Том 6 (XIV - середина XV века, литература времени национального подъема)

Минувшим же 24 днем святому в неизреченном терпении, нечестивый же Ковгадый, имея ядъ аспиденъ под устнами своими, пакы досажая души долготерпеливаго князя Михаила, повеле его привести и в торгъ в таковой укоризне, созва вся заимодавца и повеле святаго поставити на колену пред собою; величашеся безаконный властьми над праведнымъ и многа словеса изрече досадна праведному. Посем рече: «Ведая буди, Михайле, такъ царевъ обычай: аже будетъ ему на кого нелюбо, хотя от своего племяни, то таково древо въскладаютъ на него. Егда же царевъ гневъ минет, то паки в первую честь введетъ его. Утро бо въ предидущий день тягота сии отъидет от тебе, потомъ в болшей чести будеши». Възрев же, рече сторожемъ: «Почто не облегчите древа сего?» Они же рекоша: «Заутра или на другой день тако сътворимъ по глаголу твоему». И рече окаянный: «Поддержите ему древа того, да не отягчаетъ ему плещу». Тако единъ от предстоящих за нимъ, подъимъ, держаще, древо то.

Многу же часу минувшу о въпросехъ, а праведному ответы дающа; посемъ повеле вести вонъ блаженнаго. Ведше его, и рече слугамъ своим: «Дадите ми столецъ, да прииму покой ногама своима, беста бо отягчали от многаго труда». В то же время съехалися бесчисленое множество от всехъ языкъ, сшедшеся, стояще, зряху на святого. Рече же единъ от техъ стоящих ему: «Господине княже, видиши ли, селико множество народа стоятъ, видящи тя в таковой укоризне. А преже тя слышахом царствующаго въ своей земли. Абы еси, господине, въ свою землю шелъ». Блаженный же рече съ слезами, яко «позору быхомъ аггеломъ и человекомъ, и вси видящеи мя покиваша главами своими».[156] И паки: «Уповаша на Господа, да избавитъ и, яко хощетъ ему, яко той есть исторгий мя ис чрева, упование мое от сесцю матере моея».[157] Въставъ, поиде к вежи своей и глаголя прочее псалма того; и оттоле бяше видети очи его полны слезъ, чюяше бо ся въ сердци, яко уже скончатися доброму течению.

Бывшу же блаженному князю Михаилу в неизреченном томъ терпении, в таковой тяготе 26 дней, за рекою Терком, на реце на Севенци, под городом Тютяковымъ, минувши горы высокыя Ясския Черкаскыя, близъ вратъ железных.[158] В среду рано повеле отпети заутреню, и канонъ, и часы. Сам же с плачемъ послушавъ правила причащения и рече попови, да бых молвилъ псаломъ сий. Он же вда ему книги. Приимъ книгы, нача глаголати тихо, съ умилениемъ и многим воздыханиемъ и со многими слезами, испущая от очию, яко реку, слезы, глаголаше се: «Съхрани мя, Господи, яко на тя уповах»,[159] псалом 2: «Господь пасетъ мя, ничтоже мя лишит»,[160] псалом 3: «Веровах, тем же и възглаголахъ».[161] По семъ нача каятися ко отцу своему духовному съ многим смирениемъ, оцищая душу свою, бяше бо с ним игуменъ да два попа. По сем же приседящу у него сыну его Костяньтину, он же приказываше къ княгине и сыномъ своим, приказываше про отчину свою, и про бояре, и про тех, иже с нимъ были, и до менших, иже с ним были, но веля ихъ презрети. И по сем уже часу приближающуся, и рече: «Дадите ми Псалтырь, велми бо ми есть прискорбна душа моя». Чюяше бо сий въ сердцы — при дверех пришелъ есть святый зватай по блаженную его душу. Разгнувъ, обрете псалом: «Внуши, Боже, молитву мою, вонми моление мое, въ скорбехъ печалию моею смутихся от гласа вражия и от стужения грешнича, яко въ гневе враждоваху мне».[162]

В той час окаянный Ковгадый вхожаще къ царю, исхожаше съ ответы на убиение блаженнаго Михаила. Се же чтяше: «Сердце мое смутися въ мне, и страхъ смерти нападе на мя».[163] И рече попом: «Отци, молвите псалом сий, скажите ми». Не хотяше болшему смущати ему: «Се, господине, знакоми то, молвит в последи главизне: възверзи на Господа печаль твою, и той тя препитаетъ, не дасть бо в веки смятения, праведнику».[164] Он же пакы глаголаше: «Кто дасть ми криле, яко голуби, полещу и почию. Се удалихся бегая и въдворихся в пустыни, чаяхъ Бога, спасающаго мя».[165]

Егда вожааху блаженнаго Михаила со царемъ в ловех, глаголааху ему слуги его: «Се, господине, проводницы и кони готови, уклонися на горы, живот получиши». Он же рече: «Не дай же ми Богъ сего сътворити, николиже бо сего сътворих во дни моя. Аще бо азъ, где уклонюся, а дружину свою оставя в такой беде, кою похвалу приобрящу, но воля Господня да будетъ».

И рече: «Аще бы ми врагъ Ковгадый поносилъ, претрьпелъ убо бых ему. Но сей ненавидяй мене велеречюетъ о мне и се ему несть изменения от Бога; аз же, Господи, уповаю на тя».[166] И тако сконча псалом, и съгнувша Псалтырь, и дасть отроку.