Том 9 (Конец XIV - первая половина XVI века, подъем общественного значения литературы)

О страховании же еже глаголеши, се есть младенчественый обычай немужественыа душа. Тебе же не свойствено есть сие. И егда прилучят ти ся таковая, подвизайся, да не обладають тобою, и утверди сердце свое уповати на Господа и рци в себе сице: «Имамь Господа, храняща мя, и без воля Его не можеть никтоже ни в чемже повредити мя. Аще ли что попустить на мя — еже пострадати ми,и азъ се не злолютне приемлю и не хощу упразднити хотение Его, понеже Господь множае мене весть и хощет полезная мне. И азъ о сихь всехь благодарю благость Его». И тако благодатию Божиею благодръзостен будеши. Молитвою же всегда и на се въоружайся. И егда в кыих местех сие прилучит ти ся, тамо наипаче тщися приходити и, руце крестаь образомь простер, Господа Исуса призывай. И помощию Вышняго «не убоишися от страха нощнаго и от стрелы, летящаа в дне».[252] И сиа убо о сих.

Прочая же вся, елико похвална, и честна, и добродетелна, сиа помышляй и твори, мудръ бываа въ благое, всяку же злобу ненавидя. Имей послушание къ наставнику и прочим отцемь о Господе въ всяко дело благо.

Службе же, ейже ныне порученъ еси, или въ иную преидеши, буди служа светлымь предложением и тщаниемь благообразным, яко самому Христу, всю братью святы имея.

Аще прилучит ти ся слово — въпрос или ответъ кому, благоглаголива и сладко беседу твори съ любовъю духовною и съ смирениемь истинным, неразленено и не преобидя брата. Благоговейным отцемь прилепляйся, и то — въ время и в меру. От не таковых же ошайся, съхраняй же ся и тщися не укорити, ни осудити кого в чем, аще и не благо что зрит ти ся. Но себе гръшна и неключима въ всемь вменяй.

Аще потребна ти будеть каа вещь от настоятеля или прочихь въображеных отецъ на то, прежде помолився и размысли в себе, аще полезно есть, и тако въпроси. Аще ли не устроить ти, якоже хощеши, не огорчися, ни ужостися про то — еже не по твоему хотению сътвориша, аще и благо мнить ти ся, якоже ты хощеши, но съ терпениемь преиди и съ тихостию и съ пожданиемь все твори. И аще къ благоугождению Божию и къ спасению душа своея управляася будеши, всяко известить Богь сътворити кому по потребе твоей и время и руку помощи подасть.

Буди же усерденъ къ послушанию божественых писаний, и сихь глаголы, яко водою животною, напоай свою душю и тщися, елико по силе, по сих творити. Тако же имущимь разумь божественых писаний и мудрование духовно и жителство сведетельствованно в добродетелех, таковым тщися повиноватися и техъ житию подражатель быти. Тръпение имей в скорбех, и за оскорбивших тя молися, и имей тех яко благодетеле.

И се разумей, еже глаголю ти разумъ божественых писаний, поведающь хотение благодеания Божия: яко от века святии, иже съдеаша правду и получиша обетованиа, ходивше в путех добродетели, не токмо беды и скорби претръпеша, но и крестомь, и смертию шествуема бе стезя их. И се есть знамение любве Божиа, еже скорби принесутся кому о делании правды. И сие глаголется дар Божий, апостолу пишущу: «Се дано бысть намь от Бога, еже не токмо в Христа веровати, но и еже о Немь страдати».[253] Сие бо сътворяеть человека обещника страстемь Христовымь и подобна святымь, иже претръпеша скорби за имя Его. И не инако благодетельствует Богъ любящихь Его, точию посылает имь искушениа скорбей. И въ семь разньствують любимци Божии от прочих: да сии убо въ скорбех живуть, любящии же мир сей в пищи и покои веселятся. И се есть путь правый — еже претръпети искушения скорбей о благочестии. И на сей путь поставляя, Богъ страдалцев своих приводить въ живот вечный. И сего ради съ радостию подобаеть шествовати намь непорочне в путь сей, ходяще в заповедех Господних, всемь сердцемь благодаряще Его, яко посла намь благодать сию, възлюбивь нас, беспрестанно молящеся благости Его, поминающе конець житиа сего скорбнаго и бесконечное блаженьство будущаго века. И Богъ всякоа радости и утешениа утешить сердце твое и съхранит тя в страсе Своемь молитвами Пречистыа Богородица и всех святых.

Незабвена же Господа ради сътвори и мене, грешника, въ молитвах своих, глаголющи ти доброе, а не творяща, да Господь изведет мя от потопа страстей и от тимениа грехов.

ПОСЛАНИЕ ГУРИЮ ТУШИНУ

ТОГО ЖЕ ИНОМУ О ПОЛЗЕ

Еже усты къ устом беседова твоа святыни къ мне, честнейший мой господине отче, таже и писаниица о том же присылал ми еси: требуеши от моеа худости написано послати тебе слово полезно — еже къ благоугожению Божию и къ ползе души. И аз, господине, человек грешенъ и неразумен есмь и всеми страстми побеждаемь, боахся начати такову вещь. Того ради отрицался есмь и отлагалъ. Но понеже духовнаа твоа любовь устрои мя еже дръзнути ми выше меры моеа, писати тебе подобающяа, того ради убедихся на се.