Том 9 (Конец XIV - первая половина XVI века, подъем общественного значения литературы)

Похвално желание подвигнулъ еси, о възлюбленне, еже слышати слово Божие ищеши на утверждение себе, на съхранение от злых и поучение к благым. Но подобно было тебе, господине, сиа от добре разумеющих навыцати. Ты же требуеши сие от мене неразумнаго и грешника. Азъ убо и въ учимых чину непотребен есмь, того ради отрицахся и отлогах намнозе: не яко не хотя послужениа принести благому твоему произволению, но ради неразумиа и грех моих. Что бо азъ реку, не сътворивь сам ничтоже благо! Кый есть разум грешнику? Точию грехы. Но понеже множицею понудил мя еси на се — еже написати ми тебе слово къ съзиданию добродетели, и азъ дерзнух написати тебе сиа, еже выше меры моея, не могы презрети прошение твое, да не множее оскорбишися.

Въпрошение же твое — о находящих помыслъ предних мирскаго житиа. И сие и сам от искуса разумееши, коликы скорби и развращения имат миръ сей мимоходящий и колика злолюства сътворяет любящимь его и како посмеавается, отходя от работавших ему, сладокь являася им, егда ласкает вещми, горекь бываа последи. Поелику убо мнят благая его множащася, егда удръжаваются имь, потолику растут скорби им. И мнящаася бо его благая по-видимому суть блага, внутрь же исполнена многа зла. Того ради имущим разум истинною благый явлене показует себе — да не възлюбленъ будеть ими.

По прешествии же от житиа сего что бываеть? Положи мысль тверде въ глаголемое. Чимь ползова мир дръжащихся его? Аще кои и славы, и чьсти, и богатьство имешя, не вся ли сиа ни въ что же бышя и яко сень мимоидошя и яко дым исчезошя? И мнози от сих, съобращающеся в вещех мира сего и любяще пошествие его, въ время юности, благоденьства своего смертию пожати быша, яко цветци сельнии, процветше, отпадоша и, нехотяще, отведени быша отсюду. А егда пребываху в мире семь, не поразумеша злосмрадиа его, но тщахуся въ украшение и покой телесный, изъобретающе разумы прикладныя въ прибыткы мира сего, и въ учениих прохождааху яже венчевають тело въ веце сем преходящем. И аще сиа вся получиша, а о будущем и некончаемом блаженьстве не попекошася, что непщевати о таковыхь? Точию сих миръ безумнейши не имать, якоже рече некый премудрый святый.

Неции же от сих благоговейнейша быша и съобращаху умъ свой в помышлениих желаниа спасениа души, и имяху борениа къ страстем, и образы добродетелей по възможьному творяху, хотяще разрешитися и отступити мира сего, но не могоша оттръгнутися от сетей его и избежати коварствъ его.

Тебе же възлюбивь Богъ, и изят от мира сего, и поставилъ в чину службы своея милостию и строением своимь. Того ради длъжен, еси попремногу благодарити милость Его и творити вся, елико по силе, къ благоугождению Его и к спасению душа своея, задняа мирская забываа, яко непотребна, къ предним же добродетелем простираася яко животу вечному ходатайствена. Радуйся, гряди на почесть вышняго званиа, иже въ небеснем отечьстве подвизавшихся щадимаа.

А еже рекл ми еси о помыслехь нечистых, иже от врага душь нашихь приносимых, о сихъ не зело поглощайся скорбию, ни ужасайся, понеже не точию намь немощным и страстным от сихь стужение бываеть, глаголють отцы, но и сущимь въ предспеании и въ житии достохвалнемь пребывающимь и благодати духовней отчасти сподобльшимся. И симь ратование бываеть много от таковыхь помыслъ, и в подвизе велице от сихь обретаются и благодатию Божиею едва отгоняють сих, тщащеся всегда на отсечение сих.

И ты, симь утешаася, потщателно отсецай лукавыя помыслы. Имей же на сих всегдашнюю победу — молитву, Господа Исуса призываа. Сим бо призываниемь отгоними бежаще отидут. Якоже рече Иоанъ Лествичный[249]: «Исусовымь именемь бий ратникы, крепчайши бо сего оружиа несть». Аще ли зелне укрепятся на тя ратующеи тя, тогда, въставь и на небо очи и руце възвед, рци усердне съ смирениемь: «”Помилуй мя, Господи, яко немощенъ есмь”[250] «ты, Господи, силенъ еси”,[251] и твой есть подвиг. Ты ратуй о нас и победи, Господи». И аще сице творя будеши неленостно, всяко искусомь научишися, яко Вышняго силою сиа побеждаются.

Твори же что-либо и рукоделие, и сим бо лукавыя помыслы отгоняются. И се есть предание аггельско некому от великых святыхь. И изъучай что от Писаниа изъ усть, в томь ум полагаа: и сиа възбраняют к намь вход нашествиа бесовскаго. И то есть изъобретение святыхь отець.

Съхраняй же ся от беседъ, и слышаниа, и зрений неподобных, иже въздвижут страсти и укрепляють нечистыя помыслы, и Богъ поможет ти.