Том 8 (XIV - первая половина XVI века, переводная литература)

Мирь душу ради сьздань бысть убо весь, а не душа его ради сьздана бысть, любимая. И обыче меншее прьвее творити Зиждитель, болшее же непоследокь, тако бо есть подобно. Вьнегда же душа чьстнейши, о любимаа, всего мира, якоже Христос рекль есть,[293] достоаше вьселение тое прежде быти и жилище все, и тако тои убо. И два мира сьздаль есть: горнего и долнего. Горнего убо — мысльная, долнего же — чювьствна. И аггелы сьздал есть вь вышнемь мире умны же и невеществены и духь огненосный. Вь нижнем же пакы различна животная земная же и водная, и птица же такожде. Ибо подобне сьзда и вь лепоту вса: вь мысленых — мысльнная, аггелы глаголю все; вь нижнии же чювствнаа, яко чювьствены и сь, всеми видимая и явлена вса. И от техь человека сугуба стварееть: небесна и земна, животно смешено, госпожде, — и вещестьна, и невеществена, словесна и бесловесна же, мрьтвна и бесьмрьтна, видима и невидима, — лучьшее от вышнаго, от нижнего же тело, примесивь душу божественую кь земному. И посреде ту положи одушевленыхь и бездушныхь, чювствных и мысльных, якоже некый образь, яко да свойствне кь темь от обоихь сихъ яко сьродникь наслаждение котороеждо имать: Божие убо душею, яко сущи божественейши, благых же на земли пльтию бренною приносити то и без боязни потребу якоже дань. Естьство бо мысльное, такожде и аггельское, хранит же и щедить сих спасение. Божественный бо апостоль учит ме сему: «Не все ли суть служьбнии дуси посилаеми, — рече, — на служения ради хотещихь, прочее, наследовати царствие?».[294] Нь убо и Господь вь Еуангелихь: «Да не преобидите, — рече, — единого от малыхь сихь, яко аггелы ихь зреть на всакь день лице Отца моего, иже есть на небесехь».[295] Темже и прежде създа мирь и яже вь немь посреднея вса, яве елика зриши, господыне.

Мирь имать четыри стихия великая, яже испрьва Зиждитель приведе всячьскымь, от не сущих прьвее вь бытие сьставивь; вьздухь глаголю и огнь, землю же и воду. И иная же вса, о душе, яже посреди сих якова и елика суть, мала и велика всако, звере, скоты, и гады, и садовные роды, и семе иже всехь, и былий всачьскыхь вины приеть убо от четырехь сих. И яко премудрь сьдятель сьтварееть вся не от не сущихь, ни убо якоже и стихия. И егда сьврьши всего сего мира, створи человека вь еже обладати и мирь и царьствовати над нимь, якоже волить и хощеть. Ни бо беше подобно от обладающаго явитисе обладаемымь прьвее, нь напоследокь убо, уготовлене бывши прежде многа власти яве, яко явити же се послежде цару его; якоже убо благьгоститель некый сый не прежде уготовления сьнедныхь всехь гостимаго, душе, вьводить вьнутрь, нь благолепнь обед устроивь всь и еже кь пищи все виды преуготовавь, вьведена послежде творить обедника. Нь паства прьвее, последи же скоти; прочее, понеже бысть, якоже предрекохь выше, тварь душу ради, темже убо и тело кь послужению бываеть и службе ее, якоже отци глаголють и учителе вси. Еже нечьсого ради бываемое все, аще есть, безчьстнеише есть оного, егоже ради бываеть, яко учить и Христос вь Еуангелихь: «Вещьши есть душа пищу»,[296] и в лепоту, и пакы: «Одежде тело болше есть».[297] Не бысть бо душа сньди ради, любимая, ниже тело пакы одежду ради, нь обоя убо ради — душу и тела. Темже, якоже показасе, тое ради и сей, глаголю же тело колесницу души быти. Нь слыши, владычице, и вьнми мое слово.

Понеже сугуба вьсхоте створити того — от душе и телесе — пръвое тело сьздаваеть от четырехь, любимая, стихий мира великыихь: топлаго и студенаго же, мокра и сухаго, — и крьвь, и хракотину, и слузь, и жльчь створаеть, и от техь вину яко хытрець вьземлеть, и пльть устрои на служение ее. Душу же потомь вьдьхну, якоже весть, и отнуду же весть самь, и якову, весть единь, не от сьставь имуще бытие, якоже иная, нь от Бога, яко же рехомь, и от вышнего мира, невеществну сию, и разумну, и бесьмрьтну всу, причястну сущу вышнего и божествнаго благосрьдия и кь нему вьсечьски присно ведущесе; или кь горшему привезавшесе телу, яко подвигомь и борбою же иже кь нижнимь симь вышнюю славу и пищу наследуеть всако. И страдание имать, добродетели, подвигы и труды, а-не уповаемая тьчию Божий будеть дар, и яко да и горшее некако к себе привлечеть и выше положить, раздрешивши помалу и се от тежести и дебельства тело земное, накажеть же добре служительницу вещь и присвоить Богови купноработное тое. Пльть глаголю веществну и от нижнего мира, душю убо яко владычицу, пльть же яко рабу кь послужению души и угождению ее.

Се, госпожде, рехь тебе, како не сьздана бысть прежде яко славна и велика и зело высочайши, и како, сущи бесьмрьтна, мрьтьвному сьпрежесе.

Душа: Верно слово есть, и вса приемлю ти, вса ти веровахь, разве единого точию сего, от нихже ныня рекла еси, льжно есть, рабыне. Прежде мала бо научи сьрасльна обоя, и ныня глаголеши послежде души быти, прьвее же тело ее. И како есть еже глаголеши?

Плоть: Како убо есть, ныня слыши, добрая, еже глаголю. И якоже не сльгахь вь инехь, ниже вь сихь.