Том 9 (Конец XIV - первая половина XVI века, подъем общественного значения литературы)

И не тщися скороглаголивь быти въ беседах къ братии, аще и полезна быти мнятся. Но аще который брат извещение имат к нам и истинно требуеть слова Божиа и аще имамы, длъжни есми подати ему не точию слово Божие, по апостола свидетельству, но и свою душу. Събращай же ся с таковыми и съблаговоли темь въ деланиихь, иже духовне мудрьствують, яже суть чада таинъ Божиих. Съ не таковыми же беседы, аще и малы суть, изсушають цветы добродетелей, иже внове процветающа от растворениа безмолвия и окружающая съ мяккостию и младостию сад душа, всажденному при исходищих вод покааниа, якоже рече премудрый святый.

4 въпрос.

А еже ищеши, како не заблудити отъ истиннаго пути, и о семь съвет благь даю ти.

Свяжи себе законы божественыхь писаний и последуй темь, писанием же истиннымь, божественымь. Писаниа бо многа, но не вся божествено суть. Ты же истинная известне испытавь от чтений сих и бесед разумных и духовных мужей — понеже не вси, но разумнии разумевають сих — и без сведетельства писаний таковыхь не твори что, якоже и азъ. О себе поведаю ти, понеже яже по Бозе любовь твоа безумна мя сътворяеть — еже о себе глаголати ми. Но якоже речено есть: «Таиньства моа любящим мя открываю».[259] Того ради глагола ти.

Аз убо не творю что без сведетельства божественыхь писаний, но по святых писаний последуя, творю елико по силе. Егда бо сътворити ми что, испытую прежде божественаа писаниа. И аще не обрящу съгласующа моему разуму в начинание дела, отлагаю то, донеже обрящу. Егда же обрящу благодатию Божиею, творю благодръзностно яко известно. От себе же не смею творити, понеже невежда и поселянинъ есмь.

Сище и ты, аще хощеши, сътворяй по святых писаниих и по сих разуму тщися делати заповеди Божиа и преданиа святых отецъ. И аще влънениа житейскых вещей каа подвижут сердце твое, не ужасайся, утверждаем на недвижимемь камени заповедей Господних и ограждаемь преданми святыхь отецъ. И о всемь буди ревнитель тем, ихже зриши и слышиши от святых писаний, имущихь сведетельствованно житие и мудрование. Сих бо право есть шествование пути. И сиа написуа в сердци своемь, поиди неуклонно в путь Божий и не заблудиши благодатию Божиею от истины. Писано бо есть, яко невъзможно праве мудрьствующему и благочестне живущу погыбнути. Но елици растленнемь разумомь творять дело Божие, сии погрешають от праваго пути.

Шествуй же невъзвратно, положивь руку на рало Господне и не зря въспять, да управлен будетши в царство Божие.[260] И потщися, приемь семя слова Божиа, не обрестися сердцу твоему путь, ни камень, ни терние, но благаа земля, сътворяа многосугубенъ плодъ, в спасение душа своеа. Да и азъ, разумное твое въ услышании слова Божиа разсмотривь и яже достойная похваламь въ исправлении добродетелемь в тебе обретъ, възрадуюся, благодаря Бога, уведевь тебе слышавша слово Божие и храняща е. Молю же тя Господа ради молити за мя грешника, глаголюща ти доброе, а не творяща никакоже.

Богь же, творяй преславная и подаваа всяко даание благо творящим волю Его, да подасть ти разумъ и утверждение творити волю Его святую молитвами Пречистыа Владычица нашеа Богородица и всехь святых, яко благословень в векы. Аминь.

ПОСЛАНИЕ ГЕРМАНУ ПОДОЛЬНОМУ

ПОСЛАНИЕ ТОГОЖЕ ВЕЛИКАГО СТАРЦА КЪ БРАТУ, ПРОСИВШУ ОТ НЕГО НАПИСАТИ ЕМУ ЕЖЕ НА ПОЛЗУ ДУШИ

Писаниице твое, отче, еже писалъ еси къ мне, — просиши у мене отписати ми к тебе, еже на пользу и известити ми тебе о себе, — что мниши скорбь мне на тебя тех ради речей, что беседовали есмя с тобою, коли еси былъ зде. И о том прости мя. Съветовалъ есмь, въспоминаа себе и тебе, яко присному своему любимому, якоже и писано есть: «Таиньство Моа Моимь и сыновомь дому Моего открываю»,[261] — что не просто или якоже прилучися подобаеть намь творити деланиа каа, но по божественыхь писаниихь и по преданию святыхъ отець, прежде изшествие из монастыря. Точию не ползы ли ради душевныа, а не за ино что? Занеже не видятся ныне хранима жительства законъ Божиих по святых писаниих и по преданию святых отецъ, но по своих волях и умышлениих человечьскых. И въ мнозех обретается се, что и самое то развращеное творимь, и сие мномь добродетель проходити. Се же случается от еже неведети нам святая писаниа, понеже не тщимся съ страхом Божиимь и съ смирениемь испытовати сиа, но небрежемь о них и въ человечьская упраждняемся.

Аз же того ради тако беседовах ти, понеже истинно, а не притворено хощеши слово Божие слышати и творити е. И аз, не ласкаа тя, ни съкрываа жостоту теснаго и прискорбнаго пути, предложих ти. Инем же противу мере комуждо беседую. Ты же веси мою худость изначала, яко присный духовне любимый мой. Сего ради и ныне пишу тебе, явлено о себе творя, понеже по Бозе любовь твоа понуждает мя и безумна мя творить — еже писати к тебе о себе.