Том 6 (XIV - середина XV века, литература времени национального подъема)

Оттоле нача быти вражда между князема сима, а еще сваристася многажды миръ межю собою, но врагъ дияволъ паки рать въздвизаше. И паки бывшимъ княземъ во Орде, бывши пре велице межю има; оставиша Юрия у себя въ Орде, а князя Михаила отпустиша в Русь. И минувшу лету, паки безаконнии измаилтяне, не сыти суще мздоимьства, егоже ради желааше, вземши многое сребро, и даша Юрию великое княжение, и отпустиша с ним на Русь единого от князь своих, беззаконнаго треклятаго Кавгадыя.[137] Блаженный же великий князь Михайло срете его с вои своими, послалъ князю Юрию, рекъ: «Брате, аже тебе далъ Богъ и царь великое княжение, то азъ отступлю тебе княжения, но в мою оприснину не въступайся». Роспустя вои свои, поиде в вотчину свою з домочадци своими.

Паки не престаетъ дияволъ, желаетъ кровопролития, еже сотворися за грехи наша. Прииде князь Юрий ратию ко Тфери, совокупя всю землю Суздальскую, и с кровопийцем с Ковгадыемъ множество татаръ, и бесерменъ, и мордвы, и начаша жещи городы и села. И бысть туга и скорбь велика, поимающе бо мужи, мучиша разноличными ранами и муками и смерти предаяху, а жены ихъ оскверниша погании. И пожгоша всю волость Тверскую и до Волги, и поидоша на другую страну Волги, в той стране то же, хотеша сътворити.

Блаженный же великий князь Михайло призвавъ епископа своего, и князи, и бояре и рече имъ: «Братие, видите, княжения отступился есмь брату моему молодшему, и выход далъ есмь, и се над темъ, колика зла сътвориша в отчине моей, аз же терпях имъ, чаяхъ, убо престанет злоба сия. Наипаче вижю, уже головы моея ловят. А ныне не творюся, в чем ему виноватъ буду или в чем виноватъ, скажите ми». Они же, яко единеми усты, съ слезаами рекоша: «Господине, правъ еси во всемъ пред сыновцемъ своим. Тако въ смирение сотворил еси, се взяша всю волость твою, а на другой стране в отчине твоей то же хотятъ сотворити. А ныне, господине, поиди противу имъ, а мы за тебя хотимъ животом своимъ». Блаженный же великий князь Михайло такоже съ многимъ смирениемъ рече: «Братие, слышите, что глаголетъ святое Евангелие: иже аще кто положит душу свою за други своя, велик наречется въ царствии небеснемъ. Нам же не за единъ другъ, ни за два положити душа своя: селико народа в полону, и инии избиени суть, жены же и дщери ихъ осквернени суть от поганыхъ; а ныне мы, иже за толика народа положим душа своя, да вменится намъ слово Господне въ спасение».

И утвердившеся крестомъ честнымъ, и поидоша противу ратным. И яко быша близъ себе, бысть видети ратных бесчисленое множество; яко съступишася полци, и бысть сеча велика; не могуть брани носити противнии и вдаша плещи свои; милостью бо святаго Спаса и пречистыя его Матери и помощию великаго архаггела Михаила победи великий князь Михайло; бысть видети бесчисленое множество ратных, падающих под конми язвени, аки снопы в жатву на ниве.

Князь же Юрий, видевъ вои свои росполошены, аки птица въ стаде, отъехав к Торжку с малою дружиною, оттоле вборзе к Новугороду. А окаяннаго Кавгадыя со други повеле великий князь избити, в немже бысть последняя горкая погибель.

Сия же победа сътворися месяца декабря в 22 день, на память святыя мученици Анастасии, в день четвертокъ, в годину вечернюю. Самому же великому князю Михаилу бе видети доспех его весь язвлен, на теле же его не бысть никоеяже раны. Рече же блаженный пророкъ Давыдъ: «Падетъ от страны твоея тысяща и тма одесную, к тебе же не приступитъ, не приидетъ к тебе зло, и рана не приступитъ к телеси твоему, яко аггеломъ своимъ заповесть от тебе сохранити тя во всех путехъ твоих, на руках возмут тя».[138] Якоже и бысть тогда сохраненъ великим архаггеломъ Михаиломъ. И избави из плена множество душь, бывшая въ скверныхъ поганьских рукахъ, возвратися въ свое отчество с великою радостию. Приведе окааннаго Ковгадыя в дом свой, и много почтивъ его и одаривъ, отпусти его во своя. Он же лестию ротяшеся много не вадити къ цареви, глаголя: «Занеже воевалъ есмь волость твою без царева повеления».

Князь же Юрий совокупи множество новогородецъ и пьскович и поиде ко Тфери. И срете его благоверный великий князь Михайло противу Синеевъского. Паки не хотя видети другаго кровопролития за толь мало дни, удалишася и целоваша крестъ. И рече блаженный князь Михайло: «Поидеве, брате, оба во Орду, жалуемся вместе къ царю, абы ны чим помочи крестьяномъ сим». Князь же Юрий съемся с Ковгадыемъ, поидоста наперед во Орду, поимше с собою вси князи суздальские и бояре из городовъ и от Новагорода. По повелению же окаянный Ковгадый, написавъ многа лжа, свидетелствова на блаженнаго Михаила.