. А дружина наша немнози гонзнуша рукъ ихъ: иже дръзнуша, убежаша въ Орду къ царице, а другых изимаша, влечахут наги, терзающи нещадно, акы некия злодея, и приведши въ станы своя, утвердиша въ оковах. Сами же князи и бояре въ единой вежи пияху вино, повестующе, кто какову вину изрече на святаго.

Но, възлюблении князи русстии, не прельщайтеся суетъными мира сего и века скороминующаго, иже хуждьше паучины минуетъ. Ничтоже бо принесосте на свет сей, ни отнести можете — злата и сребра или бисера многоценнаго, нежели градовъ и власти, о нихже каково убийство сътворися! Но мы на первое възвращшеся, сътворившеся чюдо да скажемъ.

В настоящую бо нощь посла князь Юрей от слугъ своихъ стеречи телеси святаго. И яко начаша стеречи телеси святаго, яко страх великъ и ужасъ приятъ, не могуще трьпети, отбегоша въ станы. И рано пришедше, не обретоша телеси святаго на веже, но телега стояще и веку на ней ужи привязано, а тело святаго особь на единомъ месте лежаше раною к земли и кровь многую исшедшу изъ язвы; десная рука под лицемъ его, а левая у язвы его, а порты одинако оденъ. Преславно бо Господь прослави вернаго раба своего Михаила и тако удиви: об нощь бо лежа тело святаго на земли, а не прикоснуся ему ничтоже от зверей, от множества сущу бесчислену; съхранит бо Господь вся кости ихъ, ни едина же от нихъ не съкрушится, смерть же грешником люта.[171] Еже и бысть треклятому и безаконному Кавгадыю: не пребывъ ни до полулета, зле испроверже окаянный животъ свой, приятъ вечныя муки.

Мнози же вернии и от неверных тое нощи видеша чюдо преславно: два облака светла всю нощь осеняета над телесем преблаженнаго, раступающася и паки ступающася вместо, осеняющи, яко солнце. Наутрия глаголаху: «Святъ есть князь сий, убиенъ бысть безвинно. Облакома сима являетъ присещение аггельское над нимъ», — еже исповедаша нам съ слезами и съ многими клятвами, яко истинна есть бывшее.

И оттоле посла тело въ Мжачары и съ всеми бояры. И тамо, слышаша, гости, знаеми ему, хотеша прикрыти тело святаго с честию плащаницами многоценными и съ свещами преславно въ церкви поставити. Приставлении же немилостивии бояре не даша ни видети блаженнаго, но съ многою укоризною поставиша въ единой хлевине за сторожи. Но ту прослави его Господь Богъ. Мнози от различных языкъ, живующих в месте том, по вся нощи видяху столпъ огнен, сияющь от земля и до небеси, инии же яко дугу небесную, прикладающи над хлевину, идеже лежитъ тело блаженнаго.