Том 9 (Конец XIV - первая половина XVI века, подъем общественного значения литературы)

Въпрошение же твое пръвое о помыслех блудных: како съпротивитися имь. И о сем не тебе точию тщание и подвигь, но и всем подвизающимся съ Богомь, понеже велиа сиа борба, глаголють отцы, сугубу рать имеа — въ души и теле, — и не имат нужднейши сего естество. Того ради крепце тщатися подобает и трезвьно, и бодрено съблюдати свое сердце от сихь помыслъ и, страх Божий имеа пред очима, поминати обещание наше, еже исповедахомь — пребывати въ целомудрии и чистоте. Целомудрие же и чистота не внешнее точию житие, но съкровенный сердца человекь егда чистотьствуеть от сквернных помыслъ. Тем же всячьскы потщателно отсецати сиа помыслы; сию же победу велию на них поставляти, еже молитися Богу прилежно, якоже предаша святии отцы, — различными образы, единем же разумомь. Овъ убо, рече, от Давида приемь сице молитися: «”Изгонящеи мя ныне обыдоша мя”.[254] Радости моа, “избави мя от обышедших мя”».[255] Ин же от тех же глаголеть сице: «Боже, в помощь мою вънми»[256] — и к сим подобная. Ин же пакы от тех: «Суди, Господи, обидящим мя и възбрани борющим мя»[257] — и прочее псалма.

Призывай же на помощь и яже слышиши в писаниих подвизавшихся о целомудрии и чистоте. Егда же зелне належит ти брань, абие въстав и на небо очи и руце простеръ молися сице: «”Ты силенъ еси, Господи”,[258] и Твой есть подвиг. Ты ратуй и победи в томь, Господи, о насъ». И възопи къ Всесилному въ помощех смиренеми вещанми: «Помилуй мя, Господи, яко немощенъ есмь». Сие убо предание святыхь есть. И аще въ сих борениихь проходя будеши, познаеши искусомь, яко благодатию Божиею сиа сими зелне побеждаются.

Всегда же Исусова имене оружиемь рани ратники. Крепчайши бо сеа победы несть.

Съхраняй же ся от видениа лиць и слышаниа беседъ таковых, иже въздвижуть страсти и възставляють нечистыя помыслы. И Богъ съблюдет тя. И сиа убо о сих.

Второе же въпрошение твое о хулном помысле. И сий помыслъ безстуденъ и лютъ есть зело. Стужает же крепце и непостоателне. И не точию ныне, но и древле бысть, и великымь отцемъ и святымь мученикомь, и в самое то время, егда хотяаху мучители предаати телеса их на раны и смерти горкыа, исповеданиа ради веры еже въ Господа Бога нашего Исуса Христа.

И на сий помыслъ победу имети сице — еже не свою душю, но нечистаго беса виновна быти сему. Глаголати же противу хулному духу сиа: «Иди за мя, сатана. Господу Богу моему поклонюся и Тому единому послужу. Тебе же хула твоа на верхь твой възвратится, и тебе напишеть сию Господь. Отступи убо от мене. Богъ, създавый мя по образу своему и по подобию, да упразнит тя».

Аще ли и по сихь стужаеть, безстудствуа, преложи помыслъ на ину некую вещь божествену или человечьску — аще что не вне подобающих.

Съхраняй же ся от гордыня и в путех смирениа тщися проходити. Речено бо есть отцы, яко от гордыня ражаются хулныя помыслы. Бывают же и от зависти бесовскыа. И аще от сего или оного бывають, но якоже ални губителна ядовитым зверем, тако и сей страсти губително есть смирение. Не точию же сей, но и прочимь, — речено бысть святыми отцы.

3 въпрос.

А еже испытуеши, како отступити от мира, — и сие добро усердие твое. Но тщися деломь сему съвершитися сице в тебе. Сие бо есть потлаченый путь къ вечному животу, имже, въ внятии премудрости познавше, идоша преподобнии отцы.

Наипаче бо тому подобно отступление мира, емуже въ обычаи бысть съвокупление съ миром. Аще бо не отступить, якоже образи неции и начертаниа мира, прежде бывшаа в нем от слышаниа и видениа мирскых вещей, пакы поновляются. И не может трезвьно пребыти въ молитве и Божиимь волям поучатися. Хотяй же поучатися благоугождению Божию долженъ есть оступити мира.

Не въсхощи же приати обычныхь другов беседы, иже мирская мудрьствующих и упраждняющихся в безсловеснаа попечениа — яже въ прибыткы монастырскаго богатьства и стяжениа имений, яже мнятся сиа творити в образе благости и от неразумениа божественых писаний или от своих пристрастий, — добродетель мнять проходити. И ты, человече Божий, таковым не приобщайся. Не подобает же и на таковыхь речми наскакати, ни поношати, ни укоряти, но — Богови оставляти сиа: силен бо есть Богъ исправити их.

Съхраняй же себе въ всячьскыхь от дръзновениа. Дръзновение бо, якоже писано есть, подобно огню велику, еже егда бываеть, вси бежат от лица его. И отвращайся слышати и видети вещи братняа и таиньства их и деаниа. Сие бо сътворяет душу пусту всякого блага и устраает сматряти недостаткы ближняго и съставляеть еже плакати своя грехы.