Том 8 (XIV - первая половина XVI века, переводная литература)

Плоть: Слыши убо и веруй и покорись имже глаголю. Сущая убо вся познаваема суть чювством, умная же умне постизаема суть. Яже убо чювьствена суть чювство чювствене познаваем, а яже паки мыслена — мыслена, якоже рех. Показанье чювство чювственее имат, постизаемое же мыслене, о страстная, не от того самаго познаваеться, но от действа. Неведома сущи, о душе, и невидима вся, вправду убо познаваешися от действъ, якоже и Богъ от своих ему твари. Бога никтоже виде никогдаже отнудь, невидимо бо есть сущьством и естествомъ, но убо познаваеться неколико от глаголаных. Невидимая бо Его, — рече божественый Павелъ, — и от тварей разумеваема,[287] зрящи, от еже въ тварех, — рече, — премудрости бывшая Творець и Создатель познаваеться яковъ. Яже темъ бываемая на всяк день Сдетеля поравеньству проповедають. Доброта тварем, величьство сим бывают, Творца их явьствене сказует. Азъ оживляюся с тобою и движюся, госпоже, от ихже всяко мною действуеши же и твориши познаваема еси от мене, якова и колика еси. Аз показую тя ныне всем, якова же еси и како еси делателна и действена в житьи. Имаши бо уды моя и ссуды вся и теми действуеши и с сими делаеши, скрыта сущи во мне и затворена. Невидима, яко невеществена вся всегда еси, помышленье и разуменье все же, аще имаши, скровена суть, о госпоже. Яже в тебе ни ветий, ни любомудрець, ни земоверьник пакы, но ниже волхвъ враг, — никтоже знает та, дондеже приимеши от мене шестострунная уста и къ голосу подобному органскыя моя уды: горло же и душник, гортань же и языкъ, зубы и устны с ними, — и глас вершиши. И тако тогда бывают скровенная ведома и явлена, якоже рехом, разуменья твоя. Приничеши очима моима и блюдеши убо вся, и глаголеши языком моимъ, и слышиши ушима, обоневаеши ноздрема моима, и рукама делаеши хытрости паки обои и художьства вся от малых и худых даже и до великых. Мене бо кроме никакоже твориши что отнудь житийско и телесно, и духовное весма. Азъ тя обиявих, азъ прославих тя. Не хвалися в моих, ни взносися толико. Аще ли хощеши уведети, яко истинно еже глаголю, и сде вонми разумно и навыкнеши удобно.

Веде еси велика и добра, якоже мниши, устроена во мне и свершена вся всяко абье от самоя утробы. Аз же, внегда рожюся, несвершен младенець есмь, малейше отнудь отрочя, якоже рех. Как абие не действуеши что-либо всяко, не глаголеши бо яве, ходиши же никако, рукама же спроста не делаеши никако, но вся недействена всегда бываеши. И ждеши, владычице, мене, твою рабу, — дондеже удове мои и части тела вся взрастут помалу и одебелеют сия и доспеют, якоже рех, в меру взраста. И тако тогда теми действуеши, яже хощеши. И по сих же паки аще что от удовъ моих случиться и погибнет, якоже не хощеши, любимая, к деланью его и паки забавляешися, не могущи его навершити дело. Аще же мозгъ мой уязвенъ будет мечем, или инако паки вреженъ будет, ослеплена бываеши, не зрящи спроста ни добро, ни не таково, несмыслена и скудоумна вся всегда еси и вся недействена, якоже преди рекохъ. Якоже очи азъ погублю, вся помрачена бываю, ничтоже делающи, якоже рече и Христосъ в Благовестованьихъ,[288] и веде имам прочая уды моя вся целы. Тако и ты, прелюбезная, умъ аще погубиши. Ума же потребнейше паче всех удовъ и органъ добрейши вглавны мъзлъ есть. И живут в немь 3 силы умныя: памятное, мечтанье и размысленое же. Мечтанное убо спреди, памятное же сзади, размысленое же посреде чрева вглавнаго, яве яко. Разумевай добре яже глаголю: тричастное твое не потребно кроме сего бывают, и веде пребываеши сдраво и цело все то: помысленое и яростное, глаголю, с третиимъ, еже есть, владычице моя, похотное, имиже бытие души исперва и еже быти прияти и бысть со мною создана бысть, 3-ми сими умными твоими сставы. Мозгу бо моему сущу сдраву, и целы, 3 силы, о душе, ражают тебе 4-ри родныя добродетели и колесницю 4-роконечну: правду и мудрованье ражает помысленое твое, целомудреное же пакы похотное твое, с сими и яростное ражаеть тебе мужьство... вкупе же и умныя силы, о господыне: памятное, мечтанное и размысленое же, с сими и пять твоих чювствъ, любимая: умъ и мысль, славу и мечьтание, и чювство последнее; и моя же такоже; зренье, обоненье, слух и вкушение, и осазанье, вселюбимая — отходят вся отнудь — умная, и чювственая, и мысленая с сими.