Том 8 (XIV - первая половина XVI века, переводная литература)

И ту Александру человекъ некто прииде и рече ему: «Царю Александре, преж еихъ малых дней, ловящу ми при краи реки на Тигре, сокровище велико изнаидоша злата; да аще хощеши, поиди и возми сие, много множество есть». Александръ же рече к нему: «Всяко злато въ Божиих руцех есть, да аще хотел бы Богъ, мне бы явилъ, но понеже тобе есть объявилъ, да поиди, возми сие». Он же ко Александру рече: «Елико требовах, от него взях, останок же возми ты, царю. Множество бо есть много, два дни и две нощи елико хотехъ и носих, ктомуже не требую». Александръ же подивися сему и, на конь вседъ, на место то поиде, множество же злата виде и рече: «Егда от Дариевых сокровищъ злато сие есть». И тако повеле всему войску взяти. И толико его множество бе, елико вси до воли взяша, Александру же сто кубловъ от него оста.

Сему же бывшу, и се Алимпияда царица, мати Александра царя, от Македонии прииде. Александръ же и вси цари и велможи нарядивъ и во всей силе и войско свое направи, кони поводныи великии под бисерными седлы и златыми учреди, и трубы гласовныи, и органи, и тимпаны псалтырныи, и мусикийскии хитрости по достоянию урядив, и колесницу велику со златом и бисеромъ и с камением украшену на стретение матери своей посла. И преж себе Роксану царицу посла, 1000 владыкъ посла с нею. Видевши же сие Алимпияда возрадовася велми и позирающи на ню, дивляшеся доброте ея и лепости, изрядному ея разуму; и сладко сию облобызающи и к сердцу своему прнгорнувши, рече: «Благодарю тя, Боже мой, яко далъ еси Александру подобну ему жену. Добре обрела тя есмь, сердце, и душе, и милый свете очию моею, вселюбезная дши моя Роксана». Роксана же к ней рече: «Добре пришла еси, и великая и светлая, всего света царица, государя моего мати, мне же госпоже, Алимпияда царица». И тако на колесницу вседоша и поехаша. По том же Александръ срете их в чюдной великой и дивной порастаси со всеми своими вои и велможи, вси же на великих конех и всякий велможа пред своимъ полкомъ в царской стеме и на златой колесницы направе ехаша. Александръ же еха у великой толши македонскаго стана на великом кони в финическом одеянии, на главе же его перская кучма стратокомиловым перьемъ, на кучме венецъ Клитоврии, амазинскои царицы. Егда же близу сташа, тогда царицы обе слезоша, сагове свияне по полю тому вергоша, и ту на них ставше, Александра дождаше. Александръ же от далеко с коня на землю ссяде и с велможами своими к матери прииде пешъ. Мати же его видевше, за горло его похвати и сладко целующи и рече: «Добре обрела тя, сыну и всего света господине, Александре царю». И се рекши, к станомъ поидоша. Бяше же видети ту дивный чюдный и красный станок. Егда же к стану приехаша, тогда полкове по достоянию разрядишася и рядомъ около их оба пол идяху. Вси же трубы псаловныи удариша, органы и прасковицы, различнии мусекийскии сверили; и не бе ту слышати и ни единаго гласа от трубнаго вопля и от коньскаго уристания. И тако в стань свой приидоша. Велможи же по достонию седоша. Александръ же седе на великомъ своемъ на златомъ престоле, о правую же страну седе его мати Алимпияда, о левую же страну седе Роксана, жена его; и ту веселящеся много. Александръ же начатъ ей сказывати боеве вси великии, иже сотвори з Дарием, царем перскимъ, и прочими восточными и западными цари. Сие же слышавши Алимпияда царица дивляшеся. И тако повелеваше трубамъ ударити, иже зовутца сирини намелии.[107] Такови же органы суть: 3000 писковъ имают, гласове же вси различни суть, дебели, и тонцы, и высоцы, и низцы, и тако жалостно слышати их и сладцы, яко всяки человеческий разумъ дивляшеся. И ту веселившеся много Александръ царь со Алимпиядою царицею, матерею своею, и с Роксаною царицею, с престола восташа, цари же в шатры разыдошася.

Во единый от дний повеле Александръ младымъ витязем торгатися; в другий же день из луковъ стреляти; во иные же дни некую игру играху, иже зоветца каруха,[108] дивна же есть и чюдна зело.