Том 9 (Конец XIV - первая половина XVI века, подъем общественного значения литературы)

Егда въ монастыри купно жили есмы, сам веси, яко съплетений мирскых удаляюся и творю, елико по силе, по божественых писаний, аще и невъзмогаю тако ради лености моеа и небрежениа. Таже по ошествии странничьства моего пришед в монастырь, въне близь монастыря сътворих себе келию и такоже живях, елико по силе моей.

Ныне же в далее от манастыря преселихся, понеже благодатию Божиею обретох место угодно моему разуму, занеже мирской чяди маловходно, якоже и самъ виделъ еси.

И наипаче испытую божественаа писаниа: прежде заповеди Господня и толкованиа ихь и апостольская преданиа, таже и житиа и учениа святыхъ отецъ — и темь вънимаю. И яже съгласна моему разуму къ благоугождению Божию и к ползе души преписую себе и теми поучаюся, и въ томь живот и дыхание мое имею. А немощь мою и леность и нерадение на Бога и на Пречистую Богородицу възложих.

И аще что лучится творити ми, аще не обрящу то в святых писаниихь, отлагаю се на время, дондеже обрящу. Понеже по своей воле и по своему разуму не смею что творити. И аще кто любовию духовною прилепляется мне, такоже съветую делати, наипаче же тебе, занеже изначала духовною любовию усвоаемь еси мне. Сего ради и слово подвигохь к тебе, съветуа въ благо, яко своей души: како самъ тщуся делати, тако и тебе беседовах.

Ныне же, аще и разне телом есмы, но духовною любовию съпряжени и съвокуплени. И устава ради сеа божественыа любве беседовах ти тогда и ныне пишу призывающаа в спасение души. И ты яже слыша от мене и написанна видевь, аще угодно ти есть, подражай сиа. Желаа сынъ и наследникь быти святых отецъ, твори заповеди Господня и преданиа святых отецъ и сущимь с тобою братиамь глаголи.

И аще особне вселение твое есть или в монастыри съ братиами еси, вънимай святымь писаниемь и по стопамь святых отецъ шествуй. Занеже божественая писаниа намь тако повелевают: или повинутися таковому человеку, кто будеть сведетельствованъ в делании словомь и разумомь духовне, — якова же пишеть Великый Василие[262] въ слове, емуже начало: «Придете къ Мне вси тружающеися».[263] Аще ли не обрящется таковь, ино повинутися Богу по божественыхь писаниихь, а не так безсловесно, якоже неции. И егда в монастыре съ братиами, мнящеся в повиновании, самоволием безсловесно пасутся и ошельствие такоже творять неразумно, волею плотскою ведущеся и разумомь неразсудном неведуще ни яже творять, ни о нихже утверждаются. О таковых Иоаннъ Лествичный, разсуждаа въ иже о различии безмолвиа слове, глаголеть: «Самочиниемь паче, неже наставлениемь, от мнениа плавати изволиша». Еже да не будеть намь. Ты же, творя по святыхъ писаниих и по жительству святыхъ отецъ, благодатию Христовою не погрешиши.

Ныне же и азъ оскорбихся о томь, что ты скорбенъ. Того ради понудихся и писати к тебе, — чтобы еси не скорбенъ был. Богъ же всякыа радости и утехы да утешить сердце твое и известить о нашей любви еже к тебе.

Аще и грубо написах ти что, но не иному кому, но тебе — присному възлюбленному моему, не хотя презрети прошение твое. Надею бо ся, яко съ любовию приимеши и не позазриши неразумию моему.

А о вещехь нашихь, о нихже молих святыню твою, та добре потщался еси устроити, о томь челомь бию. Богъ да въздасть ти мьзду противу твоему труду.

К тому же еще молю твою святыню, да не положиши словеса она скорбь, яже глаголахомь тогда. Аще бо и по внешнему мнятся жостока, внутрь же исполнь ползы. Понеже не своя глаголахь, но от святых писаний. Жостъка убо поистине онем,иже не хотять истинно смиритися въ страсе Господни и плотьскыхъ мудрований отступити, но по своих воляхь страстних жити, а не по святыхь писаниихъ. Таковии бо не испытуют святая писаниа съ смирениемь духовне. Неции же от нихь не хотять и слышати ныне еже по святыхь писаний жити, якоже бы рещи: не намь писана суть и не подлежить еже въ нынешнем роде хранити та.

Истинным же делателем и древле, и ныне, и до века словеса Господня чиста, яко сребро ражжено и очищенно седмерицею, и заповеди Его светлы, и въжделенны имь паче злата и камениа честна, и услаждають ихь паче меда и сота, и хранять я. И вънегда съхранять та, въсприимуть въздааниа многа.

Здравьствуй о Господе, господине отче, и моли о нас грешныхь, а мы святыни твоей велми челом бием.

ПОСЛАНИЕ БРАТУ, ПРИШЕДШЕМУ С ВОСТОЧНОЙ СТОРОНЫ

ТОГО ЖЕ СТАРЦА ПОСЛАНЕИЦЕ ПРОСИВШЕМУ У НЕГО БРАТУ С ВЪСТОЧНЫА СТРАНЫ НА ПОЛЗУ ДУШИ

Так ся, господине, нам мнить полезно тебе окормлятися: правило в телесных деланиих по силе, а не выше меры, а в писаниих божественых поучатися, и в рукоделиих себе обучати, и безмолвие любити. А коли, Богу хотящу, друг друга узрим, тогда пространнее будет беседа о всем, про все.

ЗАВЕЩАНИЕ