Том 8 (XIV - первая половина XVI века, переводная литература)

Преотечьская, о душе, Адама же и Евы богозданна благотворна телеса техь без семене сьздашесе и кроме смешения. Мужу убо от прьсти, жене же от его ребра сьзидашу. Разумей, душе моя, разумей: недвижима и безъдушна Адамова пльть прьвее сьздана бысть и послежде одушевлена. Елма же не сьхраньшу повеление Сьздателе прельстию зьмииною и завистию диаволею, погубише еже испрьва сьздание оно и вь сие одеашьсе кожное, увы мне, мертвное и тленное и текущее и пльное смрада. Темже изселени быша из рая и клетву приемлють якоже преступници. Ева убо слыша, еже: «Вь печелех родиши чеда».[298] Раждаемое же, прочее, вь утробе есть веде, а еже в ней раждаемое без семене несть. Се семе и зачетие — оттоле и доныня — и смешение мрьзко вь еже быти глаголю одушевлена телеса мужьска же и женска. Адам же, сый одушевлень, одушевлень сееть семе вь утробе прематерни, и той одушевлене, Каина убо роди одушевлена всего, пльть и душу вькупе рождьши, господыне. Подобне и прочии человеци и доныня: одушевлень человек одушевлено сееть семе въ утробе, глаголю, женьстей, якоже прежде мала рех ти, и растуть обоя и множутсе сия — душе же и телеса — даже и до кончания вь роды и роды, якоже видиши, госпожде.

Душа: Раздрешила еси неверное. К тому же сумнюсе, рци ми, о служителнице, и научи ме и се. Елма, якоже показала еси душю убо госпожду, пльт же рабыню и подручиницу тое, бывшее грехопадание, прьвозданныхь глаголю, еже некогда зле сьдеяше вь раи, убо кто есть повинень о семь, рци ми: словесное души или бесловесное тела? Хотела бых навыкнути, кто есть прежде сьгрешивый.

Плоть: Вьзыскание твое, владычице, выше мене есть, неудобь достежно, неудобь разумно, непостижимо всако. Но обаче от Писания маль искусь яко имущи, яже навыкох, та и вьзвещю ти, госпожде, и слыши, любьзная моя, мала от ихже ищеши.

Словеснейшая душа от Бога испрьва вьоружена бысть оружми силными кь помощи ее двема вькупе: яростнымь и похотным же. И сия, имиже вьоружена бе кь помощи ее, зле потребова та вь час онь, внегда начелникь злобе змиею глагола прелестные глаголы и льсти испльнены: «Бози будете абие, аще снесте от древа».[299] Слыша убо жена обожение, усладисе, и помысльнимь зле расуди, яко добро обожение помышлееть абие. Такожде и другое, — похотное глаголю, — превращьсе и се: вьжелеваеть древу — сласть убо прьвее и потомь тьщеславие, ова бо показал и древо яко добро и краснейше то вь снедь есть, любимая, ово же обожение самое, яко быти лучьшу всехъ. Две сии, владычице, прельстише Еву, и Адама прельсти подобно, яко и ону. Усладишесе зле вь разсуждении сих, предаше истиное, прельстившесе, увы! Нь убо и другое, глаголю же яростное, добре не потребова, нь зело блазнне: не бо прогневасе на врага и мужьскы исьпротивисе, еже не покоритесе тому и послушати его. Слышаных явъ, яко радость и чаание умь ее ослепи, душевное глаголю око, и упованиемь падесе обожения внезаяпу. Зде вьнми, о душе, и виждь страсть велику пагубную и лютую, и силу, юже имать. На небеси како възможе! Ужаснисе, душе моя, ужаснисе! Оттуду бо сьврьже иже иногда Денницу, тьщеславие глаголю родителницу, увы мне, и доилицу, якоже писано есть, грьдости, ееже ради онь отпаде.[300] Поругасе симь. И зри зде, владычице, стрьпьтную страсть, како Бога сьпротивоборца имать, иже сее рабь, сьпротивника же — и лукаваго сьпричестника и друга. Понеже грьдымь сьпротивльетсе, якоже и сих прьвому вьспротивисе вьскорь.

Душа: Се, прочее, якоже глагола, тело обидимо бысть: елма сьгрешение душевно бысть, как казнь — теле? Сие бо бысть текуще и страдателно абие, многострастно же и гнило, и многоболезнно зело, тленно и мрьтвно же, якоже зриши, и охуждено зело. Душа же пребысть якова же бе и прежде того — невеществена все, умна и бесмрьтна, рабыне, ничтоже бо пострада люто, яко смерти достойна.

Плоть: Да слыши, о владычице, и разумьй, сьлучшаасе. Мучение, добреишая, якоже подобитсе, все не прикоснусе тьлу, нь той самой души, аще и васнь явлеется та ничтоже зла пострадавши. И слыши притчю и от сее уверишисе.